Aoao Ina Ia I Ai Le Faamoemoe

O Sierra Leone o se nofoaga faanoanoa i le vaitaimi o lo’u talavou, ae o iina sa ou nofo ai. Mo le tele o lou olaga sa vaeluaina ai lou atunuu laitiiti i Aferika i Sisifo i se taua i le lotoifale. O le taua na afaina ai mea uma. O taimi uma na sosola ai le matou aiga, i le taumafai e sosola ese mai fitafita tetee. Sa matua taufaamatau taimi uma na oo mai ai fitafita tetee i se aai. A iloa atu e se tasi a latou moliuila ua latalata mai i le po, ona tau atu lea i isi ma matou taufetuli loa i le togavao, ma aofai atu soo se mea lava e mafai ona matou aveina.

E tusa ma le fitu tausaga talu ona amata le taua, ae oo mai le au tetee i le matou nuu. Na taufetuli solo lou aiga atoa ina ia sosola ese, ae o ou matua, lea sa na o ni nai sitepu na iai i ou tua, na tafanaina ma maliliu ai. Sa ou matua faanoanoa ina ua leai i laua, ae na tatau lava ona ou faaauau pea.

Na matou o atu ma lou tuagane, ma lou uso i se nofoaga saogalemu, ma sa lelei mea uma mo i matou i se taimi puupuu, ae na iu foi ina osofai e le au tetee lena aai. O le taimi la lenei, na leai se taimi matou te sosola ese ai. Na aveina lou tuagane ma mulimuli ane sa fasiotia ai. O maua ma lou uso na laina i fafo faatasi ma isi fafine uma. Na tatipi ese e fitafita tetee ia vae po o lima o fafine uma sa i le laina. Sa matuai o matou fefefe lava. Na fetagisi ma tatalo tagata uma—e oo lava i tagata na le talitonu muamua i le Atua. Sa le’i avea au ma se tagata o le Ekalesia i lea taimi, ae sa ou talitonu i le Atua ma sa ou tatalo ina ia faia Lona finagalo ma faamoemoe o le a Ia faia se auala e faasaoina ai au.

O lou uso pele, o le sa tu i se tulaga i luma atu o au, na tipiese uma ona vae e lua. Ae ina ua oo mai le au tetee i le fafine na i ou luma, na osofai malosi mai la matou fitafita ma na sosola ese ai le au tetee. Ou te iloa e le sili atu so’u lelei nai lo tagata na i ou luma po o ou tua foi, ae na ou faafetai i le Atua ona sa faasaoina au ma sa ou tatalo ina ia ou malamalama i Lana fuafuaga mo au.

Na ou alu i se isi nuu ma ou nofo ai faatasi ma sau uo. Ao ou faamatalaina atu lau tala i lau uo ma nisi o ona tuaoi, sa faapea mai se tasi o tuaoi, “Mariama, e leai se mea matou te ofoina atu ia te oe vagana ai o se valaaulia i le lotu a taeao. O iina matou te maua ai le saogalemu. O iina matou te maua ai le faamoemoe.” Na ou alofa lava i le Atua ma na ou manaomia le toafilemu i lou olaga, o lea sa ou filifili ai ou te alu.

O lou Aso Sa muamua i lena paranesi a le Au Paia o Aso e Gata Ai, o se aso o le a le mafai ona ou faagaloina. Sa ou aoao ai e uiga i le faamoemoe. E mafai lava ona e vaai atu na i ai le faamoemoe i na tagata, ma na ou tosina atu ia i latou. Na tuuina mai ia te au le Tusi a Mamona ma na amata ai lava ona ou faitauina i lena lava taimi. Ou te manatua na ou faalogo i le lotu e uiga i le mafai ona toe faatasia o aiga pe a mavae le oti ma faitau ai i le Alema e 11, lea o loo aoao mai ai Alema e uiga i le toe atoatoa lelei o o tatou tino i le Toetu. Na ou lagonaina le malosi o le Agaga ao ou mafaufau i lou aiga. Na ou iloaina e moni le Ekalesia ma e mafai ona tatou toe faatasi e faavavau—o i tatou uma taitoatasi, lelei ma atoatoa.

Sa leai ni faifeautalai i Sierra Leone i lea taimi, o lea na faia ai au lesona e lou peresitene o le paranesi ma na ou papatiso ma faamauina ai lava. Sa faamanuiaina i matou i lo matou nuu ona sa auina mai e le Ekalesia ni meaai ma ni afifi o fesoasoani mo tagata o le Ekalesia ma isi. O meaai na matou ola uma ai. Sa matua faafetai tagata uma i le mauaina e tusa lava po o se taga alaisa po o se taga pi laitiiti. Sa ou mauaina se palanikeke ma se afifi o mea e tausi ai le tino maloloina e i ai se pulumu fulunifo, kulimi fulunifo, fagu fasimoli e uu ai le ulu, fasimoli, o se selu ma se fasi solo taele.

E lei umi, ae toe osofai mai foi le au tetee. Sa latou susunuina le fale sa ou nofo ai, ma ao ou tamoe e sola ese mai le afi, sa ou maua le taimi e faasaoina ai na o ni mea se lua—o au tusitusiga paia ma lau afifi mo le tino maloloina. Sa matou ola i le o atu i lea nofoaga ma lea nofoaga mo sina taimi talu mai lena mea, ma sa ou faaaogaina lau afifi mo le tino maloloina e fesoasoani ai i isi na matou faatasi. Ou te faapasiina sina kulimi fulunifo laitiiti mo tagata taitasi, po o le matou o foi i le vaitafe ma faasolo ai ma le faaeteete lau fasimoli mai lea tagata i lea tagata. Sa matuai taua lava le afifi ia i matou. O le palanikeke foi ia sa le mafaatusalia lona taua. Sa faamalumaluina ai i matou mo le tele o aso seia oo ina ou faaaogaina e afifi ai se tina matua na maliu ae na leai se mea e afifi ai.

Mulimuli ane, na ou toe oo lava i lou nuu ma lau paranesi. O iina sa ou filifili ai ua ou manao e auauna i se misiona. O se filifiliga faigata lenei mo au ona sa leai ni au mea na i ai, ma o le a ou tuua foi tagata ou te alofa i ai. Ao ou taumafai e faia se filifiliga, sa ou faitau i le MFF 84:81 ma le 88, o loo faapea mai, “O lea, aua le popole ai outou mo a taeao, mo mea tou te aai ai, po o mea tou te inu ai, po o mea tou te oofu ai … aua ou te muamua atu i o outou luma. Ou te i ai foi i lo outou itu taumatau ma lo outou itu tauagavale, ao lou Agaga o le a i o outou loto, e siomia foi outou e au agelu, e lagolagoina outou.” Na ou iloaina o le a tausia au e le Alii, o lea sa ou tuuina atu ai loa au pepa o le misiona ma sa valaauina au i le Misiona i le Lotoa o le Malumalu i le Aai o Sate Leki.

Sa ou taunuu i Iuta e aunoa ma se mea, ae sa ou naunau lava e aumai lau afifi mo le tino maloloina ona e tele lava sona taua ia te au. I se tasi aso, sa ma aveina ai ma lau soa se maimoaga faataamilo i le Nofoaga Autu mo Fesoasoaniga Alofa i Sate Leki, ma sa ou matauina ai se palanikeke na i ai le faailoga a le Aualofa o loo suiina ai i luga, e pei lava o lau palanikeke na i ai i Sierra Leone. Sa ou tilotilo solo ma vaaia ai afifi mo le tino maloloina e pei o lau afifi ma taga foliga tutusa o fatupi ma alaisa, ma sa amata ona ou tagi.

“O iinei lea na avatu ai!” O ou mafaufauga ia ia te au lava. Na tafe ifo ou loimata i ou alafau ao ou manatuaina le uiga o nei mea o loo faaputuina i le Nofoaga Autu mo Fesoasoaniga Alofa ia i matou ma au uo i Sierra Leone. Sa ou matua faafetai i le Alii mo le faasaoina o au, mo le aumaia o le talalelei i lou olaga, ma le faatagaina o au e auauna ai i se misiona. Na ou iloaina na i ai moni Ana agelu na siomia ma siitia au