O La’u Folafolaga i le Alii

I ni nai tausaga talu ai, sa feagai ai lo’u aiga ma se taimi faigata. Na tete’a o’u matua, ma na amata ona faagalo e lo matou aiga le alofa o le Atua.

Na matou matuai laki lava, aua sa iloa mai e se tasi o uo a lo’u tinā le manaomia ona matou faalatalata atu i le Atua ma faafeiloai atu i matou i faifeautalai. A o la’ua aoaoina i matou i le talalelei, na matou iloa ai e i ai se fuafuaga a le Atua mo i matou, ma e ui ina tele o matou lu’itau, ae Na te lei tuulafoaiina lava i matou. Ina ua matou malamalama i nei mataupu faavae, na matou filifili loa ma lo’u tina ma o’u tuafafine e papatiso.

A o matou auai i sauniga i Aso Sa, sa tuputupu a’e a matou molimau o le talalelei. E lei umi ae ou manao ou te auauna atu faamisiona. Peitai, sa le o se filifiliga faigofie, aua o a’u sa fai ma tamaloa o lo [matou] aiga. Sa manaomia e lo’u tina la’u fesoasoani. E le gata i lea, sa amata ona ou maua ni ofo se tele mai galuega ma na talia foi au i nisi o iunivesite. Sa fai la’u faaiuga ou te ole atu i le Atua mo se fesoasoani ma se taitaiga.

Ina ua maea la’u tatalo, sa ou liliu atu i a’u tusitusiga paia ma faitau ai i fuaiupu nei:

“O le mea lea, o le a ola ai lava lou aiga.

“Faauta, e moni ou te fai atu ia te oe, ia e alu ese mai ia i latou tau o ni nai aso itiiti, ma talai atu la’u upu, ou te saunia foi se nofoaga mo i latou” (MFF 31:5–6).

O le taimi lava lena, sa matua malosi ai lo’u lagonaina o le Agaga, ma iloa ai o le mau na ou faitauina o le afioga lea a le Tama Faalelagi ia te au.

E lei umi lena aafiaga ae maua mai loa lo’u valaauga o le misiona. A o lei vaetofia au o se faifeautalai faamisiona, sa ou faia se folafolaga i lo’u Tama Faalelagi o le a ou faia Lona finagalo o se faifeautalai—o le a ou galue ma le maelega ma ositaulaga atu lo’u tagata atoa mo Ia. Na pau lava le faamanuiaga na ou tatalo ai, o lo’u toe vaai lea ua toe faatasia lo’u aiga i se aso.

O lo’u tausaga muamua o se faifeautalai sa luitauina, ae sa matou galulue ma a’u soa ma o matou loto atoa. E tusa po o le taimi faapenei, na ou maua ai se tusi matagofie mai i lo’u tinā e ta’u mai ai ua toe foi ane lo’u tamā i le aiga! O le taimi lava lena na ou manatua ai le folafolaga sa ou faia i le Atua, ma na ou manatua Lana folafolaga i le Mataupu Faavae ma Feagaiga: “Ua noatia a’u le Alii, pe a outou faia mea ou te fai atu ai; ae pe a outou le faia mea ou te fai atu ai, e leai sa outou folafolaga” (MFF 82:10).

Ua te’a ni nai tausaga talu ona maea la’u misiona. O le asō o loo maua pea e a’u ma lo’u aiga le olioli i le talalelei ma e ala ia matou feagaiga ma le Atua. Ou te iloa o loo soifua o Ia. Ou te iloa e alofa o Ia ia i tatou. Ou te iloa na Ia auina mai Lona Alo e laveai i tatou. Ou te iloa foi a tatou faia ni folafolaga ia te Ia ma tatou faamaoni i na folafolaga, e faamaoni foi o Ia ia i tatou.