Keriso & Aganuu i le Feagaiga Tuai

Ina ua mavae mafatiaga o Iesu i Ketesemane, sa faafeiloai o ia e Iuta ma “le ‘au ma auauna mai le au ositaulaga sili ma Faresaio, [o e] [na o] atu ma sulu, ma lamepa, ma le auupega” (Ioane 18:3). Sa usitai Iesu i se faiga lē mamalu ina ua Ia faatagaina nei tagata leaga e ave o Ia ma noanoa ia te Ia (tagai i le Ioane 18:12).

E le o tusi faamaumauina i le molimau a Ioane pe na faapefea ona ave Iesu, ae sa tuuina mai e Elder Bruce R. McConkie o le Korama a Aposetolo e Toasefululua (1915–85) se malamalamaaga loloto ina ua ia faapea mai, o Iesu sa “taitaieseina i se maea o loo noanoa i Lona ua, e pei lava o se pagota masani.”¹ E le o maua lenei faamatalaga i tusitusiga o le Talalelei, o lea e tatau ai ona faamaonia i le malamalamaaga faaperofeta a lē ua lagolagoina o se perofeta, tagatavaai, ma talifaaaliga.

O le maea i le ua o le Faaola e faamanatu mai ai le faiga masani o le noanoaina o se pagota masani. E faamanatu mai ai foi se faiga masani i le Nuu Paia i le asō, lea e sele ai se maea i ua o mamoe po o ‘oti taitasi ma taitai atu e fasi mate. O lenei faiga na maua’a mai i le lalolagi o le Feagaiga Tuai. Na tulimataia i tusitusiga o le Feagaiga Tuai lenei tulaga i le soifuaga o Iesu ina ua valoia e Isaia e faapea o le Mesia “na faasauaina o Ia, sa tigaina foi o Ia, ae e le tautala mai o Ia: e pei o le tamai mamoe ua taitaiina ia fasia” (Isaia 53:7).

O loo faatatau Levitiko i se faiga faalelotu e faatatau i le saeeseina o le pa’u o le tamai povi poa pe a uma ona fasia: “Na te fasia foi le tamai povi poa i luma o Ieova. … Na te saeeseina foi le pa’u o le taulaga mu” (Levitiko 1:5–6).

E foliga mai o le sae o lona uiga o le aveese o le pa’u o le manu. A uma ona fasi le manu e faia ai le taulaga, ona saeese lea o le pa’u o le manu e le tagata o loo faia le taulaga po o se tasi o le au perisitua. O le upu Eperu psht, e faaliliuina o le “saeina,” e masani ona faauigaina “o le saei ese o lavalava” (tagai i le Kenese 37:23; 1 Samuelu 19:24; Esekielu 16:39; 44:19).

O manu ua saeina pa’u e osi ai taulaga o faatusa ia o Iesu Keriso. Sa saeia laei o Iesu e aunoa ma se sauniga mamalu—o Ona ofu ma le “ofu tino”—a o lei Faasatauroina o Ia:

“Ua faasatauroina Iesu e tagata tau, ona latou ave lea o ona ofu, ua vaefaina, taitasi le tagata tau ma lana mea; i le ma le ofu tino: ae leai se su’iga i le ofu tino, ua lalaga atoatoa, e afua mai i le pito i luga.

“Ona fetautalatalaai lea o i latou, aua tatou te saeia, ae se’i tatou fai ai le vili, po o ai le fai mona; ina ia taunuu ai le Tusi, ua faapea mai, Ua latou tufatufaina o’u ofu ia te i latou, ua latou faia foi le vili i lo’u ofu tino” (Ioane 19:23–24).

Na tusia e Peresitene Spencer W. Kimball (1895–1985) , “Ai lava Sona mafatia ina ua le faamamaluina [e fitafita] lona tagata e ala i le saeia o Ona laei ae faaofu o ia i se ofu talaloa mumu!”²

O le saeina o pa’u o manu e osi ai taulaga sa ta’imua foi i le sasaina o Iesu. Ina ua tulai o Ia i luma o le kovana Roma o Ponotio Pilato, sa mafo’efo’e vaega o le pa’u o Lona tino a o sasaina o Ia (tagai i le Mataio 27:26). Atonu sa faatatau Peteru i le sasaina lea po o le tutuiina o fao i lima ma tapulima o le Faaola lea na mulimuli mai ina ua ia tusia, sa tauaveina e Iesu “a tatou agasala i Lona lava tino” (1 Peteru 2:24). Sa valoia e Isaia le sasaina i le sili atu ma le fitu seneturi ua tuanai. Sa ia tusia e faatatau i le Faaola, “Na a’u tuuina atu lo’u tua i e sasa mai” (Isaia 50:6).

E i ai ni nai fuaitau i le Feagaiga Tuai e faatatau i se meaai faapitoa e pei o se areto lea sa aina e tagata tapuai i le malumalu pe susunuina i luga o le fatafaitaulaga faatasi ma taulaga (tagai i le Esoto 29:2; Levitiko 2:4; Numera 6:15). O le faaEperu o le areto lea e ta’ua o le halah (numera tele, halot), o loo ta’u mai ai le areto “tu’ia” (mai le upu autu faaEperu hll, “ia tu’ia”). I isi vaega o tusitusiga paia o le upu autu faaEperu (hll) e faatatau i le tu’iaina, e patino lava i le tagata e tu’ia i se pelu po o se āū (tagai i le 1 Samuelu 31:3; Auega 4:9).

Tatou te le iloa pe aisea na ta’ua ai lea areto o le halah, ae atonu sa tu’ia le falaoa pe faapu ae lei tuuina i le ogaumu. O le areto tu’ia atonu e faatusa lelei lava ia Iesu Keriso, o lē ua ta’ua o le “areto o le ola” (Ioane 6:35) ma o lē sa tu’ia ao i luga o le satauro (tagai i le Ioane 19:34). Sa valoia uma e Isaia ma le fai Salamo le tu’ia o Iesu o se vaega o le Togiola: “Ua momomo o Ia ona o a tatou agasala” (Isaia 53:5). “Ua tu’ia e i latou o’u lima ma o’u vae” (Salamo 22:16).

E pei lava ona avea le areto tu’ia o se vaega taua o osigataulaga anamua, sa faaaogaina foi e le Au Paia i le popofou o le faaKerisiano ma o loo faaaoga foi i lo tatou lava tisipenisione le areto tofitofia o se faamanatuga o le taulaga a Keriso. Tatou te manatua o Iesu lava Ia na tofitofia le areto o le faamanatuga e ta’imua ai i Lona tino tu’ia. Na tusia e Mataio, “O loo latou aai, a e tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo’u tino lenei” (Mataio 26:26).

O le areto ua tofitofia o se faatusa o le tino tu’ia o Iesu, e pei ona manino mai i saunoaga a perofeta o ona po nei, e aofia ai Peresitene Ioane Teila (1808–87): “Ou te fiafia tele e feiloai ma le Au Paia. Ou te fiafia e tofitofi le areto ma i latou e fai ma faamanatuga o le tino tu’ia o lo tatou Alii ma le Faaola o Iesu Keriso, ma ia aai ma feinu i le ipu o le faamanatuga o Lona toto masaa.”³

O le faiga o osigataulaga anamua sa aofia ai nai faatulagaga sa faatatau i le suauu olive tu’ia, po o le “suauu e faia e ala i le tu’iina o olive i se maatu’i.”⁴ Mo se faataitaiga, o le osia o taulaga i aso taitasi i le malumalu e aofia ai ni tamai mamoe se lua, o se taulaga i meainu, ma le falaoa e palu faatasi ma le suauu olive ua tu’ia (tagai i le Esoto 29:40; Numera 28:5–6). O nei taulaga e tolu—o tamai mamoe, o le taulaga i meainu, ma le paluga o le falaoa ma le suauu—sa ositaulagaina “i aso, e fai ma taulaga mu e le aunoa” (Numera 28:3).

O le suauu tu’ia sa faaaogaina foi i le malumalu i le tuuga lamepa mo se malamalama mo i latou o e na galulue i le malumalu. Sa poloai le Atua ia Mose, “Ia e fai atu foi i le fanauga a Isaraelu, ia latou aumai ia te oe le suauu olive lelei e tu’ia, mo le afi, e mu ai pea le lamepa” (Esoto 27:20)

I le Tusi a Mamona, na folafola mai e Apinati, “O Ia o le malamalama ma le ola o le lalolagi; ioe, o le malamalama e leai sona iuga, e le mafaapouliuligia” (Mosaea 16:9). Ua talafeagai lava la le faaaogaina o le suauu tu’ia i lamepa e avatu ai le malamalama i le malumalu, e pei lava ona avatu e Keriso le malamalama i le lalolagi atoa.

E i ai le isi faatatauga o le suauu tu’ia ia Iesu Keriso. O le suauu tu’ia ua faamatalaina e “lelei ma taugata”⁵ ma sa maualuga le tau, e sili atu nai lo le suauu olive lea sa saunia e ala i isi faiga, e pei o le mea e soli ai olive. Sa faaaogaina le suauu tu’ia aua e fai ma faatusa o le Faaola i uiga taua e lua: Muamua, O Ia o Le Ua Faauuina, po o lē ua faauuina i le suauu olive. Ua ta’ua o Ia o le Keriso ma le Mesia, o lona uiga o Lē ua faauuina (i le suauu olive) i le faaEleni ma le faaEperu. Lona lua, o le suauu tu’ia e ta’imua i le aafiaga o Iesu Keriso i ni nai itula ao lei maliu o Ia i luga o le satauro: Sa tu’ia foi o Ia. Ua tuuina mai e Mataio, Mareko, ma Luka molimau nei:

“Ona latou taufaifeanu ai lea i Ona fofoga, ua taufaitu’i foi ia te Ia; ua taufaipo atu foi isi” (Mataio 26:67).

“Ona feanu ai lea o isi ia te Ia, ma ufiufi i Ona fofoga, ma tu’i ia te Ia, … o le au auauna foi, ua latou taufaipo mai ia te Ia” (Mareko 14:65).

“O tagata ua taofi ia Iesu, ua latou tauemu ma sasa ia te Ia.

“Ua latou ufiufi Ona fofoga, ona po mai ai lea o Ona fofoga, ua fesili mai foi ia te Ia, ua faapea mai, E te iite mai, po o ai na na po atu ia te oe?” (Luka 22:63–64).

Na tusia e Peresitene Kimball e uiga i lenei mea na tupu: “Sa tutu o Ia ma le filemu, lē gaoia, ma le mamalu faalelagi a o feanu atu i latou i Ona fofoga. Sa tumau Lona malualii. E leai se upu ita na sau mai lona fofoga. Sa latou po i Ona fofoga ma sasa i Lona tino. Ae sa tumau o Ia ma le lē gaoia, e lei faamata’uina.”⁶

Sa valoia e Isaia lenei faiga mataga o Iesu Keriso i le fitu seneturi na muamua atu: “Na ou tuuina atu lo’u tua i e e sasa mai, ma o’u alafau i e futi le ‘ava; ou te le’i ufiufi foi o’u mata i le mā ma le feanu.” (Isaia 50:6).

O le faaeeina o lima i luga o ulu o manu faapitoa e osi ai taulaga o se vaega taua o le osiga o taulaga anamua. Sa auai tagata eseese i le faaeeina o lima, e aofia ai:

• Tagata Isaraelu taitoatasi: “Ai so outou na te au mai se taulaga ia Ieova, … Na te faaee lona lima i le ulu o le taulaga mu, ona talia lea mo ia, e fai ma togiola mona” (Levitiko 1:2, 4).

• Toeaina: “O toeaina foi o le faapotopotoga, latou te faaee ai o latou lima i le ulu o le povi poa taanoa i luma o Ieova” (Levitiko 4:15).

• Alii: O le alii e “faaee foi lona lima i le ulu o le ‘oti poa” (Levitiko 4:24).

• Tagatanuu: “O se tagata o le nuu … na te faaee foi lona lima i le ulu o le taulaga mo le agasala” (Levitiko 4:27, 29).

• Faitaulaga sili: “E faaee foi e Arona ona lima i luga o le ulu o le ‘oti ola” (Levitiko 16:21).

• Sa Levi: “Ona faaee ai lea e sa Levi o latou lima i luga o ulu o povi poa taanoa … e togiolaina ai sa Levi” (Numera 8:12).

Sa poloaiina e le Alii le faaee o lima mo osigataulaga eseese, e aofia ai taulaga mu, taulaga faafetai, ma taulaga mo agasala (tagai i le Levitiko 1:4; 3:1–2; 4:3–4; 24:10–16).

O le faatinoga o le faaee atu o lima i luga o manu e osi ai taulaga, e aoao mai ai le tulafono o le fai ma sui, po o le mana e suitulaga ai se tasi mo le isi. I le tulaga lea, e fai faafaatusa ai le tuuina atu o agasala a tagata i luga o le ulu o le manu. Pe, e pei ona fai mai se tagata atamai i tusitusiga paia, o le faaee o lima e “faailoa ai le tagata ua agasala ma le manu o le a fasia mo le taulaga, ma e faatusa i le ositaulagaina o lona lava ola.”⁷ O le faafaatusa o le faaeeina o lima, e faatatau i taulaga i manu, o loo ta’u mai i le Levitiko 16:21–22, lea e tuuina atu ai e le faitaulaga sili agasala ma amioleaga a Isaraelu i luga o le ulu o le ‘oti:

“E faaee foi e Arona ona lima i luga o le ulu o le ‘oti ola, ma ta’uta’u atu amioleaga uma a le fanauga a Isaraelu, ma o latou soligatulafono uma ia latou agasala uma, e tuu ai i luga o le ulu o le ‘oti. …

“E ave foi e le ‘oti i ona luga a latou amio leaga uma.”

E moni, o manu sa osi ai taulaga o faailoga ma faatusa o Iesu Keriso, o lē na tauaveina a tatou agasala ma amioleaga a o lei maliu o Ia i luga o le satauro.

O le malamalama i le aganuu a le Feagaiga Tuai e mafai ai ona fesoasoani ia i tatou e tatala ai le uiga atoatoa o tusitusiga paia o le Feagaiga Tuai. E faapitoa lava le moni o lenei tulaga i vaega e faasino tonu ma taula’i atu ia Iesu Keriso. O se suesuega auiliili o lenei vaega taua o tusitusiga paia, o le a fesoasoani tatou te maua ai se talisapaia sili atu o le Faaola, o Lana taulaga faavavau, ma i latou o e tulimatai atu i Lona soifua mai.