Ingainga n Reirei

E karaurau Russell ni karini ana bentira uoua ao ana boki ae uarereke n ana baeki n reirei. E kaara irana ao n tuoa kunikaina ni kakoaua bwa a tara raoi. Imwin ingana ma tinana ni kabo, e biri nakon te kai ni bati. E namakina ae e na rebwetaua ngkana e aki waekoa n roko te bati. E rangi n ingainga ni moana ana reirei ngkai ai tibwa te moan tai.

Ni katoa ririki, e tataraia tarina ma mwaanena ake a ikawai Russell n rianna nakon te kai ni bati, n te tabo are a toka iaon te bati ibukin te reirei. E tangiria n toka n te bati ma ngaia. Ao riki, e tangiria n reiakini bwaai ake a karaoia. E tangiria n reiakin riki taekan mannin ngkoa ae bubura (dinosaurs). E tangiria n ataia bwa a kanga ni mwakuri turein. E tangiria n reiakina te wareware. E a tibwa ataia ae e nang tangira te reirei.

Ana tia reirei Russell, Mrs. Wilson, e ngare ngke e rin nako inanon te umanreirei. E kaotia nakon Russell ana taibora n reirei. E kaota naba te tabo are e na katinea iai ana baeki n reirei.

“Tao ti na reirei moa taekan mannin ngkoa ae takabubura,” e iangoia Russell.

“Karaki nakon te reirei,” e taku Mrs. Wilson. “Ti na ikikina ao n taekini tabeua taekara.”

E bura un Russell. “Aia ngaia, ti riai ni kinaira n tatabemanira nako,” e iangoia. “Tao ti na reirei taekan mannin ngkoa ae takabubura imwiina.”

Ngke e a roko ana tai Russell bwa e na kinaki, e taku, “Ngai Russell. I rangi n ingainga n reiakini bwai ni kabane—riki taekan turein ao manni ngkoa ae takabubura (dinosaurs).”

“E rangi tamaroa, Russell,” e taku Mrs. Wilson. E ngare Russell. E bon koaua bwa a na reiakina taekan turein ao mannin ngkoa ae takabubura (dinosaurs) rimwi.

Ma a bon aki. A kangi mwakerukeru ao a takakaro ma taian buraoki aika a mironron, turaiangkoro, ao tikuea.

“Mrs. Wilson, ningai ae ti na reiakina iai taekan manni ngkoa ae takabubura ao turein?” e titiraki Russell.

“Tiaki ngkai, Russell,” e taku. “Ngkai tain warekan te karaki.”

“Bon taekan mannin ngkoa ae takabubura (dinosaurs)?”

“Tiaki, Russell.”

Imwiin te karaki a reiakina taekan rinanin manin te taeka. Imwina ao ai tain te nako n te mweenga.

E a rangi n un Russell.

E buura unna nako tinanikun wintoon te bwati. E biri nakon mweengana man te kai ni bwati ao e takarua n rinnako n te mataroa. E kaea ana ruu ao e rabwuna atuna n te burangketi.

E rinnako tinana ao e katokaa baina iaon atuun Russell. “E uara am moan bong?” e titiraki.

“E buakaka. Akea te bwai ae N na reiakinna, ao N naki manga okiria. Ae ti karaoia n te bong aei bon te takakaro ma buraoki ao warekan taian karaki.”

“E uara, Russell, ai tibwa am moan bong,” e taku Tinana.

E tekateka Russell ao e tara Tinana. “I tangiria n reiakina taekan manin taai ake ngkoa aika bubura ao turein ao ni wareware—ngkai.”

E tekateka Tinana irarikin Russell iaon te kainiwene. “Ko aki kona n reiakini bwaai ni kabane n ti te taina. Te reirei e ana te tai. Ao e mwaiti are ko a tia n reiakinna ngkai, e na mwaiti riki are ko na kona n reiakinna rimwi.”

“Tera ae ko nanonna?” e titiraki Russell.

“E uara, ko na tangiria n reiakina rinanin mannin te taeka imwain ae ko na kona n reirei ni wareware. Ao ko tangiria n reiakina te wareware imwain ae ko na kona ni wareki taekan bwaai ae ko nano iai,”e taku.

E iangoia Russell. Tao e na iai bwaai tabeua n reiakini taekaia nakon ti manin taai ake ngkoa aika bubura ao turein. “E uara, Tao N na kata te reirei riki nakon te ingabong,” e taku.

E ngare nakoina tinana.

“Ma, Tinau, n am iango ti na kona ni karekea te boki man te tabo n tango boki ibukin manin taai ake ngkoa aika bubura?”

“I iangoia ni koaua bwa ti kona ni karaoa anne.”