Faamuamua le Aiga

O se vaiaso fou, ma na ou vaai atu ma le popole i le kalena a lo matou aiga. E faapefea ona matou faataunuuina ia matafaioi uma na matou fuafuaina?

Sa ou oso mai lea tiute i le isi, taumafai le mea sili ou te mafaia e volenitia ai i aoga, momoli tamaiti ia latou taaloga ma kalapu eseese, fafaga tagata uma e fuafua i le kalena ua matua tumu i mea e fai, ma sauni i aso taitasi a’u lesona mo le seminare i vaveao. E faanatinati solo lo’u toalua ina ia oo atu i le galuega ma fonotaga faale-Ekalesia, e asiasi i tagata o le uarota, ma fai a’oga a le au soka. Sa ma taumafai e galulue ma le naunautai i mea lelei ma toaaga i le Ekalesia, ae sa i ai lava se mea na misi. E ui lava e tele aiga e mafai ona taulimaina le tele o gaoioiga, ae sa lei aoga mo i matou: na amata ona aliali mai tulaga faaletonu o le kalena pisi i lo matou aiga.

A o ou manatunatu loloto i lenei faafitauli, sa amata ona ou matauina le tele o taimi, sa ma fai atu ai e leai i le ma fanau i mea sa latou mananao ai ma moomia mai ia i ma’ua. Sa faalavelave lea tulaga ia te a’u, ma sa amata ona ou mafaufau i se mea e mafai ona fai.

Sa ou liliu atu i tusitusiga paia. A o ou faitauina le Tusi a Mamona, sa ou oo atu i le lauga a le Tupu o Peniamina lea na ia faapea mai ai, “Ia pule foi ina ia faia nei mea uma i le poto ma le auauai lelei, aua e le tatau ona momo’e vave le tagata ia silia le malosi ua ia te ia. Ma lea foi, e tatau ona ia filifiliga o ia ina ia maua ai le taui; o lea e tatau ai ona ia faia mea uma ma le auauai lelei” (Mosaea 4:27).

O le taui sa ma mananao i ai, o se aiga e sili atu le fiafia ma lotogatasi. Sa ma mananao e faaitiitia le popole vale ae faateleina le olioli, ae sa foliga mai na manino lava sa matou le uia le ala e tau atu i ia taui.

Sa ma filiga, sa tele ni mea na matou faia ae itiiti ni mea na ausia. Sa ma saunia mea umaae le o mea tatau uma. Sa ou tatalo e uiga i le tulaga na ma i ai, ae o le taimi muamua e leai se tali na oo mai.

Sa faagasolo pea le olaga e pei ona masani ai. Sa manaomia le taimi mo valaauga, sa ou lagona na tatau ona fufulu ipu, ae na manaomia e tagata uma e momoli i latou ia latou gaoioiga. A o ou saunia e aoao le seminare i aso taitasi, sa amata ona ou maua tali sa ou sailia mai le atamai o o tatou perofeta ma taitai i ona po nei. Sa ou tau i se lauga mai ia Peresitene Spencer W. Kimball (1895–1985) o loo faamalosiau mai ai i le Au Paia e fai afiafi faaleaiga. Na saunoa o ia: “Ae i lo tatou vaitaimi ua tuuina mai ai e le Alii lana polokalama e faavavau i se laei fou ma folafola mai, e toe faafoi le lalolagi i le ola lelei, i le olaga moni faaleaiga, i le feoeoeai faaleaiga. O le toe faafoi lea o le tamā i lona tulaga tonu i le ulu o le aiga, toe aumai tinā mai le olaga faafiafia ma galuega, ma aveese mai tamaiti mai le lē faatapulaaina o mea faafiafia ma taaloga.”¹

Sa ou iloa o le mea muamua lava ua faaumatia e la matou kalena pisi, o le faatulagaina lea o afiafi faaleaiga i vaiaso taitasi. Na lei umi lena, ae faitau mai e lo matou epikopo se tusi i le lotu faamanatuga mai le Au Peresitene Sili e faamanatu mai ai ia i matou, e filifili ma le poto a matou gaoioiga ae aua le avea mea lelei matou te faia e faalavelave ai i afiafi faaleaiga.

A o ma talanoaina ma lo’u toalua lenei fautuaga, na ma iloa ai o le tele lava o a matou gaoioiga e mananaia ae e le manaomia, ma e mafai ona matou maua le manuia mai le faataatiaese o isi mau gaoioiga. Sa ma faia ni lisi o a matou gaoioiga ma faatulaga i ni vaega e pei o le “manaomia,” “lē manaomia,” ma le “manaomia le faaleleia.”

A o ma iloiloina le ma lisi, sa ma popole i lagona o la ma’ua fanau. O le tele o gaoioiga sa ma manatu e faataatiaese o mea ia sa aofia ai i latou, e pei o taaloga ma kalapu. Sa ma filifili e faia sa matou afiafi faaleaiga e talanoa ai ma le fanau e uiga i nei mea. Ina ua matou talanoaina ma le ma fanau le faafitauli, sa ma maofa i le iloa na sili atu ia i latou le faaalu o se taimi ma i ma’ua nai lo le avea o maua ma faiaoga o a latou au taalo po o taitaifono o a latou kalapu.

Mai la i lenei malamalamaaga, na faavaeina ai la matou “Kalapu Faaleaiga.”

O le taimi lava na maea ai o ma tiute i gaoioiga sa i ai, sa lei toe tusia o ma’ua igoa mo nisi gaoioiga fou. I po e leai ai ni o ma tiute faale-Ekalesia, e sau ai lo’u toalua mai le galuega ma faailoa mai, “O le Po lenei o le Kalapu Faaleaiga!” ona topetope loa lea o le fanau e fai a latou meaaoga ma feau, ina ia mafai ona faaalu faatasi o matou taimi.

E fiafia le ma fanau e fai ni gaoioiga faapitoa, aemaise lava ma lo latou tamā. I se tasi po na latou fausia ai se komepiuta mai fasi itutino o komepiuta. O nisi taimi e fai ai fusipau o meafaigaluega a tagata uma ma faaleleia se mea [na faaletonu] i lo matou fale. O le uiga o la’u tala, ua matou maua le taimi, malosi, ma ua naunautai ia matou faatasitasi.

Ua tele foi lo’u taimi e faaalu i tamaiti ma saunia ai ni meaai e sili atu ona lelei mo le aiga. O le Kalapu Faaleaiga e le manaomia ai se taufetuli solo, vaevaeina o lo matou aiga i gaoioiga eseese, po o le aai i faleaiga. Na leai se isi na foliga mai na misia lo matou olaga pisi solo ma le aai i faleaiga. Ua matou fiafia lava i le taimi ua matou faaaluina faatasi, ma ua le toe mananao ai le fanau e soona auai i gaoioiga faaopoopo.

Ua matou toe faataunuuina afiafi faaleaiga ma tatalo faaleaiga i aso taitasi. Ua matou faia foi ni galuega faamamā, fai suesuega a le tagata lava ia o tusitusiga paia, ma fai gaoioiga faafiafia faaleaiga. Ua ma malamalama a o faasolo ina matutua tamaiti, o le a tele atu foi a latou gaoioiga. O le a matou faaopoopoina na gaoioiga pe a manaomia, ae sei oo atu i ai, ae o le taimi nei o loo matou fiafia i minute uma o le Kalapu Faaleaiga.