Pagpangita og Bag-ong mga Higala

Pipila ka tuig human sa akong misyon, ako mibalhin ngadto sa usa ka siyudad diin ako walay kaila bisan kinsa. Miadto ako sa institute nagdahum nga makakita og bag-ong mga higala ug magsugod og pag-uban-uban sa laing mga young single adult diha sa dapit, sama sa akong gibuhat sa una.

Sa sinugdanan, hinoon, akong nakit-an nga lisud. Walay usa nga dili mabination, apan ingon og diyutay ra ang managad, ug usahay ako mobati nga mag-inusara ug layo niadtong kinsa managkaila na og maayo sa usag-usa. Sa bali, ako mas daling nakahimo og mga maayong higala gawas sa Simbahan.

Kini usahay ingon og ang dili pag-adto sa institute mas sayon kaysa pagtambong. Ako walay kasakyan, mao nga ako kinahanglang maglakaw o magbisikleta matag semana aron makaabut didto. Ako nakakita og maayong mga higala nga adunay susama nga mga hilig bisan asa. Gawas pa, ako nakahuman na sa institute.

Bisan pa niana, samtang ako naghunahuna kabahin niining tanang mga rason nga dili moadto, ako nakahinumdom unsa ka dako sa akong pagtubo sa miagi tungod sa mga leksyon nga akong nakat-unan ug mga higala nga akong nahimo sa institute. Ang institute miamuma sa akong pagpamatuod ug mitabang kanako nga mas makasabut sa plano sa Ginoo alang kanako. Mihukom ako nga mopadayon sa pagtambong, ug ako nalipay nga akong gihimo. Sa hinay-hinay nianang tuiga ako nakahimo og mga maayong higala sa institute. Nakadawat ako og mga pagdapit ngadto sa mga pagtipon-tipon ug sa nanglabay nga mga panahon nahimong mas naapil pag-ayo.

Lisud ang pagtambong og institute sa usa ka bag-o nga dapit sa sinugdanan, apan tungod kay ako nagpadayon man gihapon sa pagtambong, ako nakadawat og daghang mga espiritwal ug sosyal ng mga panalangin nga dili unta nako madawat kon ako wala pa nagpadayon.