O Se Leo o le Lapataiga

Na sisina ifo i foliga o Tate mataua o lona afu ao ia tosoina atu le ato o le moa vao e agai atu i le faitotoa o le auala alo. Na pau lava le mea na mafaufau i ai Tate o se vai malulu i lenei Aso Toonai vevela. Ao ia susueina le kalone lapisi uamea e sasaa i ai vao o lana moaga vao, sa ia vaaia se mekasini o taatia i le ta’ele o le kalone.

Na aapa atu Tate ma aumai i luga, ma a’o ia tosoina mai i fafo le mekasini, na oloia lona lima i le uamea vevela o le kalone. Auoisa! Sa tu sa’o ae i luga ma tilotilo i le mekasini o loo i lona lima. O luga o le faava’a o loo i ai se ata o se tamaitai i ni ona ofu e le talafeagai.

Na manatua e Tate lapataiga a lona Tama e uiga i nei ituaiga mekasini ma nei ituaiga ata. Masalo na togi e se tagata le mekasini i totonu o le kalone lapisi a o savali atu i lenei auala alo.

“Tate, e te manaomia se vai inu?” o le valaau lea a lona tina mai le faapaologa pito i tua o le fale.

Na faafuasei ona tatavale le fatu o Tate. Sa ia iloaina e tatau ona tuu ai pea le mekasini i le lapisi, ae peitai e le’i saunia o ia e aveese.

“O lea o le a ou alu atu, Tina,” o le tali leotele atu lea a Tate. Sa vave ona ia taaia le mekasini ma sulu i le pito i luga o lona ofuvae ma ufiufi i lona ofutino. Na ia sasaaina le vao ma toe savali atu i le faitotoa o le pa. Na tuuina atu e le Tina se ipu vai tipolo ia te ia.

“Faafetai Tina,” o lana tala lea.

“Faafetai ia te oe mo le moaina o le vao,” o le tali atu lea a Tina “Ua tatau ona e sau loa i le fale. O lena ua mu ou foliga i le la.” Ma liliu lava ma savali atu i le fale.

Na iloa e Tate, atonu na mu ona foliga ona o le fefe nei maua o ia. A o ia tuuina lana ipu ua leai se mea o i ai i le umukuka, na faafuasei ona savali mai Tama i totonu. Na oso Tate i le te’i.

“Ei, Tate! Ua uma ona moa le fanua?” o le fesili lea a Tama.

“I.”

“Ou te manaomia lau fesoasoani i le faiga o le taavale i le taimi nei,” o le tala lea a Tama. “E a lena?”

“Ua lelei,” o le tala lea a Tate. “o lea o le a ou alu atu.”

“Faafetai,” o le tala lea a Tama ma savali atu i fafo o le faitotoa.

“Oi sole! Toeitiiti lava a maua a’u,” o mafaufauga ia o Tate. Sa faanatinati atu o ia i lona potu moe ma tapuni mai le faitotoa i ona tua. Sa ia seiina i fafo le mekasini. Na tetete ona lima ao tau sue se mea e nana ai. O Tate e toalua ma lona uso laitiiti o Aleki i lo la potu, ma e lei manao o ia e maua e lona uso le mekasini. Na toso mai e Tate se nofoa i luma o le pusa tu. Sa ae i luga ma autilo i le fata pito i maualuga, ma iloa atu ai se pusa laumiumi sa masani ona i ai lana mea vaai. Sa ia momonoina le mekasini i totonu o le pusa laumiumi lea, ma toe tulei i le pito i tua o le fata. Na amata ona faalavelave se faalogona ia te ia, afai o loo taumafai e nana se mea, o loo ia faia se mea e le tatau ona faia. Na faate’a ese e Tate le lagona ma alu i fafo e fesoasoani i a Tama.

Na pisi tele Tate i le aso atoa ma taumafai ai o ia e faagalo le mekasini. Sa ia lagona le le fiafia faapea foi ma le le mautonu. I le Aso Sa, a o sauni o ia mo le lotu, sa atili faateleina lona le mautonu. Sa ia te ia se lagona pogisa sa le mafai ona ia aveesea.

“Aisea na ou taofia ai fua?” o ona mafaufauga ia. “Aisea na ou le tuua ai pea i le mea na i ai?”

I le Peraimeri, na talanoa ai le vasega a Tate e uiga i le faia o filifiliga sao ma, mo alii, o sauniuniga mo le perisitua. Sa mafaufau loloto Tate ao agai atu o ia i lona aiga. Ma tonu ai o le Aso Gafua pe a tuua le aoga o le a ia susunuina ai le mekasini. Na amata ona ia faalogoina ni lagona lelei.

Ina ua tuua mai le aoga a Tate i le Aso Gafua, sa ia faatopetope atu i lona potu. “O le vave ona ou faia o le mea lea, o le lelei foi lena!” o lona mafaufau lea. Ae ina ua pio atu i le tulimanu na toeitiiti lava a sulu i se faaputuga tusi i luga o le fola. Ma o le malosi o le manogi o le vali fou na oo ane ai ni manatu ia te ia.

Na faamatatasi atu Tate i lona potu ma ia iloa atu ai lona Tina o loo nofo i luga o lona moega. O mea uma e faaaoga i le vali na paepae i luga o se ie tele i luga o le fola. Ina ua vaai atu Tina ia Tate, na iloa lelei e Tate ua maua e lona tina le mekasini mataga.

Na amata ona tatavale le fatu o Tate. “O le a lau mea o loo fai i lou potu?” o lana fesili lea.

“Na ou manao e amata ona vali le potu, ma na ou maua se lagona malosi e tatau ona ou amata atu i le pusa tu,” o le tala lea a Tina. Na geno atu o ia i a Tate e nofo i ona tafatafa. Sa ia fusiina o ia e aunoa ma se upu mo ni nai sekone. “Na manao le Agaga Paia ina ia ou maua le mea na e nanaina i lau pusa tu.”

Na punou le ulu o Tate. Na fefe o ia po o le a se mafaufau o lona tina e uiga ia te ia. Na amata ona maligi ona loimata.

“O fea na e aumaia ai?” o le fesili faamaoni atu lea a le Tina.

“Sa i totonu o le kalone lapisi i le auala alo,” o lana tala lea. “I le aoauli o le Aso Toonai.”

“Na e tilotilo i ai?”

“Leai, Tina, ou te lei tilotilo i ai. I le Aso Sa, sa ou lagona lava e le sao. Sa tonu ia te au e susunu pea tuua mai nei le aoga.”

“Tate, ua ou fiafia lava i le faalogo atu [i lena tala]!” Sa tago atu Tina ma toso latalata atu o ia ma fusi o ia. “Sa ou popole lava ia te oe i lenei aso atoa. Sa popole foi le Tama Faalelagi ia te oe. E le’i finagalo o Ia e te tilotilo i na ata ponokarafi ona e tutupu ai mafaufauga leaga i lou mafaufau.”

“Faamalie atu Tina,” o le tala lea a Tate. Na ia lagonaina le maasiasi tele.

“Ua ou iloa, Tate. Sa ou mafaufau i lenei aso atoa i le matagofie o le meaalofa o le Agaga Paia ma le avea o ia ma leo o le latapaiga.”

Na fiafia Tate ona sa faalogo lona tina. Na ia tautino atu o le isi taimi o le a ia faalogo foi.

I le po lena ao tootuli Tate i tafatafa o lona moega, sa taai pea le manogi o le vali i le ea. Sa ia vaaia le manaia o lana pusa tu ina ua leai ni faailoga, maosiosia, ma ni tulagalima. E ui lava ina sa na o le faaiuga o se vaiaso na i ai le mekasini mataga i totonu o lana pusa tu, o na aso e lua na pei o ni aso pito uumi, ma pito eleelea o lona olaga. Ina ua amata le tatalo a Tate, na ia iloaina o le mea muamua lava o le a ia faafetai ai i le Tama Faalelagi, o lona tina.

“O le a puipuia i tatou e le Agaga Paia mai le faaseseina, ae ina ia iloaina lena faamanuiaga sili e tatau foi ona tatou faia pea mea e talafeagai ai ina ia faamautuina ai lena Agaga.”

Elder Dallin H. Oaks o le Korama a Aposetolo e Toasefululua, “Aua nei Faaseseina,” Liahona, Nov. 2004, 46.