Sapwellimen Koht Doadoahk Lap Ehu

Sounpar epwiki walihsek samwalahro, Joseph Smith, Oliver Cowdery, oh kisin pwihn tikitik ehu pokonpene pwehn koasoanehdi Mwomwohdiso en Sises Krais en Souleng en Imwin Rahn Akan. Sang ni koasoaiepe koaros e wia mihting ehu me sohte wiapan ahpw me kapehm en ngehno laud. Joseph ntingihdi me mwurin kamadipw sarawio, “Ngehn Sarawi widekdihieng poht ni uwe ehu me inenen laud—ekei kihda kokohp, oh kiht koaros kapinga Kauno, oh peren laudiki.”¹

Kemwekid kan me wiawi rahno wiawi ni sohte petehkpe sang sampah; sohte pakairpe wiawi nan doaropwehn rohng kan de pil iren kair kan. Mehndahte met, ia duwen nanleng kan ahr pereniki oh kapingkihieng Koht—pwehki rahno, Mwomwohdiso en Sises Krais kopwurupwurdo pohn sampah!

Sang rahno leledo rahnwet, lopw kei en sapwellimen Sahm Nanleng pwutak oh serepein pwoson kan idihdawehn kohdo kemwekid kapehm kan en Ngehn Sarawi oh pidolongehr nan pihl sarawi kan en pepdais. Emen ohl me wia met iei Solomon Chamberlain.

Solomon wia emen ohl kehlail ni pali ngehn oh me kapakapki awa tohto, raparapahki mahkpen dipe kan oh kin pekipeki Sahm Nanleng en kahluwa ih ong mehlelo. Ansoukis karanih pahr 1816, Solomon alehdi inou nan kasansal ehu me e pahn koanoahdi rahn me Mwomwohdiso en Krais pahn kokouda mwurin pwihn en wahnpoaron kan pahn pwurehng pil kokouda pohn sampah.

Sounpar tohto mwuri Solomon dake pwoht seiseiloaklahng Canada ansou me wereo peidi likin kisin kahnihmw en Palmyra, New York. Wasao e alehdi pepehm kehlail me e anahne doudi oh sop mahs ni kahnihmwo. Ni eh sohte wehwehki dah me e wiewia wasao, e tepida lokaiahieng tohn kahnihmwo. Sohte pwand e pa rongada koasoaiepen “Pwuhk Sarawi kohl ehu.” E nda me lepin mahsen wet kadarehng “manaman duwehte lioal [me] kohsang tapin moange lel imwin sendin nehkan.”

Ah peipeidekseli kahrehieng eh lella nihmwen Smith kan, wasa me e koasoaieng irail akan me mih wasao duwen rohng kaselel en rongamwahu kopwurupwurdohu. Mwurin eh mihmihki wasao rahn riau oh alehdi kadehde en mehlelo, Solomon doula nan ah seiloaklahng Canada, ni eh wahda Pwuken Mormon 64 me ahpwtehn ntingda oh teh kan saikinte katengtengpene. Wasa koaros me e kohlaie, e padahkih aramas oko, “koaros me ileile oh karakarahk, kepwehpwe oh semwehmwe, … ren kaunop ong sapwellimen Koht doadoahk lap me pahn kerenieng kohdo.”²

Sangete rahno nan Epreil 1830, aramas lopw kei diaradahr mehlelpen rongamwahu kopwurupwurdohu oh pidolongehr nan pihl kan en pepdais. I kadehde me “sapwellimen Koht doadoahk lap wet” mih pohn sampah rahnwet. I kihda ahi kadehde me Kauno ketin moangmoange Sapwellime Mwomwohdiso oh ketin kawkaweid sang rehn Sapwellime soukohp, President Thomas S. Monson. Kaidehn kapai mwahl ehu en wie momour nan rahn pwukat en imwin rahn. Ansou kaselel kei met, me kokohpda sang rehn soukohp ko en kawa oh petehkpe kin mie sang kahlap kan en nanleng. Kauno ketin loalloale Sapwellime Mwomwohdiso. E pil ketin loalloale irail akan me, duwehte Solomon Chamberlain, kin idawehn kemwekid kapehm kan en Ngehn Sarawi oh kin iang riarail ohl akan oh lih akan nan sampah pwon ni sewese kapwaiada sapwellimen Koht doadoahk lap wet.