Ahi Kasongih Pwoson

Aht pwihn en Santi Sukuhl en me sounpar 13 sohte kin ndandiki aht waun. Ahpw, se ahniki sounpadahk kaselel men me kin wia uwen ah kak pwehn kihda ehuehu padahk kan sang ni Ngehno. Ehu padahko pid wadewadek pwuhk sarawi kan.

Ni keimwseklahn padahko e luke kiht en kilang ma se kak kapwaiada songosong ehu. E luke kiht koaros, ahpw rahno pwehki kahrepe me I sohte ese e kilengdohngie ansou me e nda, “I men kilang ma kumwail kak kapwaiada wadawad sang nan Pwuken Mormon rahn koaros!” I pein medewehieng pein ngehi, “I pahn kasalehieng uhk. I pahn wia!”

I tepikihda 1 Nephi iralaud 1 nihpwongohte oh doula wie wadawad rahn koaros. I mwein sohte ahniki madamadau pwung ansou me I tepidao, ahpw kedekedeo I perenikihla duwen pepehm me I kin ahniki ni ansou me I kin wadek Pwuken Mormon. Wadawad pwohng koaros wiahla tiahk ehu me I inenen pereniki.

Sounpwong kei mwuri I lella nan pwuken Alma 32 oh alehdi pepehm en kasongih ahi pwoson. Nan sukuhl se ahpwtehn kasukuhliki duwen wia kasong me pid science, eri I kelepwikihdi oh kapakap ong Sahm Nanleng oh ndahieng me I pahn tapiada kasongosongo. I peki ma I kak en esehla ma Pwuken Mormon mehlel.

Ni ahi kin tamanla mwuri, I ese me Sahm Nanleng ketin sapengala ahi kapakap kan pak tohto. Wadawad rahn koaros sang nan Pwuken Mormon kihiengie laudilahn kehlail en powehdi suwed. I pehm me I kerenlahng Semei Nanleng. I pehm me I kakehlail sang manaman en Ngehn Sarawi pwehn powehdi kahpwal kan. Dah me Alma koasoaia me pid kasongih ma sapwellimen Koht mahsen mehlel: “E tepier kalaudehla pali ngeni; ehi, e tapidahr kalaudehla ei marainkihla, ehi, e tapidahr mwahu ongie” (Alma 32:28).