E Ono Faapei [Au] Uo o Oe

Ou te faamemelo lava i taimi uma i suiga e faia e faataitaiga a lo’u uso i nisi o tamaiti o lana vasega. Na ala atu i a latou faauoga, ua avea ai i latou ma ni tagata lelei atu. Ona o ana faataitaiga, na ou iloa ai o le faaupuga, “Ia e faaeteete i tagata e te filifilia e avea ma au uo aua e mafai ona e avea faapei o i latou” o nisi taimi e mafai ona faauigaina, “Ia e faaeteete i tagata e te filifilia e avea ma au uo aua e mafai foi ona latou avea faapei o oe.”

I le taimi atoa o [o’u] aoga, o au uo tuai lava sa i ai. Ae i se tasi tausaga, na amata ai se tamaititi fou i le matou aoga, ma e le pei o a’u, sa lauiloa o ia. Ae na mafai lava ona avea a’u ma ana uo. I ni nai masina mulimuli ane, na amata ai ona ma vavalalata seia oo lava ina avea i maua ma uo mamae.

Sa fai ma a’u masani lo’u alu i le seminare i le taimi lava e tuua ai le aoga. I se tasi aso, na fesili mai ai o ia po o fea ou te alu i ai i aso uma. Sa tonu ia te au e faamatala atu i ai mea uma e uiga i le Ekalesia, ae o le vaaiga i ona foliga, na ou iloa ai e le o le auala sili lea e talanoa atu ai ia te ia. O lea na tuu ai loa lo’u talanoa atu ma le faatauanau.

I ni nai masina mulimuli ane, na o mai ai faifeautalai i le matou fale i le taimi lava lea na matou i ai ma nisi o a’u uo sa matou fai meaaoga faatasi. O se tasi o i latou ia o la’u uo lenei, o lea na ou talosagaina ai alii faifeautalai e talanoa laitiiti e uiga i le Ekalesia. Sa fiafia o ia i mea sa laua fai atu ai. Sa ia iloaina na i ai nisi o mea i lo’u olaga na eseese lava ma mea sa latou faia ma isi a matou uo, ma sa ia fia iloa pe aisea. Sa amata ona sau o ia i le lotu, Mutuale, ma le seminare, ma sa ia iloa ai, o a’u uo uma lava i le Ekalesia na pei lava o a’u, e tutusa lava aoaoga e faatauaina. E lei leva ae filifili loa o ia e papatiso.

I lona papatisoga, na talosagaina ai o ia e le epikopo e tuuina mai sana molimau. Sa tulai o ia ma fai mai: “Ua ou i ai iinei i le asō e faafetaia ai se uo ona o le ese o ia mai isi tagata. Ou te faamoemoe o le a iloa e tagata uma le eseesega o loo ia te outou uma foi.”

Ou te faamoemoe o le a tatou taumafai uma e faauo atu i isi, e tusa lava pe faapei o i tatou pe leai foi. Tatou te le iloa lava po o ai o le a mafai ona avea, e faapei o i tatou, o se tagata o le Ekalesia moni a le Alii.