Aoaoina Atu o Lo’u Faiaoga

I le vaitau o le tautoulu i le tele o tausaga ua mavae sa avea au o se teine aoga faatoa faauu mai le Iunivesite o Columbia i le Aai o Niu Ioka. I se potuaoga tele e tumu i tamaiti aoga, sa talanoaina e la matou polofesa faataitaiga faanei ona po o anotusi anamua. Ao ia tolaulauina mai le lisi o mea le moni, sa ou tei i le faalogo atu ia te ia o faaopoopo i ai i lana lisi le Tusi a Mamona.

Sa ou iloa i lena lava taimi e le mafai ona ou tuua le potuaoga e aunoa ma le faia o se mea. E le mafai ona ou tuuina i lalo o’u augatama, o a latou molimau i le Tusi a Mamona na taitaiina atu ai i latou e ositaulagaina mea uma.

Ina ua maea le vasega sa ou faalatalata atu i le polofesa, o lē sa umiaina le tulaga faafaiaoga sa faaigoa ia Charles Anthon i Columbia. E silia ma le 100 tausaga ua mavae, na sau ai Matini Harisi e asiasi i le Polofesa o Anthon i Columbia. Na aumaia e Matini se pepa na i ai togitogiga lea na kopi mai papatusi na faaliliuina mai ai le Tusi a Mamona.

Na ou manatuaina le faasoa mai e lo’u tama ia te au o se tusi na tusia e lona tama e uiga ia Matini Harisi. Na faamatala mai e lo’u tama matua sa vaai ia Matini i se taimi e lei umi ae maliu loa Tuagane Harisi. Ina ua fesili atu lo’u tama matua ia te ia e uiga i le Tusi a Mamona, sa nofo i luga Matini mai lona moega ma tuuina mai se molimau malosi. Na ia vaai moni lava i se agelu, na ia faalogoina lona leo, ma na ia vaai i papatusi auro.

“O lo’u igoa o Tiana, ma o au o se tagata O Le Ekalesia a Iesu Keriso o le Au Paia o Aso e Gata Ai,” sa ou fai atu ai ma le tete tele i lo’u polofesa. “Mo au, o le Tusi a Mamona o se tusi o tusitusiga paia. Ou te fia faalogo i mafuaaga ua e ta’ua ai o se mea pepelo.”

A o ma savavali i le lotoa o le aoga, na lisiina e le polofesa, lea sa faitauina le Tusi a Mamona le tele o feteenaiga i lona sa’o. Sa faatopetope ona ou tusia i lalo, ma ina ua mae’a, sa ou fesili atu ia te ia, “E mafai ona ou tusia mea sa ou aoaoina mai sosia o na autu e tali atu ai i nei feteenaiga?” Sa ioe o ia.

Sa ou toe savali i le mea o i ai potu o loo nonofo ai tamaiti aoga, tapuni le faitotoa o lo’u potu, tootuli i le tatalo, ma amata ona [ou] tagi. Sa ou lagona le vaivai ma le le atoatoa. O le mea e lelei ai, sa fai se matou gaoioiga faale-Ekalesia i lena po. Ina ua mae’a se talanoaga lea na ou lagona ai le fiafia, sa ou talosaga atu mo se fesoasoani mai faifeautalai, ia sa auai. Sa latou faasoa mai nisi o faapogai o faamatalaga lea na aofia i le tele o manatu na laga mai e lo’u polofesa. Ona ou sailiili lea i le faletusi tele o le Iunivesite o Columbia. Sa ou tali atu i fesili a le polofesa i la’u pepa ma tuuina atu i ai la’u molimau i le moni o le Tusi a Mamona. Ona ou tuuina atu ai lea ia te ia.

Sa ou faatali mo ni nai vaiaso mo lana tali mai. Mulimuli ane sa ou fesili atu ia te ia pe sa ia faitauina.

“Ioe, ma sa ou tuuina atu i lo’u toalua e faitau ai. Sa ia ta’u mai, ‘Po o le a lava la’u mea e fai, aua e te faatama’iaina le faatuatua o lena teine aoga.‘“Sa liliu o ia ma savali ese atu.

Ina ua lata mai le Kerisimasi, sa malosi lava le uunaiga o au e tuuina atu ia te ia se kopi o le Tusi a Mamona. Sa ou mauaina se kopi, faaopoopo i ai la’u molimau, ma faafetai atu ia te ia mo le faitauina o la’u pepa. Sa ou tago loa ma afifi le tusi i le pepa Kerisimasi ma tuu atu ia te ia. I sina taimi mulimuli ane, sa ou mauaina ai se tusi na tusilimaina mai ia te ia [polofesa] lea sa ia faaalia mai ai le loto faafetai mo le mauaina o se kopi o “lenei tusi maoae”.

Ina ua ou faitauina ana upu, sa futumulia ou mata i loimata. Sa musumusu mai le Agaga o le a le toe tuuina i luga e lenei polofesa le Tusi a Mamona ia ulagia. Sa ou faafetai aua na faamaluluina e le Agaga loto ma fesoasoani mai ia te au ia iloa le auala e aoao atu ai lo’u faiaoga.