Mekem Tempol I Kam Wan Pat blong Laef blong Yu

Ol yang man mo yang woman we oli gat 12 yia i go antap mo oli klin inaf; oli save visitim tempol blong oli baptaes long bihaf blong ol bubu blong olgeta we oli bin ded finis be oli no bin baptaes yet. Presiden Tomas S. Monson i tokbaot glad we seves ia i karem i kam:

“Wan moning taem mi stap wokbaot i go long tempol, mi luk wan grup blong ol yang woman we, eli long moning ia, oli bin tekempat long ol baptaes blong olgeta we oli bin ded finis. Hea blong olgeta i wetwet. Ol smael blong olgeta i saen. Ol hat blong olgeta i fulap wetem glad. Wan gel i tanem hem i gobak mo i fesem tempol mo i talemaot ol filing blong hem. ‘Hemia i bin wan bes dei long laef blong mi,’ hem i talem.”¹

Jesika Han blong Davne, Alabama we i gat tetin yia, i bin baptaes long bihaf blong sam bubu blong hem long Atlanta Jojia Tempol. Nomata we i tekem faef aoa blong travel i go long tempol, hem i talem se eksperiens blong hem i gud tumas. “Blong save werem ol waet klos mo baptaes long bihaf blong ol bubu blong mi, i givim wan bigfala filing long mi,” hem i talem. “Mi filim se naoia mi save olgeta.”

Sapos i posibol go oltaem long tempol. Yu save gat eksperiens longwe long glad taem yu helpem ol narafalawan blong oli kasem ol blesing blong baptaes.

I gat plante wei blong sapotem tempol wok, nomata sapos yumi no save go oltaem long tempol. Yu save lanem abaot ol bubu blong yu mo luk sapos oli bin mekem tempol odinens blong olgeta finis. Yu save help blong lukaotem ol yangfala pikinini taem papa mo mama blong olgeta i go long tempol. From tempol seves i tokbaot tumas ol famle, yu save wok blong mekem famle blong yuwan i kam strong moa. Mo yu save serem wetem ol narafala, testemoni blong yu se tempol hem i tru haos blong Lod.

From tempol hem i wan tabu ples, Lod i bin putum ol hae standet blong yumi laef folem bifo yumi save go insaed long tempol. Presiden Dita F. Ukdof i bin eksplenem se “ol standet we Lod i bin putum insaed long ol kwestin blong tempol rekomen i semmak long ol standet we i stap insaed long buk iaBlong Ol Yut Oli Kam Strong. Long ol taem blong pis, be tu, long ol taem blong bigfala temtesen, ol standet ia mo givhan blong Tabu Spirit bae i save helpem yu blong mekem ol raet joes. … Olsem wanem yu yusum ol standet ia bae i soemaot huia yu mo wanem yu stap lukaot blong kam olsem.”²

Laef folem ol standet blong Lod, mo stap klin inaf blong go insaed long tempol. Blong gat wan strong tingting blong go insaed long tempol long fiuja i save helpem yumi blong tanem baksaed long temtesen tedei. “Hem i givim long yu wan risen blong stap klin inaf,” Malon Ruis, 16 yia, we i blong Sanraes, Florida i bin talem. “Sapos yu gat gol ia blong wok from, bae yu stap tingbaot oltaem wanem yu stap mekem; from yu no save go insaed long tempol sapos yu no klin inaf.”

“Mi luk tempol mo mi tingting blong mared long hem wan dei,” Anika Retmea, we i gat 16 yia, blong Oslo, Nowei i bin talem. “Mi save se ol promes we yu mekem long ol tempol i ol promes wetem Lod. Ol samting we yu lanem longwe bae oli no save jenis o lus.”

Kipim wan pikja blong tempol samples we yu save luk oltaem, mo stap lukluk i go long fored long dei ia taem bae yu save kasem ol tempol odinens blong yuwan.

Taem hem i gat 14 yia, Jodi Haselbaka blong Amerika Fok, Yuta, i bin visitim Maot Timpanogos Yuta Tempol long taem blong open haos. “Taem mi stap wokbaot tru long rum blong woman we bae i mared, mi bin stop smol mo lukluk i go long mira,” hem i stap tingbaot. “Taem mi lukluk i go, mi save luk miwan long fiuja, we mi stap werem wan naesfala dres blong mared mo wan bigfala smael long fes. Mi save se hemia ples we bae mi mared long hem, insaed long tempol, kolosap long Papa blong mi long Heven.”