ITUKUTUKU ME KILAI

E sa vakaraitaka raraba o Peresitedi Thomas S. Monson ni loma ni dua na vula mai oqo sa na tara tiko kina e tolu na valetabu vou e Arizona, Amerika. E se qai vakaraitaka walega oqo na parofita ena ika 24 ni Me, 2008, me sa na tara e dua na valetabu e Phoenix.

Ena ika 28 ni Epereli a vakaraitaka kina o koya me sa na tara na valetabu e Gilbert kei Gila Valley, e Arizona.

“E ka tawamudu na veivakalougatataki ni valetabu,” e kaya o Peresitedi Monson ena nona ivola vei ira na lewenilotu. “Era na vakila o ira era na curuma na vale vakalou oqo, na loloma ni Kalou vei ira na Luvena ka ra na kila vakavinaka cake sara na vanua era tadu mai kina ni ra sa Luvena tagane ka Luvena yalewa.”

Na valetabu vovou oqo, sa na laki lima taucoko kina na valetabu e Arizona, ka sa na qaravi rawa kina na levu ni cakacaka eratou sa vakaicolacolataki tiko kina na vo ni valetabu e Mesa kei Snowflake.

E a tara ena 1927, na Valetabu e Mesa Arizona ka lewe levu cake na kena lewenilotu mai na veivaletabu tale eso era tiko ena taudaku kei Utah, ka kaya na Tabana ni Valetabu ni Lotu ni qaravi tiko kina e 74 na iteki.

E se bera ni vakaraitaki na tikinisiga me sa na tara kina na tolu na valetabu oqo, me sa na 140 taucoko kina na levu ni valetabu e vuravura taucoko.

Ena macawa a vakatabui kina na valetabu e Curitiba Brazil, era a soqoni vata yani e udolu vakaudolu na lewenilotu ena veivanua eso mai na ceva kei na loma i Brazil me ra rogoci Peresitedi Thomas S. Monson.

E a sala vata kei koya o Elder Russell M. Nelson ena Kuoramu ni iApositolo Le Tinikarua kei Elder Charles Didier ena Vitusagavulu, ka a vakatabuya kina o Peresitedi Monson na valetabu ena va na s oqoni ena Sigatabu, 1 ni June, 2008.

Ni vo toka e dua na bogi, era a oso drigi yani e udolu vakaudolu na lewenilotu, ena dua na vale ni sarasara ni qito soka, ki na dua na veivakamarautaki ni itovo vakavanua ka a tiko kina na parofita.

Na valetabu e Curitiba sa ikalima tiko ni valetabu e Brazil, ka sa volekata na dua na milioni na kena lewenilotu. Ena kena a dolavi raraba era a sikova yani na valetabu e sivia e 42,000. Ena laki tara tiko ki Manaus na ika ono ni valetabu e Brazil.

Ena Moniti, na ika 2 ni June, a vuka yani ki Brasilia o Peresitedi Monson, ka laki sotavi Jose Alancar, na ivukevuke ni peresitedi ni vanua o Brazil. Erau a itokani voli i Peresitedi Monson o Elder Nelson kei Elder Didier, ka ratou a solia vei Mr. Alancar e dua na ivakatakarakara lailai ni dua na matavuvale kei na dua na ilavelave vakawaqataki ni “Na Matavuvale: Ai Vakaro ki Vuravura Raraba” (Liaona, Okot. 2004, 49).

Ni oti o ya, erau a veitomani yani o Elder Nelson kei Wendy, na marama watina vei Peresitedi Monson me vosa vei ira na 8,000 na lewenilotu ena dua na lotu vakamatavuvale ni veimataiteki.

Ni se qai oti toka ga e vica na siga na kena yanaraka na yasana o Sichuan e Jaina ena vula o Me na uneune, era a gole yani e lewe 600 na lewe ni Lotu mai Hong Kong ki na dua na vale ni caka iyaya e Shenzhen, Jaina, ka laki vakarautaka kina e 10,000 na ivakarau ni iyaya ni veivakacokotaki me baleti ira na vakaleqai.

Ena dua na ivakarau e tiko kina na bisikete, sucu mamaca, lewe ni manumanu tawai tini, nudeli (noodle), sovu, barasi ni bati kei na kena wainimate, tauwelu, kote ni uca, tutuvi, kei na wai ni gunu.

A vakayacora na veivuke oqo na Liga Loloma ni Yalododonu Edaidai (Latter-day Saint Charities), e dua na tabana ni veivuke raraba vakamatatamata ena Lotu, ka tiki tiko ni dua na veivueti e toso vinaka sara tiko ena gauna oqo me baleti ira na vakaleqai ena uneune. E a oka talega kina na kena vakarautaki e 5,000 na valelaca kei na 4,000 na imocemoce kei na kena ibe.

Me ikuri ni iyaya ni veivueti, a lolomataka na Liga Loloma ni Yalododonu Edaidai e dua na ilavo kivei ira na vakailesilesi vakamatanitu kei na Kauveilatai Damudamu e Shenzhen. Oqo na nodra cau vakailavo na lewe ni Lotu e Hong Kong kei vuravura taucoko.

A solia kina o Bruce Lai e dua na daunibisinisi e Hong Kong ka lewe ni Lotu me vakayagataki na nona vale ni caka iyaya e Shenzhen.

Sa veisoliyaka tiko na China Charity Federation na iyaya ni veivueti oqo ki na veitikotiko raraba ena veivanua vakaleqai.

E a laki sotavi ira na lewe ni Lotu o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada ka a vulagi dokai talega ,ena dua na ilakolako ki na vanua o Igiladi, Jamani, kei Varanise ena mua ni vula o Me kei na itekivu ni June ni 2008.

Ni vakamacalataka tiko na itukutuku makawa i Jamani kei Varanise, a kaya kina vei ira mai Parisi ka ra tiko ena soqoni e Versailles ni “dina ga ni rau a veivaluvaluti tu e liu na matanitu e rua oqo, eda sa mai itokani ka veiwekani vinaka sara. Sa tu na kaukauwa ena kosipeli i Jisu Karisito me veisautaki keda me da tamata vinaka cake sara, ka sa sega ni vakaduiduitaka e dua na matatamata se kedra ituvaki.”

A tomana: “Eda sa duavata, ka da sa veitacini ka veiganeni. Na kosipeli sa iwali ni veibolebole kei vuravura, vakatataro ni matavuvale, itikotiko raraba, kei na veimatanitu.”

A lewena na Lotu mai Jamani o Peresitedi Uchtdorf ni se gonetagane lailai. A digitaki me dua na Daunivakasala ena Mataveiliutaki Taumada ena Feperueri ni yabaki oqo.