Sa Ou Filifili Ou te Le Inu Lava i Meainu Malolosi

Ao ou malaga atu i le konafesi a le autalavou i Stuttgart, Siamani, sa ou maua se avanoa ma te fefaasoaai ai ma se tina matua e uiga i le malumalu ma lo’u faatuatua i le talalelei toefuataiina. Sa masani o ia i le Ekalesia ma sa i ai si ona malamalamaaga i nisi o aoaoga faavae o le talalelei.

Peitai, i le taimi o le ma talanoaga, sa ta’u mai e lenei tina se mea na ou faanoanoa ai. Ina ua folasia atu ia te ia le Ekalesia e sana uo o le Au Paia o Aso e Gata Ai pe tusa ma le 40 tausaga talu ai, o se mea na ta’u atu e lana uo sa manino pea i lona mafaufau. “E le faatagaina au e inu i se meainu malosi,” o le tala lea a lana uo. Sa toe faaopoopo mai le tina o loo ia iloaina nisi o le Au Paia o Aso e Gata Ai o loo tagofia meainu malolosi “i lea taimi ma lea taimi.”

E ese mai i mafaufauga o lenei tina, e le faamalosia e le talalelei se tasi. E tofu uma i tatou ma le aia tatau e faia ai a tatou lava faaiuga. Sa tuuina mai e le Tama Faalelagi le Upu o le Poto e fesoasoani tatou te tausia ai ma le paia o tatou tino, ae e tatau ona filifili le tagata lava ia pe ola ai i Lana tulafono o le soifua maloloina aua na Ia tuuina mai foi ia i tatou le pule saoloto.

Sa tonu ia te au i ni nai tausaga ua tuanai atu ina ua papatisoina au o le a ou mulimuli ia Iesu Keriso. Mo lena mafuaaga, ou te le inu ai lava i ni meainu malolosi. O poloaiga a le Atua o ni meaalofa mo i tatou, ma afai tatou te tausiaina, o le a toe taitaiina atu ai i tatou ia te Ia.

Mai i lenei feiloaiga faigofie, sa faamanatu mai ai ia te au i le avea ai o se tagata o le Ekalesia a le Alii, o i tatou o ni faataitaiga e le aunoa i isi. Ae peitai, tatou te filifili po o le a lena faataitaiga.◼