O Le Ma Faaipoipoga i le Malumalu Na Sili Atu le Aoga Nai Lo Soo se Tau

Ana le gau la’u pisinisi muamua ma mu e tau i le eleele la’u pisinisi lona lua, ou te le tomanatu pe mata e mafai ona ou aveina lau uo o Peni i le malumalu. Na ma faalogo o le oo i lea tulaga o se tofotofoina lea o le faatuatua, ae ina ua avea le faaipoipoga i le malumalu ma a maua lui, ma te le’i malamalama i le mae’ae’a o le a tofotofoina ai o ma faatuatua.

Na ma fetaui ma Peni i lo ma atunuu o Panama ina ua maea a ma misiona. I vaitaimi na, o ulugalii i Panama o e na mananao e amataina o latou olaga faaipoipoina i le malumalu, sa faaipoipo muamua faalemalo ao le’i malaga atu i le malumalu aupito lata ane, o le Malumalu o Guatemala City, Guatemala. O se malaga taugata ma faigata, ae peitai o le faamauina o se faamanuiaga ma te le’i mananao ma te ola e aunoa ma le mauaina.

O le aso na sosoo ma le aso na ou fesili ai i lau uo ma te faaipoipo, na faamalolo ai au ma lau galuega. E aunoa ma le faaalia o sou popole, sa ou manatu ai e sue sau tupe i le feaveaia lea ma faatafafao tagata i luga o pasi. Na pe lau pasi i le po muamua lava. I le popole ae sa ou naunau pea e taumafai, na sosoo ai ma le manatu ou te faatauina atu ni mitiafu. O le taeao na ou alu ai e aumai mitiafu mai le fale e gaosi ai, na ou iloa ai ua mu le fale e tau i le palaplala i le po ua tuana’i. Ma na foliga mai ua liu asu uma atu ai ma ou faamoemoega.

Na toe o ni nai masina ona oo lea i le isi malaga faatulagaina i le malumalu, ae e oo mai i le taimi lea, o au taumafaiga uma lava sa fai e saili ai se tupe na iu uma lava i le toilalo faafuasei. Sa ou tuua le nofoaga o le mu ae ou alu e sue Peni.

“Ua leai se mea o ia te au,” o lau tala atu lea ia te ia. “Masalo e le tatau ona e faaipoipo ia te au.”

Ae na ia faapea mai, “Ana fai ou te faaipoipo ona o tupe, semanu ua leva ona uma ona ou faaipoipo. Ae ou te le o faaipoipo mo ni tupe. Ou te faaipoipo ia te oe ona ou te alofa ia te oe.”

O le mea lena na suia ai ou lagona. Sa ma lagona na ma manumalo i se suega sili ona taua. A’o ma agai pea i luma ma le faatuatua, na amata ona matalatala mai faitotoa. Na maua la’u galuega o le fau meafale, e ui ina sa le lava le totogi mo mea na ma manaomia. Na ofo mai lea o se Epikopo agalelei e fesoasoani i o ma pasese i le pasi. E ui ina lagona le fiafia i lana ofo, ae sa le’i nofo lelei i lagona. Sa ma naunau lava ina ia ma faalagolago ia i maua lava. Ae ona o lona agaga fia fesoasoani moni ia i maua, na ma talosagaina ai pe mafai la ona ia faafaigaluegaina Peni. Sa ia taliaina.

Ina ua lava le tupe mo le malaga i le malumalu, o lea na ma faaipoipo ai loa faalemalo ma mulimuli ane ai malaga atu i Guatemala faatasi ma isi tagata o le Ekalesia e toa 10. Ae peitai sa le’i uma ai iina o ma tofotofoga.

O solo tetee a femalagaaiga lautele na taofia ai i matou i le tuaoi o Costa Rica. I le mavae ai o aso e lua o faatalitali i le tuaoi, na tonu ai i le matou avetaavale matou te toe foi. Ae o maua ma Peni, ma isi uso e toalua ma se tasi ulugalii, na matou filifili ia aua nei o matou faavaivai ai. Ina ua uma ona matou matamata atu i le liliu o le matou pasi ma tuua i matou, sa matou savavali atu loa i Costa Rica. Na faaauau ona matou savavali, ma momoe i faapaologa i tafa ala, seia oo ina matou taunuu i le tuaoi ma Nicaragua. O iina na mafai ai ona matou malaga atu i se taavale laitiiti i le taulaga, lea na faatau ai ni pepa mo le pasi e agai atu i le tuaoi o Hondura. E lua aso—ma isi pasi e lua—na iu ai ina matou taunuu i le malumalu. Sa matou fiafia, ae sa matou palapala ma lelavava, ma na tele le tupe na alu nai lo le mea na matou fuafuaina.

O le uma ai ona ma taeele, na ma iloa ai ma Peni e le o i ai a ma pepa faataga o le malumalu mo sauniga o tagata soifua! O le mea na sili ona leaga ai, o le aso tonu foi lea na fuafua e malaga ai lo ma epikopo i Panama i sana malaga faapisinisi. Sa ma lagona le lotonutimomoia. O lona uiga na ma asa mamao mai i le tele o faafitauli mo le leai o se mea? Na auli pea le ofu faaipoipo o Peni ma faalagolago atu i le Atua e faapea, afai na fesoasoani mai le Alii ina ia ma oo mai i lenei mea mamao, o le a Ia fesoasoani foi ina ia ma taunuu i le faaiuga.

E ui lava ina sa ma manatu ua malaga lo ma epikopo, ae sa ma filifili lava e telefoni pea i ai. Na ma tete’i ona sa le’i taunuu ona malaga o ia. Na ia saunoa mai, sa ia lagonaina e tatau ona nofo i le fale. Na matua faafiafiaina i maua! Na ia tautino mai o le a fesi mai pepa na manaomia i se taimi vave e maua ai se masini fesi.

Sa ma faatali ma faatali, i lea taimi atoa sa ma tatalo ai a o faatalitali i le potu e sauni ai faaipoipoga. O le Aso Toonai lea, ma na toe lua itula tapunia le malumalu seia oo i le Aso Gafua. Po o le a se mea ua umi ai? Mulimuli ane na taunuu ai le fesi, faatasi ma se faatoesega a le epikopo: na pe le paoa ao taumafai e lafo mai le fesi.

Mulimuli ane, i le mavae ai o o ma faigata uma ma faatuai, na faamauina ai loa i maua mo le faavavau o se tane ma se ava. O lo ma olioli—na talafeagai ai le galulue, o le faatalitali, ma le popole—na taumasuasua!

E le o tagata uma e faaipoipo i le malumalu o le a feagai ma luitau faapenei, ae mo maua ma Peni (ma isi na matou malaga faatasi i le malumalu), o nei aafiaga o ni faagasologa o le faamamaina. O le toatolu o uso e toafa lea na o i le malumalu i lena malaga, na valaauina mulimuli ane e avea ma ni epikopo. E toalua o loo galulue nei o ni fesoasoani i au peresitene o siteki. Na matua faamanuiaina i matou uma. O se tasi lea o aafiaga aupito maoae o lou olaga.

Ana fai o le ma sini e faaipoipo i le malumalu na faia ona o le alofa faalelalolagi, semanu e le mafai ona ma faataunuuina. Ae ona sa ma talitonu i le mana faamauina o le perisitua ua toefuataiina i o tatou aso, ma te le’i faavaivai ai, i le iloaina o le ma faaipoipoga i le malumalu—mo le taimi nei ma le faavavau atoa—na aoga ai soo se osigataulaga lava na tatau ona ma faia.