Thawj Pawg Thawj Tswj Hwm tsab Xov, Rau Hli Ntuj 2010
Cov Noog Daj uas Muaj qhov Txho Ntshauv ntawm Lawv tej Tis
Twb tau yuav luag li 60 xyoo los lawm, thaum kuv ua ib tug npis sov uas tseem hluas heev, Kathleen McKee, uas yog ib tug poj ntsuam, tau tas sim neej. Ntawm cov khoom uas yog nws li txawm muaj peb tug noog daj. Ob tug, uas muaj xim daj uas zoo tag nrho, nws xav kom muab pub rau nws ob tug phooj ywg. Tus thib peb, uas yog Billie, muaj xim daj nrog rau xim txho tshauv ntawm nws ob sab tis. Muam McKee tau sau ib tsab ntawv rau kuv hais tias: “Koj thiab koj tsev coj nws mus nrog nej nyob puas tau? Nws tsis yog tus zoo nraug tshaj, tab sis nws cov nkauj yog qhov zoo tshaj plaws li.”
Muam McKee zoo li nws tus noog daj uas muaj qhov txho tshauv ntawm ob sab tis. Nws tsis tau yog ib tug neeg zoo nkauj thiab sawv tau ntseg, thiab nws tsis tau muaj me tub me nyuam li. Tab sis mas nws zaj nkauj pab tau lwm tus muaj siab kam ris lawv tej nras thiab ua tau lawv tej hauj lwm.
Lub ntiaj teb yeej muaj coob tug noog daj uas muaj qhov txho tshauv ntawm lawv tej tis. Qhov ntxim tu siab heev yog qhov uas tsawg tsawg tus xwb thiaj li kawm tau los hu nkauj. Ib txhia yog cov hluas uas tsis paub hais tias lawv yog leej twg, tias lawv ua tau dab tsi los sis xav ua dab tsi; lawv tsuas xav ua li leej twg xwb. Hos lwm tus neeg twb laus nkoos lawm, ris nra hnyav heev, los yog tsis muaj siab ntseeg lawm—lawv cov no ua neej nyob qis dua qhov uas lawv muaj peev xwm ua.
Kom thiaj li ua tau neej zoo, peb yuav tsum xyaum kom peb txawj siv kev ua siab loj los tiv dhau kev cov nyom, kev kaj siab los tiv tau kev tu siab, thiab muaj kev txo hwj chim nrog kev zoo siab. Tej zaum nej yuav nug hais tias, “Peb yuav ua li cas thiaj li yuav ncav tau tej hom phiaj no?” Kuv teb hais tias, “Los ntawm qhov uas paub tseeb hais tias peb yog leej twg tiag tiag!” Peb yog cov tub thiab cov ntxhais ntawm ib tug Vajtswv uas muaj siab nyob, uas tsim tau kom peb zoo nkaus li nws. Xav txog qhov no: tsim tau kom peb zoo nkaus li Vajtswv. Yog tias peb ntseeg qhov no tiag tiag ces peb yeej yuav txais dag zog thiab hwj chim tshiab los tshoov peb tej siab.
Hauv peb lub ntiaj teb no, feem ntau luag saib txoj kev ua ncaj ncees qis dua qhov uas ib tug neeg zoo nkauj zoo nraug los yog txawj hais lus zoo heev. Tiam sis yav thaud tus Tswv ntuas tus yaj saub Xamuyees li no hais tias: “Kuv yeej tsis saib ib tug twg raws li neeg ib txwm saib. Sawv daws saib ntsej saib muag, tiam sis kuv saib lub siab” (1 Xamuyees 16:7).
Thaum tus Cawm Seej nrhiav kom tau ib tug neeg uas muaj siab ntseeg tiag, Nws tsis xaiv tawm ntawm cov neeg uas saib lawv tus kheej ua neeg ncaj ncees uas tuaj mus tom lub tsev teev ntuj ntau. Tsis yog li ntawd, tus Tswv hu tus ntawd los ntawm cov neeg nuv ntses uas tuaj Capernaum tuaj. Tus Ximoos uas tsis tshua ntseeg, tsis paub ntaub paub ntawv, thiab siab luv me ntsis tau rais los mus ua Petus, tus Thwj Tim uas muaj siab ntseeg tiag. Ib tug noog daj uas muaj qhov txho tshauv ntawm nws tej tis thiaj tsim nyog muaj tus Xib Hwb tso siab rau nws thiab hlub nws.
Thaum tus Cawm Seej tau xaiv ib tug tub txib uas rau rau siab thiab muaj hwj chim ntau, Nws nrhiav tau tus tub txib ntawd tsis yog nyob hauv cov neeg uas muab siab npuab Nws tiam sis nyob hauv cov neeg uas tawm tsam Nws. Saul tus uas tsim txom tau rais los mus ua Pov Lauj tus uas tshaj tawm txoj moo zoo.
Tus Txhiv Dim tau xaiv cov neeg uas tsis zoo tag nrho los pab qhia txoj kev taug mus rau qhov kev zoo tag nrho. Nws tau ua li ntawd thaum ub. Nws tseem ua li ntawd niaj hnub nim no—twb yog cov noog daj uas muaj qhov txho tshauv ntawm lawv tej tis. Nws hu kom koj thiab kuv ua hauj lwm pab Nws hauv lub ntiaj teb no. Peb yuav tsum tuag siab ua tej hauj lwm ntawd. Thiab thaum peb tsoo mus lawm tom ntej, yog tias peb ntog yuam kev, cia peb taij thiab thov hais tias: “Coj peb, auj coj peb, tus Tsim tib neeg, tawm ntawm qhov tsaus kom mus sim dua ib zaug ntxiv.”1
Kuv txoj lus thov Vajtswv yog kom peb yuav ua raws li tus Neeg Tuaj Kalilais Tuaj tus yam ntxwv, vim thaum nws tseem muaj sia nyob nws yeej los nyob xyaw cov neeg pluag, cov txom nyem, cov uas raug tsim txom, thiab cov uas raug mob. Thov kom peb hu tau ib zaj nkauj tseeb tseeb los ntawm peb lub siab los thaum peb ua hauj lwm pab lwm tus neeg li ntawd thiab.
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus As Kiv: 6/09. Pub txhais ua lus Hmoob: 6/09. Kev txhais First Presidency Message, June 2010. Hmong. 09366 295
Qhia los ntawm tsab Xov No
Thaum koj qhia … , feem ntau yog ib qho zoo heev uas cov kawm saib los yog mloog ib yam tseem ceeb” (Teaching, No Greater Call [1999], 55). Kom thiaj pab tsev neeg to taub Thawj Tswj Hwm Monson zaj lus, xav saib puas tsim nyog hais kom lawv npaj qhia tawm txog tej yam lawv tau kawm tom qab uas lawv tau nyeem zaj lus ua ke. Caw txhua tus neeg qhia saib nws xav tias ib yam tseem ceeb hauv zaj lus yog dab tsi. Xaus lus thaum koj hais lus tim khawv txog Thawj Tswj Hwm Monson zaj lus.
Qhia Vajtswv txoj lus, raws li tau txais los ntawm Nws cov yaj saub los, yuav muaj hwj chim raug rau cov neeg uas peb qhia lub neej (saib Teaching, No Greater Call, 50). Thawj Tswj Hwm Monson hais tias peb muaj dag zog thiab hwj chim vim yog peb paub hais tias peb yog Vajtswv cov me nyuam. Tom qab nyeem zaj lus no tas, hais kom tsev neeg qhia saib puas muaj dab tsi uas pab lawv nco qab hais tias lawv yog leej twg tiag.