Unta Sila Magtubo diha Kanimo: Mga Timaan sa Pagkahingkod

Ang paghimo og usa ka panabut sa katuyoan ug pagpili sa mga matang sa panarbaho mao ang mahagitong mga plano. Ang mga hingkod makabaton og katin-awan kabahin sa edukasyon ug mga kapilian sa panarbaho pinaagi sa pagsulay og daghang mga pagpili, sa pagpangutana, sa pagboluntaryo o pagtrabaho sa mga entry-level job aron makabaton og kasinatian, ug pagtambong sa unsay ilang nakaplagan nga makalingaw ug makalagsik. Ang paghimo niining mga pasalig bisan pa gani og taliwala sa walay kasiguroan makadugang og panabut sa kahanas ug kita dili na kaayo magsalig sa uban.

Ang mga hingkod makat-on og katagbawan sa paghan-ay og mga tumong, pagdisiplina, pagpahimulos sa biyahe, pagtukod og kada adlawng mga naandan ug mga sumbanan, ug pagtino og tumong sa kinabuhi nga subay sa ilang pinakalawom nga mga mithi. Ang mga tumong ug mga naandan makatabang sa mga tawo nga makalikay sa kasubo ug tintasyon ug mohimo og agianan tali sa peligro nga mga sitwasyon sa kapuol ug sobrang kaluya. Samtang kita makat-on sa pagpapadayon sa malisud nga tahas, kita makabaton og kahimuot sa pag-angkon sa mga butang nga gusto kaayo nato, dili lamang ang mga butang nga gusto nato karon.

Ang pagpahigayon sa atong kaugalingong dental ug medikal nga pag-atiman, pagpatupi, pag-exercise, sustansyadong pagkaon, ug saktong oras sa katulog kanunay ang makahimo og positibo nga mga paagi sa tininuod nga pag-angkon og gasa sa lawas. Ang pisikal nga pag-atiman sa kaugalingon nagtugot kanato sa pagbaton og responsibilidad alang sa atong panglawas ug kaayohan.

Samtang atong dugangan ang atong paningkamot sa pagpangita og kwarta ug sa pagdumala sa atong mga pundo, atong masiguro ang atong umaabut kabahin sa pinansyal ug sa pag-angkon sa mga butang nga gikinahanglan nato karon. Ang mga young adult makapahimulos sa mga sugyot nga gikan sa ilang mga ginikanan ug mga lider kabahin sa pagbayad sa ikapulo, pagbadyet, pagpamuhunan, paghipos og porsyento sa kinitaan, ug pagsabut sa utang.

Samtang kita nagkaedaran, kita makahimo og usa ka panimalay nga molarawan sa atong gusto, sa paagi sa kinabuhi, ug personalidad. Pagkaanindot nga makaangkon og usa ka dapit nga atong kaugalingon—kini usa man ka suok sa kwarto alang sa atong mga libro o mga himan o apartment o balay. Samtang kita mopatuman og kahusay ug katahum sa atong mga palibut, kita moapil sa Tiglalang sa usa ka mamugnaon nga proseso.

Ang kaminyoon ug ang pagkaginikanan mao ang dayag nga kausaban ngadto sa pagkahingkod. Apan ang mga single adult mahimo usab nga “motubo” sumala sa ilang ubang mga relasyon. Bisan tuod kon walay laing makapuli sa hingpit nga paagi sa kaminyoon ug sa pagbaton og mga anak, ang mga dili minyo makapahimulos sa mga relasyon uban sa mga igsoon, mga ig-agaw, mga higala, mga kauban sa trabaho, mga silingan, ug mga miyembro sa ward o branch. Ang mga higala makahatag og mapadayunon, regular nga pakigsandurot, ug pag-atiman sa usag usa.

Ang pagpasiugda sa pakighigalaay, pagtubag sa mga pagdapit sa uban, ug ang paglingaw kauban sa mga tawo sa nagkalain-laing mga edad mao ang sosyal nga mga kahanas sa pagkahingkod. Samtang gidugangan nato ang atong kapasidad sa pag-atiman mahitungod sa ubang mga tawo, pagsulbad sa mga kasungian, ug pagpakigbahin sa atong mga kaugalingon sa matinuorong paagi, atong mabati ang makahuluganong pagbati alang sa uban.

Ang pipila ka mga young adult mobati og kahingawa sa sosyal nga mga pakigsandurot. Sila modangup sa alkohol, mga druga, pornograpiya, dili tarung nga mga pagkaon, o ubang dautan nga mga pamatasan isip pagpalinga o pagpanalipud batok sa mga kahadlok. Ang pagkat-on sa pagpakig-istorya, makalig-on sa panaghigalaay sa inanay nga paagi, ug ang pagsulbad sa mga panagbangi nga anaa sa lain-laing tawo makatabang kanato nga mabuntog ang sosyal nga katalandugon.

Ang mga young adult makahimo og tinuod nga kalainan alang sa kaayohan sa kalibutan. Ang pagpangilabut sa pagserbisyo diha sa komunidad, pag-agda og usa ka tawo sa panihapon, pagdapit sa uban sa pagduol, pag-home o visiting teaching, pag-apil sa usa ka sports team, ug pagpalambo sa mga calling sa Simbahan makahimo niining tanan sa atong mga kinabuhi—ug sa uban nga—mas buhong ug labaw pa ka makahuluganon.

Kita nasayud nga ang mga tawo tinuod nga mga hingkod na kon sila mouswag gikan sa giatiman ngadto sa nag-atiman. Ang mga young adult mopanalangin sa mga kinabuhi pinaagi sa pagpasa sa ilang kahibalo, kasinatian, ug pag-atiman sa sunod nga henerasyon. Ang regular nga mga kalihokan uban sa mga pag-umangkon, mga bata sa kasilinganan, o Primary ug mga klase sa mga batan-on nag-awhag og mga relasyon nga makahuluganon alang niining duha ka henerasyon. Kita usab makasuporta sa sunod nga henerasyon pinaagi sa pag-amuma sa bag-ong mga empleyado diha sa trabaho, pagtampo sa atong propesyon, mohimog misyonaryo nga buhat, o pakig-ilaila niadtong mga nagpakisusi sa Simbahan.

Samtang kita nagtukod sa mga naandang buluhaton sa pagkahingkod, atong maklaro ang atong espiritwal nga mga prayoridad alang sa pag-ampo, pagtuon sa kasulatan, pagserbisyo sa Simbahan, ug pagsimba sa templo. Ang templo nagpasabut gayud sa kaimportante sa pamilya sa nangagi ug sa inyong mga henerasyon, ug maklaro usab niini nga ang Dios makigsulti sa matag usa kanato isip mga indibidwal. Ang pagkatakus alang sa rekomend sa templo nagpasabut nga kita gidawat sa balay sa Dios, diin kita makapadayon sa “pagtubo” diha Kaniya.