Meu na Tiko Beka Evei?

Sa bau so beka na Sigatabu o bese ni laki lotu kina? Io, walega oqo. Au se qai toki oti ga i Cape Town ena Ceva kei Aferika. O ira na lewe ni tabanalevu era tamata vinaka ka dauveikauwaitaki. Ia era sega ni noqu itokani mai vale.

Ni oti ga e dua na macawa ena tabanalevu o ya au sa nanuma—meu sa gole walega ki na soqoni ni sakaramede. Au a bera ena macawa ka tarava. Niu sa yaco yani e katuba ni valenilotu, keimami a veikidavaki kau laki dabe sara. Niu sa dabe toka, au sa galili sara ga. Au sa via raica na noqu tabanalevu makawa, kei ira na noqu lewenilotu matadredredre era kilai au.

Sa tu cake sara e dua me imatai ni vosa. E vaka me sa vosa sara tikoga vei au. A tukuna na nona laki tu galili ena dua na siti vou, kau kila sara ni sega ni o au walega. A wasea na ikarua ni dauvunau e dua na itukutuku e vakaibalebale vakalevu vei au. Ni bera ni oti na soqoni, a tucake o bisopi ka tukuna mai ni lomani keimami sara vakayadua. A kaya ni kila tu eso era vakararavi tiko vua me qaravi ira ka lomani ira.

Niu sa lagata na sere ni suka, au sa qai kila ni oqo na vanua meu sa tiko kina. Sa dua na ka na vakacegu ni yaloqu, kau kila ni sa mai vua na Tamada Vakalomalagi. E kilai keda kei na noda gagadre yadua. A solia mai ena siga o ya na veika au gadreva, kau kila ni na vakayacora tikoga keu bulataka na Nona vunau.