“Na ou tatalo ma suesue i tusitusiga paia mo se taimi umi, ae e foliga mai e lei maua lava se tali i au fesili. Aisea e le faamanuiaina ai au e le Alii i se molimau?”

Ou te malamalama i le tulaga o loo e i ai. Sa ou tauivi i taimi o faigata ma sa maluelue ai la’u molimau. O le auala na ou taulimaina ai—ma maua ai le molimau malosi o loo ia te au nei—o le suesueina o tusitusiga paia ma le tatalo e le aunoa. Sa faitau au tusitusiga paia i avanoa uma sa ou maua. Sa ou tatalo i le taeao ma le po, i lo’u taumafai ia lagonaina le Agaga. Ae na foliga e lei manuia mea uma. Ae i se tasi aso, ina ua ou foi atu i le fale mai le aoga, sa ou tootuli ifo i autafa o lo’u moega. Ou te lei iloa le umi na ou tatalo ai, ae sa ou mauaina se tali. Na o le tatalo lava e le aunoa. Suesue i tusitusiga paia. O le a e maua lava le tali sa e sailia.

E silafia e le Tama Faalelagi lou loto ae e te lei fesili atu; o loo faatalitali mai o Ia e te tuuina atu au fesili ia te Ia e ala atu i se tatalo ma le loto faamaoni. E i ai sa’u molimau patino e tali mai o Ia i tatalo. Atonu o le a e mauaina se tali i le taimi lava lea, pe umi atu foi sina taimi, ae ou te mautinoa lava e tali mai o Ia. Ia onosai ma ia tumau lou faatuatua.

Tatalo mo se taitaiga i le sailiina o le atamai patino. E faafofoga ma tali mai le Tama Faalelagi i a tatou tatalo uma. O tali e oo mai lea i musumusuga a le Agaga Paia. Ole atu i le faatuatua, ia lotomaualalo, tausi poloaiga, ‘ai ma inu ma le agavaa i le faamanatuga, faaavanoa se taimi e mafaufau loloto ai i tusitusiga paia, ma saili ma le onosai le finagalo o le Alii.

Na aoao mai taitai o le Ekalesia i le faaopoopo i ai i le ole atu, e tatau ona tatou faasoa a tatou molimau i mea o loo tatou fia iloaina, e tusa lava pe tatou te lei maua se tali mautu. Sa ou tatalo mo se molimau i le tele o taimi ma sa lei maua se molimau sa ou sailia sei vagana ai le taimi na faasoa atu ai lau molimau i le talalelei ma le Toefuataiga. E ui lava ou te lei mauaina lava se molimau mautu, ae sa ou mauaina lena faamautinoa manino, lemu, ma le malosi o le Agaga Paia. Ou te iloa afai e faasoa atu lau molimau, o le a faamalosia e le Alii.

O le a saunia e le tatalo ma le anapogi se eleele faaleagaga lea o le a ola ae ai lau molimau, ma o lau molimau o le a avea o se malosiaga ma se taula e fesoasoani ai ia te oe e tetee atu ai i tofotofoga ma faaosoosoga uma. E maua le molimau e ala i faaauau ai pea; ae fesoasoani lo tatou filifiliga ia lagona le upu moni. O le tele o taimi e tatau ona tatou anapopogi ai e pei ona faia e Alema (tagai Alema 5:45–46). Atonu e laitiiti lau molimau i le taimi muamua, ae a faaauau pea ona e tatalo ma suesue i tusitusiga paia, o le a amata ona e vaai i fua o lou faatuatua.

I le avea ai ma se tagata fou faatoa liliu mai sa ou mauaina se avanoa e alu ai i le malumalu e faia ni sui papatisoga mo ou tuaa. A o ou tu i le vai e faataunuu lenei sauniga paia, sa malosi lava se uunaiga ia te au o le sauniga o le sui papatisoga mo e ua maliliu e faalelagi. Ma i lena taimi sa mafai ona fausia sau molimau e uiga i le sui papatisoga mo e ua maliliu. O lou malamalama, o le molimau o lona uiga o se faaaliga faalelagi i se tagata e faatuatua. Ina ia maua se molimau, e tatau ona tatou tatalo, suesue a tatou tusitusiga paia, ma usiusitai i aoaoga a Iesu Keriso. O le olaga amiotonu o le faavae lea o molimau uma; i se isi itu, e le mafai ona molimau mai le Agaga i le galuega a le Alii i o tatou vaitaimi.

O le mauaina o se molimau e mafai ona tele se taimi e alu ai. E tele ni mea e mafai ona e faia ina ia e maua ai se molimau mausali. Ae aua lava le fiu e ole atu i le Tama Faalelagi mo tali o a’u tatalo.

O nisi taimi e le tali vave maia a tatou tatalo. E ono moomia e tali se taimi ma o le a oo mai e tusa ai ma manaoga o le loto o se tasi. O se tasi o uiga o se Au Paia o le onosai. Faaauau ona tatalo, suesue i tusitusiga paia, tausi i poloaiga, ma faalogo i molimau a isi. Ma ia gauai atu i musumusuga a le Agaga Paia. O tali e ono oo mai ae e te leo mafaufauina.

E naunau lava e le aunoa le Tama Faalelagi e tali mai ia i tatou; peitai, e i ai le mea o loo i totonu ia i tatou e ono taofia ai i nisi o taimi le mauaina o tali o loo tatou sailia. Ou te mafaufau o le auala sili lava e maua ai se molimau o le filemu lea, i le faaleagaga faapea i le faaletino. O le ala lea, pe a tatou tatalo ma faitau i tusitusiga paia, o le a tatou saunia e talia.