O Le Faafeagai o le Fefe

Sa sioa atu Tricia ma ona mata lapopoa, ma loimatā i le kapoti lavalava i lona potu. Ua malepe le faitotoa ma e le mau lelei pe a tapuni. A pogisa, e pei lava lavalava o ni sauai o faapotopoto faatasi ma faatalitali e feosofi mai mai uaea o loo tautau ai ma taufetuli atu ia te ia. Ae o le mea na atili ai ona leaga, sa ia lagona atu se manavanava leotele na foliga mai e sau mai le kapoti lavalava.

Sa ia iloaina e i ai tagata leaga ma o nisi taimi latou te faatiga ai i tamaiti. Atonu o loo lafi se tasi o i latou na i le kapoti lavalava! Sa ia manatuaina foi le tala a le tamaitiiti o lana vasega faataitai na faamatala e uiga i se miti taufaafefe. Sa tuli o ia e se gata e umi lona siusiu. Na maua o ia e le gata ma taataai lona siusiu ia te ia!

O uso o Tricia, o MaryAnn ma Repeka, sa momoe foi i totonu o le potumoe, ae e le’i valaau atu i ai o ia. Ina nei osofai mai po o le a lava le mea na lafi i totonu o le kapoti lavalava. Sa na lagona atu ua leai se pisa o le televise. O lona uiga ua uma le matamataga a ona matua i tala fou, ae ua o e momoe. Ae e le mafai ona ia tamoe atu ia i laua—e le mafai foi ona minoi.

Sa matuai fefe lava Tricia o lea na fia tagi ai lava, ae e le’i manao lava e pao. Na pau le mea na mafai ona ia faia o le sioa atu i le kapoti lavalava pogisa, ma le taufaafefe, ma faamoemoe po o le a lava le mea e oso mai iina o le a lē au atu ia te ia.

A o sioa atu Tricia, na oo atu se manatu filemu i lona mafaufau: “Aisea e te le tatalo ai?” Na vave lava ona ia lagona si ona fiafia laitiiti. Sa tau atu e lona tina e mafai ona ia tatalo i soo se taimi, i soo se mea. Na te le tau moeiini! Sa tatalo filemu Tricia. O le taimi lava na ia faapea ai, “I le suafa o Iesu Keriso,” na oo atu ai se lagona toafilemu i ona luga. Sa ia iloaina na lagona e le Tama Faalelagi lana tatalo.

O ana manava uma sa amata ona toamalie. Sa le toe leotele foi le manava taufaafefe. O le mea moni, a o faifai malie ifo lana lava manava, na faapena foi le manavanava mai le kapoti lavalava. Sa taofi e Tricia lana manava. Na taofi foi le manava [mai le kapoti]. Mulimuli ane na malamalama ai o ia—sa fefe o ia i lana lava manava!

Sa ia lagona si ona faavalevalea teisi, ae o le mea sili sa ia lagona le agaga faafetai. O le taimi lava sa mafaufau ai ia Iesu, na tuu ai foi ma ona mafaufauga taufaafefe, ma na ia iloaina le faavalevalea tele [o na mafaufauga]. Sa ia manatua na tau atu e lona tama o le faafeagai o le fefe o le faatuatua i le Alii o Iesu Keriso. “E leitioa a fiafia Satani e faafefe tagata,” sa mafaufau ai. “Latou te le o mafaufau ia Iesu pe a latou fefefe.”

Sa toe faapupuu Tricia i lona ieafu ma toe tatalo. O le taimi lenei, sa ia faafetai ai i lona Tama Faalelagi mo le faafofoga mai i ana tatalo ma fesoasoani e foia lona fefe. Ina ua uma ona tatalo, sa pesepese lemu o ia “E Manao Iesu ia Ou Fai ma Sulu.” O le taimi lea, e le’i toe fefe ai e moeiini ona mata aua sa faamafanafanaina o ia e upu ma le musika. E le’i umi, ae gase loa lana moe.

Ata

“O lo tatou faatuatua i le Alii o Iesu Keriso o le puna lea o le mana faaleagaga tatou te maua ai le faamautinoaga e leai lava se mea tatou te fefefe ai.”

Elder M. Russell Ballard o le Korama a Aposetolo e Toasefululua, “O Lo Tatou Alii ma le Faaola,” Liahona, Tes. 1997, 14; “E Leai se Mea e Fefefe ai i le Faigamalaga,” Liahona, Iulai 1997, 75.