Kabahin sa Pag-andam sa Espiritwal nga Paagi

“Kon kita walay lawom nga pundasyon sa hugot nga pagtuo ug bug-os nga pagpamatuod sa kamatuoran, tingali kita maglisud sa pagharong sa mabangis nga mga unos ug bugnaw kaayo nga mga hangin sa kalisdanan nga dili mapugngan nga moabut sa matag usa kanato.

“Ang mortalidad usa ka panahon sa pagsulay, usa ka panahon sa pagpakita sa atong mga kaugalingon nga takus sa pagbalik sa atubangan sa atong Langitnong Amahan. Aron kita masulayan, kita kinahanglan gayud nga moharung sa mga pagsulay ug mga kalisdanan. Kini makapasakit kanato, ug makahugno sa atong mga pagbati—kana, kon ang atong mga pundasyon sa hugot nga pagtuo, ang atong mga pagpamatuod sa kamatuoran dili maayo ang pagkasilsil sa atong kinahiladman.^”1

“Sa pagpangita sa pinakamaayo alang sa atong mga kaugalingon, daghang mga pangutana ang mogiya sa atong hunahuna: Ako mao na ba karon kon unsay akong gipangandoy sa umaabut? Mas duol ba ako sa Manluluwas karon kay sa kagahapon? Mas duol ba kaha ako inig ka ugma? Aduna ba akoy kaisug nga mag-usab alang sa unsay mas maayo? …

“Miabut ang mga katuigan ug milabay, pero ang panginahanglan sa pagpamatuod sa ebanghelyo nagpadayon nga importante kaayo. Samtang magpadayon kita sa unahan, dili nato kalimtan ang mga leksyon nga nanglabay.”²

“Ang inyong patriyarkal nga panalangin inyoha ug para ra gayud sa inyo. Kini mahimong mubo o taas, yano o makapamalandong. Ang gitas-on ug ang pinulongan dili maoy importante sa usa ka patriyarkal nga panalangin. Kon dili ang Espiritu mao ang mopahayag sa tinuod nga kahulugan. Ang inyong panalangin dili ayohon sa pagpilo ug dayon tagoan. Kini dili ikwadro o imantala. Hinoon, kini angay nga basahon. Kini angay nga higugmaon. Kini angay nga sundon. Ang inyong patriyarkal nga panalangin makatabang kaninyo sa inyong labing lisud nga pagsulay. Kini makagiya kaninyo sa mga kakuyaw sa kinabuhi. … Ang inyong patriyarkal nga panalangin mao ang inyong personal nga Liahona aron maplano ang inyong padulngan ug moggiya sa inyong agianan. …

“Ang pailub mahimong gikinahanglan samtang kita magbantay, magpaabut, ug magtrabaho aron matuman ang gisaad nga panalangin.”³

“Hinumdumi nga kamo wala maglakaw nga nag-inusara. … Samtang kamo naglakaw sa tibuok kinabuhi, kanunay gyud nga maglakaw padulong sa kahayag, ug ang anino sa kinabuhi anaa sa inyong luyo. …

“Samtang Ako [nag] pakli sa mga kasulatan alang sa inspirasyon, usa ka piho nga pulong ang [nag] balik-balik sa akong hunahuna. Ang pulong [mao ang] ‘duol.’ Ang Ginoo miingon, ‘Duol kanako.’ Siya miingon, ‘Pagkat-on kamo gikan kanako.’ Siya usab miingon, ‘Umari ka ug sumunod kanako.’ Ako ganahan sa pulong nga, duol. Ang akong hangyo mao nga unta kita moduol sa Ginoo.”⁴