Na Mataveiliutaki Taumada kei na Kuoramu ni iApositolo Le Tinikarua era sa vakaraitaka vakaoqo: “Ni na qai laki kunei ga na bula marau ena veimatavuvale, ke yavutaki ena ivakavuvuli ni Turaga o Jisu Karisito. Ni yavu ni matavuvale vinaka, kei na bula veilomani vakaveiwatini na nodra vakavulici ena vakabauta, masumasu, veivutuni, veivosovosoti, veidokai, veilomani, yalololoma, gugumatua, kei na ivakasala vinaka me ra vakamarautaki kina.”¹

E ka talei, ni dina matata oqo e yavutaki ena ituvatuva ni bula marau nei Tamada Vakalomalagi, e dau kurabui kina o vuravura. Ia sa vakadikevi rawa ni o ira na itabagone ena taudaku ni Lotu era sa marautaka tiko na nodra bula vakayalo ena nodra veimaliwai kei ira na nodra matavuvale. Ena 2007 rau a vakatarogi ira na itabagone yabaki 12 ki na 24 e rua na kabani lelevu ni vakaraitaki ni itukutuku e Amerika me kila na veika e vakavuna na nodra bula marau.

Oqo eso na macala ni veivakatarogi o ya:

• O ira na itabagone “era vakanuinui tiko vei ira na itubutubu me ra taqomaki ka bula marau kina.”

• “Era na vakasaqara vagumatua na itabagone na marau ena veika vakayalo kei na vakabauta.”

• “Ena toso cake tikoga na nodra gadreva na itabagone mera umani tikoga ena ituvatuva ni matavuvale.”

• E tukuni mai na vakadidike o ya, “Keitou a dikeva rawa ni o ira na itabagone ena gauna oqo era muria cake vakalevu na ivalavala makawa ka sega o ira na itaba ena veigauna sa oti, keitou a kurabuitaka na nodra marautaka mera tuvanaka na nodra vakamau kei na nodra matavuvale.”²