Cov Mus Xyuas tom Tsev tsab Xov, Rau Hli Ntuj 2010
Rov Qab Khi Lus thaum Noj lub Cim Nco Txog
Ua tib zoo thov Vajtswv saib yuav qhia txog tej vaj lug kub thiab tej kab lus twg los sis, yog hais tias toob kas no siv lwm txoj ntsiab cai uas yuav foom tau koob hmoov rau cov viv ncaus uas koj mus ntsib. Hais lus tim khawv txog zaj lus qhuab qhia. Caw kom cov uas koj qhia ntawd piav saib lawv xav li cas thiab kawm tau dab tsi.
Yexus Khetos Txhim Tsa lub Cim Nco Txog
“[Yexus] muab lub ncuav ntawd ntais cev rau cov thwj tim thiab hais tias, ‘Lub ncuav no yog kuv lub cev, nej cia li txais mus noj’ (Mathais 26:26). ‘Lub ncuav no yog kuv lub cev uas kuv muab rau nej: Nej ua li no nej thiaj yuav nco ntsoov kuv’ (Lukas 22:19). Nws txawm muab ib lub khob cawv txiv hmab los ua ib yam li ntawd, es cov cawv ntawd muaj dej ntau tov haud, thiab nws ua Vajtswv tsaug thiab muab yais rau cov neeg nrog nws nyob ntawd, thiab hais tias: ‘Lub khob no yog Vajtswv tej lus cog tseg tshiab uas muaj kuv cov ntshav ua lub cim nias rau.’ ‘Thaum nej haus lub khob no, nej thiaj yuav nco ntsoov kuv.’ …
“Txij thaum lub sij hawm noj lub cim ntawd thaum hmo ua ntej Khexemenes thiab lub Roob Khauj Khaum Taub Hau ntawd, cov me nyuam ntawm cov lus cog tseg tau khi lus kom nco qab ntsoov Khetos txoj kev txi thaum lawv ua txoj kab ke tshiab, dawb huv, thiab zoo no.”1
Txwj Laug Jeffrey R. Holland ntawm Pawg Kaum Ob tug Thwj Tim.
Peb Rov Qab Khi tej Lus Peb Khi Thaum Peb Ua Kev Cai Raus Dej dhau ntawm Kev Txais lub Cim Nco Txog
“Thaum peb ua kev cai raus dej, peb ris rau peb tus kheej Yexus Khetos lub npe dawb ceev. Qhov uas peb ris Nws lub npe yog ib yam tseem ceeb tshaj uas muaj los rau peb hauv peb lub neej no. … …
“Txhua lub lis piam hauv kev sib ntsib txais lub cim nco txog peb cog lus hais tias peb yuav nco qab ntsoov txog peb tus Cawm Seej txoj kev txi thaum peb rov qab khi tej lus peb tau khi tseg thaum peb ua kev cai raus dej. Peb cog lus hais tias peb yuav ua ib yam li tus Cawm Seej tau ua—kom ua raws li Leej Txiv txoj lus thiab ceev Nws tej lus txib tsis tu tsis tseg li. Txoj koob hmoov uas peb txais kom pauj tau qhov uas peb ua ntawd yog kom tau Nws tus Ntsuj Plig nrog peb nyob ua ke txhua lub sij hawm.”2
Txwj Laug Robert D. Hales ntawm Pawg Kaum Ob tug Thwj Tim.
“Kuv tau nyob nrog ib tug me nyuam ntxhais yim xyoo thaum hnub uas nws ua kev cai raus dej. Thaum hnub ntawd xaus tus ntxhais hluas ntawd zoo siab hlo hais tias, ‘Kuv twb ua tau kev cai raus dej ib hnub tag nrho lawm, thiab kuv tsis tau ua txhaum ib zaug li!’ Tiam sis nws hnub zoo kawg nkaus ntawd yeej tsis muaj ntev, thiab kuv paub hais tias tej zaum nws twb kawm, ib yam li peb txhua tus kawm, hais tias txawm peb rau siab npaum li cas, los peb zam tsis tau qhov kev phem los yog qhov kev xaiv phem txhua lub sij hawm. …
“… Peb tsis muaj peev xwm kho peb tus kheej peb ib leeg nkaus xwb. Txawm peb muaj siab npaum li cas los yog xav hloov npaum li cas los li ntawd xwb tsis txaus. Thaum peb yuam kev los yog xaiv qhov tsis zoo, ces peb yuav tsum muaj peb tus Cawm Seej pab peb kom thiaj rov qab taug tau txoj kev zoo. Peb noj lub cim nco txog ib lis piam dhau ib lis piam kom qhia hais tias peb muaj siab ntseeg hais tias Nws muaj lub hwj chim txaus kom hloov peb tej siab. Peb lees txim txhaum thiab cog lus tias peb yuav tso tej kev txhaum ntawd tseg.”3
Julie B. Beck, Koom Haum Niam Tsev tus tuam thawj tswj hwm.
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais ua lus Hmoob: 6/09. Kev txhais Visiting Teaching Message, June 2010. Hmong. 09366 295