Gikawatan ba Nako ang Dios?

Mga pipila ka semana human sa akong bunyag sa edad nga 30, ang presidente sa among branch sa Piura, Peru, mihangyo nga ako interbyuhon aron sa pagtino sa akong katakus sa pagdawat sa Aaronic Priesthood. Human nako og lingkod, si Presidente Jorge García mihalad sa pag-ampo. Dayon siya nangutana kanako, “Nagtuo ka ba sa Dios?”

“Oo,” ako mitubag.

“Ikaw ba nagtuman sa Pulong sa Kaalam?”

“Oo,” ako mitubag pag-usab.

“Ikaw ba putli?”

“Oo.”

Hangtud niini nga punto ako masaligon sa akong mga tubag, apan miabut ang sunod nga pangutana: “Ikaw ba nagbayad og hingpit nga ikapulo?”

Wala ko makatingog. Sa akong hunahuna akong nakita ang paghulagway nga gipakita sa mga misyonaryo ngari kanako sa dihang sila mitudlo sa panaghisgutan sa ikapulo. Sila miingon nga ang ikapulo sa atong kinitaan iya sa Ginoo. Dayon ako nakadungog og laing pangutana: “Ang mga misyonaryo ba wala motudlo kanimo sa balaod sa ikapulo?”

“Sila mitudlo kanako,” ako mitubag, “apan wala lang ko mobayad.”

“Sorry kaayo,” miingon si Presidente García pagkataud-taud, “apan kinahanglan ka nga mobayad sa imong ikapulo aron imong madawat ang priesthood. Sugdi karon, ug bayari ang Ginoo sa imong ikapulo.”

Ako mibiya sa iyang opisina nga naghunahuna gayud. Human marebyu ang balaod sa ikapulo pagkahapon nianang adlawa, ako misulod sa akong kwarto, miluhod sa salog, ug misugod sa pag-ampo. “Langitnong Amahan, kon ako nakapangawat man Kanimo pinaagi sa wala pagbayad sa akong ikapulo, ako mohangyo Kanimo sa pagpasaylo kanako. Ako mosaad nga ako dili na gayud mapakyas sa pagbayad niini.”

Pagkasunod Dominggo sa simbahan ako mihangyo sa presidente sa branch og lain nga interbyu. Ako miingon kaniya nga ako mibati nga ang Ginoo mipasaylo kanako ug Siya midawat sa akong pasalig nga mobayad sa ikapulo, nga akong gisugdan sa pagbuhat niadto gayud nga Dominggo. “Ako ba takus sa pagdawat sa priesthood?” Ako nangutana.

“Oo, siya mitubag. “Karon akong itugyan ang Aaronic Priesthood diha kanimo ug i-orden ka sa buhatan sa deacon.”

Karon ako adunay gamhanang pagpamatuod sa ikapulo ug sa buhong nga mga panalangin nga naggikan sa pagbayad niini. Sa dili maihap nga mga interbyu sugod niadtong Dominggoha sobra na sa 35 ka tuig ang milabay, kon ang mga lider mangutana kanako kon ako nagbayad og hingpit nga ikapulo, ako malipayon nga motubag og oo!