Ena Vinaka Mai na Ka Kecega
iTukutuku buta katakata: Mai na walu na yabaki na nona tauvi kenisa o Sisita Coston, e a vakadikevi tale ena dua na gauna lekaleka sa oti, ka laurai ni sa sega ni kune vua na kenisa.
Sa tonawanawa mai na mataqu niu sa gole tiko meu laki vakadikevi e valenibula. Ena rua na yabaki sa oti au a laurai vakavuniwai ni sa tauvi au na kenisa ni oti na noqu vakasucu vei luvequ yalewa. Au sa sele oti ka qaravi vakavuniwai, ia me sa na laki kilai mai ke sa yaga na veiqaravi o ya. “Tamaqu Vakalomalagi, sa levu na ka au sa sotava ena ka oqo. Au kerea mo ni kauta laivi na veivakatovolei oqo. Au via susuga cake na luvequ yalewa kau via kaulotu vata kei watiqu ena dua na siga. Yalovinaka, ni vakabulai au.”
Sa tuturu na wai ni mataqu. Sa tekivu sara me sa qaqani sere na noqu masu “A Child’s Prayer.”1 (Na Masu ni Gone) Au sa vakauqeti sara meu vosa e cake.
Pray, he is there; (Masu, e tiko o koya)
Speak, he is list’ning.(Masu, sa rogoci iko tiko)
You are his child; (O iko na luvena
His love now surrounds you. (Sa solegi iko na nona loloma)
He hears your prayer .(E dau rogoca na nomu masu)
Sa sobuti au e dua na yalo loloma levu. Au vakila ni kilai au tiko na Tamada Vakalomalagi ka kauwaitaki au tiko ka a rogoci au. Au sa vakila ni sa na vinaka na veika kecega.
Au a taura na kena macala ena siga e tarava. Sa vakaraitaki mai ni sa sega na kenisa. Au vakila ni sa taluva mai vei au e dua na icolacola levu. Ia, ena siga ka tarava, a qiri mai o vuniwai ka vakamacalataka ni dina ga e savasava vinaka tu na macala o ya, e laurai ena dra ni se tiko kina vakalailai na kenisa. “E rawa vakacava o ya?” Au a taroga. Kevaka sa ikoya qo na ka dina, qai cava na vuna au sa kila kina ni sa sauma na noqu masu na Tamada Vakalomalagi?
Au sa tovolea meu kakua ni vakasamataka niu sa laki dikevi tale tiko. Sa vakaraitaki mai na veivakadidike oqo ni se tikoga vei au na kenisa ka sa tekivu me tete. Au sa wanono ena loma ni motoka ka vakasamataka na veika sa mai yaco vei au. Sa sega ni rawa meu cakitaka na ka au a vakila, ia au sa tekivu meu lomatarotarotaka na noqu nanuma o ya.
Sa veiulabaleti dina na macala vou ka bibi sara na veika ena yaco. Au nanuma ni levu sara na veika meu vulica mai na veivakatovolei oqo. Niu vakasamataka, au raica kina niu sa lako curuma tiko na bula ni dua na Yalododonu Edaidai gugumatua, ia au dau vakarairaitaka tu ga na noqu cakacaka ka sega ni yalodina kina. Au se bera ni yacova na ivakatagedegede ni bula vakayalo au gadreva tu. E gadrevi meu tekivu tale mada, kau sa tekivu vakayacora sara na veika meu volekati Jisu Karisito kina. Au sa gadreva na Nona veivakaukauwataki ena noqu bula vakatovolei oqo.
Niu saga me vinaka cake na noqu bula vakayalo, sa qaqaco cake kina na noqu vakabauti Jisu Karisito kei na Nona ituvatuva vei au. Au raica ni noqu gole tiko ki valenibula sa saumi mai kina na noqu masu. Niu sa kila ka ciqoma na kena isau (ni na vinaka na veika kecega ), au sa kila kina ni Tamada Vakalomalagi e sega ni dau vakamatailalaitaka mai na veika ena vakayacori. Ena sega beka ni vinaka na yagoqu taucoko, ia au sa tu vakarau meu ciqoma na Nona lewa. Sa tu ga e Ligana na noqu bula.
Sa oti oqo e vitu na yabaki na noqu tauvi kenisa. Au sa sele vakavica ka qaravi oti vakavuniwai, ia se tikoga vei au na kenisa. Ia, sa toso tikoga na bula, kau sa vakavinavinaka kina. Au sa sotava na veivakalougatataki mai na veika dredre o ya, sa sucu tale e dua na luvequ yalewa. Sa kena e bibi duadua, e vakaceguya na yaloqu na vosa ni Turaga “ena vinaka mai na ka kecega.”