Tei ô nei Matou no te hi‘o i te Hiero

I te hoê tau faatupuraa raau i te taime ohiparaa a ta‘u pupu ei rave ohipa i roto i te Hiero no Roto Miti, ua tae maira te hoê taure‘are‘a tamaroa e to’na mau hoa, mea papû maitai e, aita ratou i ahu i te ahu haereraa hiero.

« Tei ô nei matou no te hi‘o i te hiero », te parau ïa a te taua taure‘are‘a ra.

« E parau faati‘a no te hiero anei ta oe ? » Ta‘u ïa aniraa.

Ua feruri a‘era taua taure‘are‘a ra no te hoê taime. I muri iho ua parau maira, « E. E hoa Momoni to to‘u mama i Minnesota. Ua parau mai oia ia haere mai matou e hi‘o i te hiero ».

Ua faauruhia vau ia arata‘i i te mau taure‘are‘a i te hiti e ia paraparau ia ratou. O Lars te i‘oa o taua taure‘are‘a ra. Ua faataa atura vau ia’na e, e ere noa e, e nehenehe ta’na e haere mai i te hiero nei, ua hinaaro atoa râ te Metua i te Ao ra ia’na ia haere mai. Ua parau atura vau ia Lars e, ua titauhia ia’na ia faaineine na mua, e ua faataa atura vau e nahea.

I taua taime ra, ua haapa‘o mai au i roto i te Ekalesia no te tahi noa taime na mua’tu. Ua tavini au i te hoê misioni, tera râ, i muri a‘e, ua faaru‘e au i te Ekalesia na roto i te tomoraa i roto i te ohipa arearea e te raveraa i te raau taero e te ava. Ua feruri au e, e faahiahia to‘u utuafare i to‘u toro‘a e ta‘u faufaa moni, tera râ, aita to‘u mama i tau‘a noa a‘e i te reira. Ua tuu tamau râ oia i to‘u i‘oa i roto i te tapura pureraa o te hiero, tei faatupu i te riri i roto ia‘u.

Te vahine ta‘u i faaipoipo ua faaru‘e atoa i te Ekalesia. I te taime a haamata ai ta maua tamahine o Tori, e va‘u matahiti, i te uiui i te uiraa no ni‘a ia Iesu Mesia, tei rapae au roa maua i te pae varua. Noa’tu te ohipa misionare ta‘u i rave, aita roa e ti‘a ia‘u ia haamana‘o i te hoê mea no ni‘a i te Faaora.

« Te vai ra te mau taata o te ti‘a ia haapii ia oe i te parau no Iesu », ta‘u ïa parau ia Tori. « Eita ta oe e nehenehe e haere e paraparau ia ratou ? »

Tau mahana i muri iho, ua patoto maira e piti tuahine misionare i ni‘a i to matou uputa fare. Ua faatomo maira o Tori ia raua e ua haamata a‘era i te faaroo i te mau haapiiraa. Ua faaroo huna noa vau i roto i te piha i ô mai, e ua faaroo vau i na tuahine i te haapiiraa i te mau parau haapiiraa ta‘u i farii e parau mau.

« E hinaaro anei oe ia bapetizohia oe ? » te aniraa ïa a na tuahine ia Tori i muri a‘e i te toru o te aparauraa.

Ua pahono atura oia e, « E »

« E bapetizo anei to oe papa ia oe ? »

Aita vau i haere i te pureraa a 20 matahiti i teie nei, ua ite râ vau e, e taui to‘u oraraa. Ua amui atu vau i roto i te aparauraa hopea, ua haamata matou i te haere i te pureraa, e ua farerei maua o ta‘u vahine i te episekopo. I to‘u tatarahaparaa, ua faaoti au e, e mea ti‘a ia‘u ia imi i te mau rave‘a atoa no te faaho‘i i tera rahiraa matahiti mau‘a. Ua taui au i te ohipa, ua haapa‘o i to‘u mau piiraa i roto i te Ekalesia, ua taatihia vau i ta‘u vahine e i ta‘u tamahine, e ua riro mai ei rave ohipa i te hiero. E mea na reira to‘u iteraa e, e nehenehe te hoê pŭpŭ feia apî huru ê ia ti‘amâ no te haere i te hiero.

I te pu‘e tau faatupuraa raau, ua papa‘i mai o Lars i te hoê rata ia‘u, ma te haamauruuru mai ia‘u no te faaiteraa ia’na i te auraa mau o te parau faati‘a no te hiero. « Ua rahi atu â to‘u ite no ni‘a i te hoê parau faati‘a no te hiero », ta’na ïa papa’îraa. « Ua bapetizohia vau e ua farii au i te hoê parau faati‘a na‘u iho i te ava‘e tenuare i ma‘iri a‘e nei! » E î to‘u na mata i te roimata ia hi‘o ana‘e au i to’na hoho‘a i roto i te ahu bapetizoraa e te mau misionare tei haapii ia’na.

E mea faahiahia mau ia ho‘i faahou i te hiero, e ia ite ana‘e au i te tere o Lars, ua riro ïa ei haamaitairaa nehenehe o te faahaamana‘o mai ia‘u e, e ti‘a ia tatou paatoa ia haaputapû maitai i te oraraa.