Iren Mahsen en Presidensi Keieu, Pepweri 2010
Me Pid Kaunop en Pali Ngehn
Kaweid sang Atail Soukohp
Poahsoan Ehu en Pwoson
“Ma kitail sohte ahniki poahsoan kehlail en pwoson oh kadehde teng en mehlelo, kitail pahn mwein sohte kakehng melimel kehlail kan oh kisinieng lemwlemwur kan en kahpwal me uhdahn pahn kohdohng emenemen kitail.
“Mour wet iei ansoun kasongosong, ansou ehu en kamehlel me kitail pein warohng en pwurala rehn Samatail Nanleng. Pwe kitail en kak kasongosong, kitail anahne sohpai songosong kan oh kahpwal akan. Re kak kaweikitailla, oh mas likin ngenitail kan kak pwal oh mweredi—mwo, ma atail poahsoan en pwoson, atail kadehde kan en mehlelo sohte pahn tengedi kehlail loalatail.”1
Esehla Sang Padahk Kan en Mahs
“Ni atail pahn rapahki atail pali me keieu mwahu, peidek kei pahn kaweid atail madamadau: I wia aramas me I men wia? I kerenlahng Sounkomouro rahnwet laudsang ei kerenlahng aio? I pahn ahpwete kerenlahng lakapw? I ahniki soupeikasal en wekila ong me mwahusang? …
“Sounpar akan kodohr oh sounpar akan samwalahr, ahpw anahnepen ahniki kadehde en rongamwahuo doulahte ni eh wia mehkot me inenen kesempwal. Ni atail pahn doula mwowe nan rahn akan me kohkohdo, kitail anahne en dehr manokehla padahk kan en mahs.”2
Pein Ahmw Liahona
“Ahmw kapai en patriark iei noumw oh noumw kelehpw. E kak mwotomwot de reirei, mengei de lokaia loal. Kaidehn uwen reireiih de soangen lokaia dah me aude me kin wiahda kapai en patriark. Iei Ngehno me kin kasalehda mehlel wehwehih. Ahmw kapaio sohte wia mehn limilimpene ni keneinei oh nekinekila. E sohte wia mehn kohieng nan kilahs oh langada de ntingda nan pwuhk pwe koaros en wadek. Ahpw, e wia mehn pein omw wadewadek. E konehng en wia mehkot me kitail poakohng. E wia mehkot me kitail en idawehn. Ahmw kapai en patriark pahn seweseiuk ni pwohng me keieu rotorot. E pahn kaweiduhk nan kahpwal akan en mour. … Ahmw kapai en patriark iei pein noumw Liahona en kainene ahmw koasoandi oh kaweid ahmw ahl. …
“Kanengamah kak en anahn ni atail pahn kilang, awih, oh doadoahk ong kapai me inoupe mie pwehn pweida.”3
Kohdo Reh
“Tamataman me ke sohte kin alu kelehpw. … Ni omw pahn weweid nan mour, aluhlahng maraino ansou koaros, oh rotorot kan en mour pahn pwupwila mwurumw. …
“Ni ei [kin] sohpeilahng pwuhk sarawi kan pwehn alehdi kamarain, lepin lokaia ehu [kin] sansal ansou koaros oh kin kalapw pwurpwurehng. Lepin lokaiao [iei] ‘kohdo.’ Kauno mahsanih, ‘Kohdo rehi.’ E mahsanih, ‘Kohdo esehsang ie.’ E pil mahsanih, ‘Kohdo, idawehn ie.’ I mwahuki lepin lokaia wo, kohdo. Ahi pekipek iei me kitail pahn kohdo rehn Kauno.”4
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen IFirst Presidency Message, February 2010. Pohnpeian. 09362 885
Padapadahk sang Iren Mahsen Wet
Teaching, No Greater Call kasalehda me: “Sounpadahk men me mai sohte kin medewe, … ‘Dah me I pahn padahngki rahnwet?’ ahpw, ‘Ia duwen ei pahn sewese nei tohnsukuhl kan diarada dah me re anahne esehla?’” ([1999], 61). Pwehn sewese emenemen kasukuhl sang ire wet, medewe kihieng irail doaropwe oh pinsel oh kihieng irail ansou en wadek mahsen en President Monson oh ntingihdi mehlel kan me re diarada me pid kaunopada ni pali ngehn. Seri me tikitik kan kak mahleniada kilel me pid dah me re esehla. Medewe en mweidehng irail en ehukihda me re ntingihdi de mahleniada kan.