Ko ni sa Kacivi na iTabatamata Tubucake Tiko Mai

Ni sa voleka ni cava na veiqaravi ni iVakabula e vuravura, a rairai o Koya ni sa tucake tale vei iratou na Nona iApositolo. A solia vei iratou e dua na ilesilesi me vaka na kena oqo sa mai solia o Koya vei kemuni na itabatamata tubucake tiko mai nikua: “O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena kei na Yalo Tabu” (Maciu 28:19).

Ena ika 6 ni Epereli, 1974, a tokoni Peresitedi Spencer W. Kimball kina na Lotu me dua na parofita vou. Ena siga vata ga o ya au a kacivi kina meu laki kaulotu ki Finiladi. Au a sega ni kila ni a se qai vakasala walega kina vakabibi o Peresitedi Kimball vei ira na Vakaitutu Raraba kei ira na mata ni iwasewase levu ni Lotu. E muri au a qai kila ni a veidusimaki kina vakaparofita o Peresitedi Kimball me baleta na nona raivotu ena kena gadrevi na lotu me vakayacora na ilesilesi mai vua na iVakabula o ya me ra “vakalotutaki na lewe ni veivanua kecega.” Ena nona vosa, a veisureti tiko kina o Peresitedi Kimball vei ira na lewe ni Lotu me ra kalawa yani vakabalavu ka vakarabailevutaka na nodra rai. A kerei ira yadua na cauravou bula kilikili me ra vakavakarau ka laki daukaulotu tudei. A vakayaloqaqataki ira na lewenilotu ena veimatanitu yadudua me ra vakarautaki ira na nodra daukaulotu, ka kacivi ira na “uabula kaukauwa me ra vukei ira na [iApositolo] Le Tinikarua me ra gole yani ki vuravura taucoko ka laki dolava na veikatuba ni veimatanitu kecega” (“When the World Will Be Converted,” Ensign, Okot. 1974, 10).

A kaya talega o Peresitedi Kimball ena nona vosa ena 1974 ni sa yacova na 3.3 milioni na lewe ni Lotu, 18,600 na daukaulotu tudei ka 633 na iteki. A bolei keda o koya meda vinaka cake sara ka kerei keda meda veisautaka na noda rai ka vakatorocaketaka na noda raivotu (raica Ensign, Okot. 1974, 7–8).

Ena kena vakayacori, eda sa tekivu na lewe ni Lotu meda masu ena noda veimatavuvale, ena noda soqoni ni sakaramade, kei na gauna ni noda koniferedi ni iteki, o ya me vakamalumalumutaki na yalodra na iliuliu ni veimatanitu ka dolavi na katuba vei ira na daukaulotu. Sa tekivu me ra raica vakavinaka cake na nodra ilesilesi na lewenilotu me ra wasea yani na kosipeli. Era sa bole mai na cauravou ka sokumuni e dua na mataivalu levu ni daukaulotu. Eda sa vakadinadinataka na kena sa cereki na raivotu nei Peresitedi Kimball.

Niu kaulotu tiko e Finiladi, au kila sara ni o Sisita Lea Mahoney na wati Peresitedi ni Kaulotu, e marama dina ni Finiladi. Ni se goneyalewa lailai a susugi voli ena tokalau kei Finiladi ena siti o Viipuri. Ena kena a ravuti ena ivalu na vanua o Finiladi kei na veimatanitu tale eso ena iKarua ni iValu Levu, a biuta mai o koya kei na nona matavuvale na nodratou itikotiko, ka yaco o Viipuri me qali ki Rusia ka vakayacani vou me ko Vyborg. Ena neimami koniferedi vakaiwasewase, e dau talanoataka vei kemami o Sisita Mahoney o ira na lewenivanua era a biu tu yani e Viipuri ka dau gadreva tu o koya me kau vei ira na kosipeli. Ni oti na bolebole nei Peresitedi Kimball, keimami a duavata ena masumasu me vakamalumalumutaki na yalodra na iliuliu ni matanitu o ya me rawa kivei ira neimami daukaulotu me ra kauta na kosipeli ki Rusia.

Keimami dau gole yani ki na iyalayala ni vanua o Finiladi kei Rusia ka raica cake na valecere ni yadra kei na bai, ka vakataroga se o cei beka na cauravou kei na goneyalewa yaloqaqa era na takosova na iyalayala ni vanua me kau yani na kosipeli vei ira na lewenivanua e kea. Au vakadeitaka, ni gauna o ya sa vaka me bau dua dina na cakacaka dredre.

Tolu na yabaki sa oti, a kacivi o Eric na luvei keirau me laki kaulotu ki Rusia ena Tabana ni Kaulotu na St. Petersburg. A qai volavola lesu mai ka tukuna toka mai vakaoqo, “Ta kei Na, au sa mai lesi oqo ki na imatai ni noqu siti e Rusia. Ta, au kila ni ko sa rogoca oti. Oqo o Vyborg, ia oqo ga o Viipuri na siti makawa kei Finiladi”

A tonawanawa na mataqu niu kila vinaka ni sa tu o Eric ena siti sara ga keimami a dau masulaka ena 32 na yabaki yani e liu. Sa laki raica sara e kea o Eric e dua na valenilotu kei na dua na tabana ni Yalododonu yalodina. Sa laki bula voli ka kaulotu sara tikoga ena dua na vanua a dredre vei au meu curuma niu a se cauravou.

Au a sega ni kila ena vuqa na yabaki sa oti o ya, ena neimami a masumasu me dolavi na iyalayala ni vanua vei ira na daukaulotu me ra gole ki loma niu sa masulaki luvequ tiko kina. E ka bibi duadua, vei kemuni na itabatamata tubucake tiko mai, ni o Eric na luvei keirau a sega ni kila ni o koya kei nona itokani rau a isau ni masu ka ra a cabora e udolu na Yalododonu yalodina ena vuqa na yabaki sa oti. Oi kemuni na itabatamata tubucake tiko mai sa ikemuni na parofisai sa mai vakavotukanataki ni noda gauna edaidai, “ na dina ni Kalou ena lako yani ena doudou, vakaturaga, ka tu vakaikoya, me yacova ni sa curu basikata yani na veiyasana yadudua, sikova na veivanua, curuma yani na veimatanitu, ka rogovaki ena veidaliga yadua, me yacova ni sa vakacavari na veinaki ni Kalou ka na kaya ko Jiova sa Cecere ni sa qaravi oti na cakacaka” (Josefa Simici, ena History of the Church, 4:540).

Mai na gauna a veivakasalataki kina vakaparofita o Peresitedi Kimball ena 35 na yabaki sa oti, sa mai yacova sara na iwiliwili ni lewe ni Lotu na 13.5 na milioni, ka sa 52,000 na daukaulotu ka sivia na 2,800 na iTeki kei Saioni. O cei beka era a cakacaka ena taba ni were era sa mai vukea na kena vakavotukanataki na cakacaka cecere ka veivakurabuitaki oqo? Sai ira ga na parofita kei na iapositolo era sa mai dabe toka oqo nikua. Sai ira talega na peresitedi ni iteki kei ira na bisopi era veiqaravi sara ena yalodina. Ia sai ira talega na nomuni itubutubu—o ira na tina kei na tama—nei kei momo, kei ira na tacida kei na ganeda era dabe tiko e yasamuni, na itabatamata tubucake tiko mai nikua. E ka bibi duadua, o ya, sa ikoya ni gauna eda saga kina me kau na kosipeli ki na veimatanitu kecega, eda sa na qai vakataucokotaka kina na cakacaka oqo.

Sa mai vakadewataki kina oqo na ilesilesi kivei ira e dua na itabatamata vou. Sa mai lesia vou tale kina na iVakabula vua na Nona parofita edaidai, o Peresitedi Thomas S. Monson, a vakavouya na veikacivi ena nona kaya:

“Na noda usutu ni ivakavuvuli oqo sa mai kaya na noda Turaga ka noda iVakabula, o koya sa liutaka tiko na mataivalu cecere ni daukaulotu e vuravura raraba. Ni oti na Nona Tucaketale, a rairai vei iratou na Nona tisaipeli e lewe 11. A rawa me solia e dua ga vei ira na ivakasala, dua na ivakamacala, se veivunauci e vinakata me solia. Ia na cava a qai tukuna o Koya? E volai tiko ena Maciu 28:18–20. A kaya kina vakaoqo: …

“‘O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu:

“‘Vakavulici ira me ra vakabauta na ka kece kau a vosa kina vei kemudou: ka mo dou kila, au sa tiko vata kei kemudou ena veisiga kecega, ka yacova nai vakataotioti kei vuravura.’ ”

A tomana tale o Peresitedi Monson:

“Sa dua na yalayala taleitaki! Kevaka me da vakayacora sara na veikacivi vakalou o ya, na kaukauwa ni veivauci o ya, ‘Au na tiko vata kei kemudou ena veisiga kecega, ka yacova na ivakataotioti kei vuravura.’ Au sega ni vakasamataka rawa tale e dua na yalayala e cecere cake” (“The Five M’s of Missionary Work,” (New Era, Maji. 2007, 42).

Ena iVola i Momani, a cavuqaqataki Sinosi, o Jekope, ena nona kaya noda cakacaka edaidai ena vosa vakatautauvata ni vu ni olive dina kei na veiolive ni veikau:

“Ia mo lako ka kacivi ira mai na tamata me da mai cakacaka vagumatua ena were ni vaini, ka me da caramaka na sala meu rawata tale kina na vuana dina o koya sa vinaka ka talei duadua vei ira na vuanikau kecega.

“O koya me da ia ka cakacaka vagumatua, ni oqo sa i otioti ni gauna ka sa voleka na

ivakataotioti ni gauna meu samaka kina na noqu were ni vaini“ (Jekope 5: 61–62).

Na veikacivi ni iVakabula oqo kivei kemuni na itabatamata tubucake tiko mai. Sa sureti ira tiko na cauravou kei na goneyalewa bula kilikili, sa tu vakarau, ka yalodina me ra vakaio ki na vosa ni parofita; ka me ra tu mai ka kaya, me vaka ga a kaya Vakaikoya na iVakabula, “Koi au oqo, talai au” (Eparaama 3:27). Sa vakaitamera sara na kena gadrevi oqo. Sa matua sara na were. Ko ni sa kacivi mo ni lako “ena iotioti ni gauna oqo” (Jekope 5.62). Sa sega tale ni dua na cakacaka e cecere cake; sa sega tale ni dua na veikacivi e cecere cake mai na nomuni vakalotutaki “ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu” (Maciu 28:19).

Au sa kaya vakaidina ka vakadinadinataka ni sa dola tu ko lomalagi, ni sega walega ni sa vosa oti na Kalou, ia sa vosa tiko mai edaidai. E bula tiko na Luvena, o Jisu Karisito, ka sureti kemuni tiko, me vaka ga a sureti ira na Nona iApositolo e liu, o Pita kei Adriu, “Drau muri au mai, kau na qisi kemudrau mo drau gonedau ni tamata” (Maciu 4:19). Mo ni vakaio vakataki rau, ena nomuni biuta na nomuni lawa ka muri Koya.

Sa noqu masu oi kemuni na itabatamata tubucake tiko mai oqo mo ni tutaka na dina kei na ivalavala dodonu ka kila vakavinaka ni sa vakalou na nomuni kacivi mo ni lako yani ka vakalotutaki ira na lewe ni veivanua kecega, ena yaca i Jisu Karisito, emeni.