“E le auai o’u matua i le Ekalesia. E mafai faapefea ona ou fetufaai atu le talalelei ia i laua e aunoa ma lo la feitai ai?”

Ae ou te lei papatiso i le 2006, sa ou auai atu i se isi lotu lea sa lolotu ai lo’u aiga. I le taimi muamua lava sa ou fefe ai e talanoa atu i lo’u aiga e uiga i le Ekalesia ona o le fefe i le teena o au. Ae ina ua amata ona ou faapipiina Pepa Lautele o I Ai Se Savali mai Liahona i nisi o vaega o lo matou fale, na amata ona fesili tagata o le aiga, “O le a le uiga o lenei ata? O le a lona uiga?” O nei fesili na faafaigofie ai ona talanoa atu e uiga i mea o loo ofoina mai e le Ekalesia i aiga. O lenei auala, sa iu ina papatiso ai lo’u tuafafine laitiiti, ma i le taimi nei, ao ou i ai i la’u misiona, na tusi mai ia te au o’u matua ma ta’u mai lo la fiafia e o i le lotu.

Faailoa atu i ou matua i le ala o loo e ola ai le taua o le Ekalesia ia te oe ma le eseesega matagofie ua na faia i lou olaga. Ina ia fesoasoani ia te oe ia faia lena mea, e tatau ona e mulimuli i fautuaga a le Au Pulega Aoao, e aofia ai le ola ai i le talalalei. Ia faia pea e le aunoa au lava tatalo, faitauina o tusitusiga paia, auai i le lotu, tausia o poloaiga, ola ai i tulaga faatonuina o i le Mo Le Malosi o le Autalavou, galue ia ausia sini, ma mulimuli i le Agaga Paia. E mafai foi ona e tatalo ma anapogi mo ou matua ma aioi atu i le Agaga e taitaia oe. E le gata i lea, ou te talitonu e tatau ona e faailoa atu lou alofa mo i la’ua.

E le o se tagata lotu lo’u tama, ma sa faigata i nisi o taimi lenei mea, peitai e i ai ni nai mea sa ou aoaoina. Muamua, pe a ou talanoa atu ia te ia ma le alofa ae le o le le faaaloalo, e faigata ona ia teena mea o loo ou fai atu ai. E mafai ona lagona e lo’u tama lena alofa, e ui lava o le tele o taimi e le tutusa mea ma te ioe i ai. Lona lua, o le talalelei e faigofie. E le o sa tatou le faaufiufi o le mea moni po o suiga. Faamatala atu upumoni faigofie. Ma le mulimuli, ia manatua ua tofia i tatou ia avea ma molimau a Keriso.

Ou te tatalo ma aioi atu i le Atua o le a Ia tuuina upu sa’o i lo’u gutu, pe a ou talanoa atu i o’u matua, ina ia ou le faaitaina i laua. O le a ou aioi atu foi mo Lona Agaga ina ia mafai ai ona la lagonaina lo’u agaga faamaoni ma lo’u alofa. O le a ou faasoa atu se mau mai le Tusi Paia e lagolagoina le Tusi a Mamona. O le a ou faasoa atu foi ni ou aafiaga ma lagona. O le a ou faapea atu o le talalelei, o le alofa o le Atua, ma le tatalo o le a aumaia i tatou ia latalata atu i le filemu faaleagaga lea tatou te mananao uma ia maua. O le galuega a le Alii e faigata ae lē faapea e lē mafai ona fai. Faalagolago i le Agaga.

Afai e te fefe e faasoa atu le talalelei, amata i lou ta’u atu ia i latou ou lagona pe a e tatalo ma faitau ia tusitusiga paia. Faamatala atu e i ai lau molimau, ma faamatala atu pe aisea e te fiafia ai i le talalelei. O le taimi lava e tuuina atu ai ou manatu e uiga i ou lagona, o le a malamalama i la’ua ma lē feitai.

E mafai ona e faatuina se faataitaiga mautinoa i ou matua e ala i le mulimuli i tulaga faatonuina a le Ekalesia ma tausia poloaiga uma, aemaise lava le Upu o le Poto, ma le faaali atu o le alofa ma le usiusitai e ala i au amio. E mafai e lenei mea ona liliu lo la gauai e agai atu i au amioga ma fesoasoani ai ia i laua e o mai i le Ekalesia a le Alii. Ou te matuai talitonu lava e mafai ona e aioi atu i le Tama Faalelagi e ala atu i au tatalo patino, ia suia o laua loto.

Na aoao i tatou e Paulo i le 1 Timoteo 4:12, “Aua nei inoino se tasi i lou taulealea, a ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.” O le faaalia o se faataitaiga lelei e tatalaina ai le pa mo le liliu mai o ou matua. O le a fofoaina ai le tau talafeagai ma le avanoa e tuuina atu ai se molimau o le talalelei. O le i ai o le faatuatua, lē fefe, ma le avea o se faataitaiga e mafai lea ona fesoasoani e suia ai o laua mafaufau ma faamanuiaina o laua olaga ma oe foi.