Ua Uma Ona E Iloa

I se tasi aso i le aoga, sa ma talanoaina ai se mataupu faalelotu ma se tasi o tamaiti o la’u vasega. O le tamaititi lenei o la’u vasega sa le taliaina ma sa amata ona faitio i mea sa ou talitonuina.

Sa ia vaai mai i ou mata ma fai mai, “E te talitonu lava na o lau Ekalesia aua sa aoao ai oe e ou matua. Ana leai, e te le talitonu i ai.”

Ou te le manatua la’u tali na fai ia te ia, ae sa ou mafaufau pea i lana tala ma ou manatu ai pe aisea na ia fai mai ai lena tala ia te au. Sa ou ola ae i totonu o le Ekalesia, ma, e moni lava, ou te lei fesiligia lava aoaoga o le Ekalesia po o mataupu faavae. Mai lava i lo’u laitiiti, sa ou lagonaina e moni le Ekalesia. A o lei papatisoina au, sa faitau faatasi e lo’u aiga le Tusi a Mamona, ma sa ou iloa ai e moni. E lei faapea sa na ona ou talitonu; sa ou iloa ma se leai ni masalosaloga. Ae ou te lei mautinoaina lava le taimi faapitoa sa ou maua ai lena molimau. Mo sina taimi sa faalavelave lava ia te au. Sa ou manao e maua se aafiaga faapitoa pe a ou tatalo ma ia vave lava ona oo mai le tali ia te au. E lei tupu lava.

Ae o le mea sa ou iloaina o le taimi na mai ai la’u molimau. Ina ua maea lo’u tausaga muamua i le aoga maualuga, sa matou o ai ma nisi o le autalavou e matamata i nofoaga o le talafaasolopito o le Ekalesia. Ina ua matou taunuu atu i le Vao Paia, sa valaaulia matou e lo matou taitai malaga e saili se faamautinoaga o le mea sa tupu iina o se mea moni lava: sa faaali le Atua le Tama ma Iesu Keriso ia Iosefa Samita ma amatalia ai le Toefuataiga. Sa ou mauaina se mea paganoa i le togalaau ma faitau ai i le tala o le Uluai Faaaliga. Ona ou tootuli ifo lea i lalo ma tatalo. Sa ou iloa lava o le Uluai Faaaliga na oo mai, ma o Iosefa Samita o se perofeta. Ae na ou fesili pea. Na uma la’u tatalo, ma sa leai se mea na tupu. E leai ni faalogoga faapitoa, leai se faaaliga, leai ni agelu. Leai lava se mea.

Sa ou tau i se maa ma ou nofo ifo i lalo ma tatala lo’u faamanuiaga faapeteriaka ma amata ona faitau. O lo’u faamanuiaga na ta’ua ai le Toefuataiga o le talalelei, ma i lo’u mafaufau na toe ta’ua ai upu nei: “Ua uma ona e iloa. Ua uma ona e iloa.”

Ana mafai ona ou toe foi i tua i le taimi na luiina ai au e lo’u uo e uiga i o’u talitonuga, ou te le iloa pe faapefea ona ou ta’u atu ia te ia ou te iloa e moni le Ekalesia. Peitai sa ou moomoo maimau pe ana ou ta’u atu ia te ia e ui ina sa aoaoina au e o’u matua i mea sa la iloa e moni, ae sa ou sailia lena tali mo a’u lava ia. Ma sa ou faia.

Sa le manaomia ona ou alu i le Vao Paia e iloa ai e moni le Ekalesia. Sa ou le manaomia ni aafiaga maoae e iloa ai e moni le Ekalesia. Sa na o na manaomia e faamanatu mai, “Ua uma ona e iloa.”