O Le Ekalesia po o La’u Uo Teine?

O le 1962 na auai ai i le Ekalesia le tina o lo’u tina. Na papatisoina foi lana fanau, peitai i le aluga o le olaga na le toe malolosi uma ai i latou [i le Ekalesia]. I ni tausaga mulimuli ane, na malaga ese ai se tasi o i latou, o le uso o lo’u tina, mai Costa Rica i le Iunaite Setete ma toe toaga ai i le Ekalesia iina.

A o ou talavou, sa ou alu ai i le 1991 ou te asiasi i le uso o lo’u tina. A o o’u i ai iina sa ia faafeiloa’i atu au i faifeautalai faamisiona, ma sa matou feiloai ma i laua mo ni nai taimi i le fale o le uso o lo’u tina. Sa la fesili mai pe ou te fia iloa atili e uiga i le talalelei, peitai sa ou fai atu i ai, ou te le manao i ai.

Sa ou toe foi atu i lo’u aiga i Costa Rica, ae na asiasi atu foi faifeautalai ia te au iina. (Na ave i ai e le uso o lo’u tina lo’u tuatusi.) Ou te le’i fia faalogo lava i le la savali, o lea na ou fai ai i ai e o ese.

Na mavae tausaga e fa. Sa ma tafafao faamasani ma se tamaitai na tele ni tausaga o ma faauo, ma sa faasolo atu la ma mafutaga i le faamauga. A o ou manaunatu i lo ma lumanai, na liliu atu lo’u loto i mea faaleagaga, ma sa ou ta’u atu i la’u uo, na ou fia iloa le Atua. Sa tonu ia i ma’ua o le a ma o atu faatasi i le lotu e aoao ai e uiga ia te Ia. I le taimi lea, sa ou tatalo faalilolilo ai i le Atua mo avanoa ia ou iloa ai o Ia.

I lenei vaitaimi o sailiiliga, na toe tu’itu’i mai ai faifeautalai O Le Ekalesia a Iesu Keriso o le Au Paia o Aso e Gata Ai, i lo’u fale. I lo’u ita ona ua la toe o mai foi, na ou fai atu ai e o ese, ona ou tapunia lea o le faitotoa. Peitai, o le taimi lava lena, na oo mai ai se manatu ia te au: “Sa e tatalo e fia iloa le Atua. Ae a pe afai o loo i ai i nei alii ni tali mo oe?”

Sa ou toe tatalaina le faitotoa ma valaau atu i alii faifeautalai. Sa ou valaauliaina i laua e o mai i totonu ma aoao mai a’u.

Na vave ona ou iloa le mana o upu moni na la aoaoina mai, ma ou taliaina ai le talalelei toefuataiina. I le tolu vaiaso mulimuli ane, i le aso 12 o Mati, 1995, na papatisoina ai a’u i Le Ekalesia a Iesu Keriso o le Au Paia o Aso e Gata Ai.

Sa le fiafia la’u uo teine i la’u filifiliga. I se tasi po pe a ma le tolu masina mulimuli ane, sa ia fai mai ai e tatau ona ou filifili i le va o ia ma le Ekalesia. O se filifiliga na matua faigata! Ina ua mavae le tele o le mafaufau loloto ma manatunatuga, ona ou filifilia ai lea o le Ekalesia.

Na ou lagonaina ua ou faia le filifiliga sa’o, peitai o masina na sosoo ai ma le motusia o le ma mafutaga o se taimi pogisa lea i lo’u olaga. E ui lava i lea, na ou maua le faamoemoe i le ola i la’u ekalesia fou, ae maise o le iloa ai o lo’u Tama Faalelagi, pei ona sa ou tatalo ai ia ou iloa.

E tasi le tausaga talu ona mavae lo’u papatisoga, ae ou alu i se misiona talai i Nikarakua. Na ou maua le fiafiaga sili i lo’u galue ai iina, ma faateleina ai lou malamalama ma le alofa mo lo’u Tama Faalelagi. O ni nai masina mulimuli ane, ina ua ou foi mai i Nikarakua, sa ou feiloai ai ia Lili, le tamaitai o le a avea ma ou toalua i se taimi mulimuli ane.

E le o se mea faigofie i taimi uma le faamuamua o le talalelei i o tatou olaga. O filifiliga na ou faia o ni filifiliga faigata. Peitai na ou aoaoina i lena taimi—ma o loo faaauau pea ona ou aoao talu mai lena taimi—soo se taimi tatou te ositaulaga ai ia iloa le Tama Faalelagi, o le a Ia faaali mai Lona finagalo mo i tatou ma o tatou olaga. O le fiafia lea e oo mai i le mulimuli i Lana fuafuaga ma Ana poloaiga e matua taua ai lava taumafaiga uma.