Taata apî

Ua taupupu rii au i te iteraa e ua fariihia vau i roto. Aita i maoro a‘e nei ua taui to‘u utuafare te fenua o te vahi nohoraa. Te vai ra i roto i te paroita o ta matou i haere atu hoê pŭpŭ rahi feia apî, area râ, o te taime matamua teie e riro ai au ei « taata apî ». Te mea ino roa e mea ti‘a ia‘u ia haere i te hoê fare haapiiraa apî, e ua tae mai te mana‘o vitiviti i roto i to‘u feruriraa, « o vai te parahi mai i pihai iho ia‘u i te tamaaraa o te avatea ? » Penei a‘e e ite atu vau i te hoê no te fare pureraa, tera râ aita vau e hinaaro e haere noa i ni‘a i te airaa maa o te avatea a te tahi ê, hau atu, aita vau i ite e auhia mai anei au i reira !

E au ra te mahana matamua i te fare haapiiraa aita e hopearaa to’na. I te hopearaa, te ta‘i mai nei te oe o te tamaaraa. A tomo marû noa ai au i roto i te fare tamaaraa, ua pure au i te Metua i te ao ra ia tauturu ia‘u ia ite i te hoê taata ta‘u i matau. Ua hi‘ohi‘o haere au e ati noa‘e ia ite au i te hoê. Aita roa. No reira ua haere atu vau i te airaamaa i te tahi pae o te fare tamaaraa e ua amu i ta‘u maa.

I taua mahana ra i roto i te piha haapiiraa no te numera, ua ite atu vau i te hoê mata ta‘u i matau. Ua ite au ia David i taua po‘ipo‘i ra i te haapiiraa evanelia. Ua ani mai oia ia hi‘o i ta‘u tarena e ua ite ihora e hoê â ta maua taime tamaaraa. « Hei, ihea roa oe i te tamaaraa i teie mahana ? » parau mai nei oia.

Pahono atu ra vau, « ua tamaa vau i te tahi pae o te fare tamaaraa ».

Parau mai nei oia, « ananahi, e haere mai oe e parahi i pihai iho ia‘u ».

Te oaoa nei au no te hoê Metua i te Ao ra, o tei ite i to tatou hinaaro e o te pahono nei i ta tatou mau pure. Te oaoa atoa nei au i te taata o tei hinaaro i te horo‘a i te rima no te auhoaraa. Te hoê mea ohie roa mai te hoê titau-manihini-raa, e nehenehe te reira e taui i te mau mea’toa.