Pasundayag sa Talento

S i Marie mitan-aw sa gawas sa bintana sa sakyanan samtang siya ug ang iyang klase sa Primary nagdagan paingon sa nursing home. Nanghinaut siya nga walay usa sa mga batang babaye ang nakamatikud sa mga luha nga mipuno sa iyang mga mata.

Sa diha nga si Sister Gibson misugyot sa pagpasundayag sa talento alang sa kalihokan nga adlaw, daw maayo kini nga ideya. Ang matag babaye milihok sa pagplano sa talento nga iyang ipakigbahin. Si Marie misulay, apan wala pa siya makahimo sa bisan unsang butang nga pagabuhaton.

Pipila ka mga babaye nagpatukar sa piano. Usa ka babaye nagpatukar og violin, ug ang usa nagkanta. Ang usa nagpabati sa balak nga iyang gisulat, ug ang labing suod nga higala ni Marie, si Shelley, mao ang mohimo sa pagbalitok. Si Andrea dili mopasundayag, apan siya naghimo og mga cookies alang sa tanan human sa pasundayag.

Sa pagsige og hunahuna ni Marie mahitungod sa pagpasundayag sa talento, mas labaw siya nga nagtuo nga siya walay bisag unsa nga mga talento. Wala gani siya makasiguro nganong miadto siya. Si Sister Gibson misulay sa paghimo kaniya nga mobati og labaw pa ka maayo, nagsulti kaniya nga wala pa niya madiskubre ang usa ka talagsaon nga talento nga gihatag kaniya sa Langitnong Amahan. Apan lisud kana alang kang Marie sa pagtuo. Wala siya maghunahuna nga maayo siya sa bisan unsa nga butang.

Ang pundokanan nga lawak sa nursing home hilum. Dihay tigulang nga mga tawo bisan asa, ug mao kana ang nakahimo ni Marie nga labaw pa nga gikuyawan. Wala siya makahibalo kon unsa ang iyang isulti ngadto kanila o unsaon sa paglihok. Ang ubang mga babaye daw mibati usab sa ingon. Nagpundok sila, maulawon nga nagtan-aw sa palibut hangtud nga gipakita kanila ni Sister Gibson asa molingkod.

Sa gihapon si Marie mibati og dili maayo samtang nagsugod na ang programa. Dayon, human gayud sa unang solo sa piano, nakadungog siya og usa ka tawo nga nag-ubo sa iyang luyo. Milingi si Marie ug nakita ang usa ka ubanon nga babaye kansang lawas natay-og sa matag ubo.

Si Marie mihunong sa paghunahuna sa iyang kaugalingon ug misugod sa pagkabalaka mahitungod sa babaye. Hilum siya nga mikuot og gahi nga karmelitos sa iyang bulsa ug miduol sa babaye. Iyang giagbay ang iyang kamot sa abaga sa babaye ug gitunol ang gamay nga gasa. Sa diha nga ang nangunot nga kamot midawat niini ug ang babaye mipahiyom kaniya, si Marie mibati og kalipay ug kalinaw.

Si Marie mitupad sa babaye hangtud nahuman ang programa. Gigunitan niya ang iyang kamot ug usahay mosulti kaniya kon unsa ang nahitabo. Nindot ang bation sa paghimo og usa ka butang alang sa laing tawo, ug kini makapugong kaniya nga mobati og kalooy alang sa iyang kaugalingon.

Sa diha nga panahon na sa pagbiya, ang babaye migakos ni Marie ug mihunghong, “Salamat kanimo sa pagpakigsulti kanako. Ikaw adunay tinuod nga talento sa paghimo sa mga tawo nga mobati nga gihigugma.”

Sa pagbalik paingon sa simbahan, si Marie mapasalamaton sa pagkasayud nga sa gihapon siya adunay usa ka talento. Sa diha nga miserbisyo siya sa uban, iyang gibati ang gugma sa Langitnong Amahan, ug mitabang siya sa uban nga mobati usab sa Iyang gugma. Kana ang usa ka maanindot ug espesyal nga talento nga naangkon.