E Horo‘a te mau Hiero no ô mai i te Metua i te Ao ra

Tau matahiti i ma‘iri a‘e nei, ua titauhia vau ia haere i roto i te hoê amuiraa tĭtĭ i Californie. I roto i te manureva no te ho‘i mai i Utaha, ua parahi mai te hoê vahine maitai roa i piha‘i iho ia‘u, tei roto oia i te area matahiti e hitu ahuru. O Patti to’na i‘oa, e e mea au roa na’na ia paraparau.

Ua faaite maira o Patti i te parau no to’na utuafare – ta’na tane e ta’na tamaiti tei pohe. E ua paraparau noa maua e, e tae roa’tu i te taime ua fatata matou i te tapae matou. Na ô atura vau e, « E Patti, ua paraparau noa oe fatata te taato‘araa o te tere. Hou a tapae ai tatou i Salt Lake City, te hinaaro nei au e ui ia oe i te tahi mau uiraa ».

Ua ui papû atura vau ia’na e, « E Patti, ua ite anei oe e, e ite faahou oe i ta oe tane tei pohe ? »

Ua parau maira oie e, « Oh, e ti‘a anei te reira ? »

I muri iho ua ui atura vau e, « Ua ite anei oe e, e ite faahou oe i ta oe tamaiti i pohe, o Matt, tei pohe ei aiu ? »

Ua papepapehia a‘e ra to’na na mata, e ua ruru to’na reo. Ua haaputapû te Varua o te Fatu ia’na. Ua mihi roa oia ia ratou .

Ma te aau pure, ua ui atura vau ia’na e, « E Patti, ua ite anei oe e, te vai ra to oe hoê Metua i te Ao ra here e te maitai, tei here roa ia oe ? »

Ua parau maira oia e, « Te vai ra ? »

Ua ui atura vau e, « Patti, ua ite anei oe e, te vai ra ta to oe Metua i te Ao ra hoê faanahonahoraa taa ê no oe e e nehenehe to oe utuafare ia riro ei utuafare mure ore ? »

« Parau mau ? » ta’na ïa pahonoraa.

« Ua faaroo a‘e nei oe i teie faanahonahoraa na mua a‘e nei ? » Ta‘u ïa uiraa.

Ua parau maira oia e, « Aita ».

Ua ui papû atu ra vau ia’na e, « E hinaaro anei oe ia ite i te reira ? »

« ’E, e hinaaro vau », ta’na ïa pahonoraa.

Ua haaputapû hohonu te Varua o te Fatu ia’na.

Ua haapii te mau misionare ia Patti. E toru hepetoma i muri iho, a noho ai oia i Utaha, ua niuniu mai o Patti ia‘u: « E te Taea‘e Kikuchi, o Patti teie. E bapetizohia ra vau. E nehenehe anei ta oe e haere mai i to‘u bapetizoraa ? »

Ua haere maua o ta‘u vahine i to’na bapetizoraa. E rave rahi melo tei farii poupou maitai ia’na. Eita e mo‘ehia ia‘u to’na mata oaoa i to’na ti‘araa mai roto mai i te pape!

Eita roa’tu e mo‘ehia ia‘u te mau roimata oaoa i mua i te fata mo‘a o te Hiero o Salt Lake hoê matahiti i muri mai. Te haamana‘o nei au i to’na hau e to’na huru

Ua itehia i to‘u hoa o Patti te Fatu o Iesu Mesia. Na roto i te taatiraa i te hiero, ua ite oia i teie nei e, e vai to’na utuafare e a muri noa’tu i roto i te Fatu.