Wanem Nao Stamba Tingting blong Ol Tempol Ia?

I no bin gat wan man o woman we, long wan taem blong kwaet tingting abaot hemwan bakegen, i bin tingting hevi long ol series samting blong laef?

Hem i no bin askem, “Mi kam long wea? From wanem mi stap ia? Mi stap go wea? Wanem nao rilesensip blong mi wetem Man Ia we I Bin Mekem mi? Bae ded i save tekemaot mi long ol gudfala rilesensip we mi bin mekem long laef ia? Olsem wanem long ol rilesensip blong mi wetem famle blong mi? Bae i gat wan laef bakegen afta long laef ia, mo, sapos i gat, bae mifala i savsave mifala bakegen longwe?”

Ol ansa long ol kwestin ia oli no faenem long waes blong wol. Oli faenem nomo long ol toktok blong God we Hem i bin soemaot. Ol tempol blong Jos blong Jisas Kraes blong Ol Lata-dei Sent oli ol tabu bilding we yumi save kasem ol ansa blong ol kwestin ia mo, ol ansa blong ol narafala kwestin we i no save finis. Wanwan tempol oli dediketem olsem wan haos blong Lod, wan ples blong tabu mo pis we i stanap hemwan long wol ia. Long tempol, oli tijim ol trutok mo oli mekem ol odinens we oli karem save abaot ol samting we i no save finis mo, i mekem olgeta we oli tekempat long hem oli laef wetem wan save long raet blong yumi we i kam long God olsem ol pikinini blong God mo wan luksave long ol paoa we yumi save kasem olsem ol man we i no save finis.

Ol bilding ia, oli defren long ol taosen nara Jos haos blong wosip we oli stap raon long wol, oli defren long stamba tingting mo wok long ol narafala tabu bilding. Hem i no saes blong ol bilding ia o hamas bilding ia i naes we i mekem olgeta i defren. Hem i wok we oli stap mekem insaed long ol wol blong hem.

Fasin blong bildim sam kaen bilding blong mekem ol spesel odinens, we oli seperet long ol nomol ples blong wosip, hem i no niu. Hemia i sem praktis long Isrel blong bifo, we ol pipol oli bin stap wosip nomo long ol haos blong prea. Ples blong olgeta we i moa tabu i bin, faswan, tabenakol ia long ples we i no gat man long hem, wetem Tabu blong Ol Tabu Ples blong hem, mo afta wan laen blong ol tempol, we oli bin mekem ol spesel odinens insaed long olgeta mo olgeta we oli kasem ol stret kwalifikesen blong hem nomo oli save tekempat long ol odinens ia.

Hemia i semmak tedei. Bifo dedikesen blong wan tempol, Jos blong Jisas Kraes blong Ol Lata-dei Sent i invaetem pablik blong go insaed long bilding ia mo lukluk ol defren seves mo samting we oli stap insaed. Be taem oli dediketem haos ia; hem i kam haos blong Lod, we oli mekem wetem fasin blong mekem samting i tabu we ol memba blong Jos we oli klin inaf nomo oli gat raet blong go insaed long hem. Hem i no from hem i wan sikret. Be hem i from hem i tabu tumas.

Wok we i stap go insaed long ol bilding ia i stap soemaot ol stamba tingting blong God we i no save finis long saed blong man, we hem i pikinini mo kriesen blong God. Long bigfala pat blong wok ia, tempol wok hem i abaot famle, abaot wanwan long yumi olsem ol memba blong famle blong God we i no save finis mo abaot wanwan long yumi olsem ol memba blong ol famle long wol ia. Hem i abaot tabu fasin mo fasin we i no save finis blong kavenan blong mared mo ol famle rilesensip.

Ol tempol i talemaot stret se wanwan man mo woman we i bon long wol ia i wan pikinini blong God, we i bin kasem samting blong fasin blong Hem we i kam long God. Fasin blong stap ripitim ol besik mo stamba tijing ia i mekem wan gudfala samting long olgeta we oli kasem ol tijing ia, from taem we oli prisentem klia doktrin long lanwis we i naes mo gud tumas, olgeta oli kam blong luksave se from evri man mo woman i wan pikinini blong Papa long Heven, nao wanwan hem i wan memba blong wan famle we i kam long God; mekem se, evri man o woman, hem i brata o sista blong hem.

Taem tija blong loa i askem, “Wanem loa blong God we i hae moa long ol narafala loa, mo i nambawan blong folem?” Sevya i bin ansabak, “Yufala i mas lavem Hae God ya we i God blong yufala long olgeta hat blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala: [hemia i fas loa].

“Mo namba tu long ol loa ya i talem se, ‘Yufala i mas lavem ol man we oli stap raonabaot long yufala olsem we yufala i stap mekem i gud long yufala” (Mak 12:28, 30–31).

Ol tijing we oli prisentem insaed long ol tempol tedei i poenemaot strong impoten tingting ia blong diuti blong yumi long Man we I Bin Mekem yumi mo long ol neiba blong yumi. Ol tabu odinens ia oli developem tabu tingting ia abaot famle blong God. Ol tabu odinens ia oli tijim se spirit insaed long wanwan long yumi i no save finis, be i no semmak wetem bodi, we i save ded. Oli no givim nomo andastaning abaot ol bigfala trutok, be tu, oli pusum olgeta we oli tekempat blong lavem God mo leftemap tingting blong olgeta blong soemaot wan bigfala fasin blong stap kaen long ol narafala pikinini blong Papa blong yumi.

Taem yumi akseptem prinsipol ia se wanwan man hem i wan pikinini blong God, hem i helpem yumi blong luk se i gat stamba tingting we i kam long God long laef long wol ia. Ples ia bakegen, long wol, insaed long haos blong Lod, oli tijim ol trutok we oli oli kam tru long revelesen. Laef long wol hem i pat blong wan longfala rod we i no save finis. Yumi bin laef olsem ol spirit pikinini bifo yumi bin kam long wol ia. Ol skripja oli testifae long hemia. Yumi witnesem long ol toktok blong Lod long Jeremaea: “Taem mi mi no wokem yu yet long bel blong mama blong yu, be mi mi save yu finis. Mo taem yu no bon yet, be mi mi jusumaot yu, mo mi makemaot yu, mi mekem yu yu tabu, blong kam wan profet, blong yu talemaot tok blong mi long ol man blong olgeta kantri long wol” (Jeremaea 1:5).

Yumi kam long laef ia olsem ol pikinini blong wan papa mo mama blong wol ia mo, olsem ol memba blong wan famle. Ol papa mo mama oli patna wetem God blong mekem ol stamba tingting blong Hem we i no save finis i hapen, hemia long saed blong ol pikinini blong Hem. From hemia, famle i wan oganaesesen we i kam long God, we hem i moa impoten, tugeta, long wol ia mo long taem we i no save finis.

Plante wok we i stap gohed insaed long ol tempol hem i abaot famle. Semmak olsem we hem i impoten blong yumi andastanem mining blong hem, hem i impoten tu blong yumi luksave trutok ia, se nomata we yumi bin stap laef olsem ol pikinini blong God bifo yumi bin bon i kam long wol ia, bambae yumi gohed blong laef afta long ded, mo ol gudgudfala rilesensip blong laef ia we yumi stap holem taet, olgeta ia we i moa naes we yumi faenem i stap insaed long famle, bae oli gohed long wol we i stap kam.

Taem wan man mo woman i mared long haos blong Lod, oli joen, i no blong taem blong laef blong olgeta long wol ia nomo, be, blong taem we i no save finis. Oli joen tugeta anda long atoriti we i no blong loa blong kantri we i joenem tufala kasem ded nomo, be tu, tru long prishud blong God we i no save finis, we i joenem long heven hemia we oli joenem long wol. Kapol ia we tufala i mared, i gat promes long revelesen we i kam long God se bae rilesensip blong tufala mo hemia blong ol pikinini blong tufala bae i no en wetem ded nomo; be, bae i gohed long taem we i no save finis, sapos oli stap laef klin inaf from blesing ia.

I no bin gat wan man we i lavem tru wan woman, o wan woman we i lavem tru wan man, mo i no bin prea se bae rilesensip blong tufala bae i gohed afta long ded? I neva bin gat wan pikinini we papa mo mama blong hem oli bin berem hem mo tufala i no wantem gat promes ia se bae pikinini we tufala i lavem tumas ia bae i blong tufala bakegen long wan wol we i stap kam? Wan man we i biliv long laef we i no save finis bae i save gat tu tingting se God blong heven bae i givim long ol boe mo gel blong Hem wan gudfala fasin blong laef ia, we hem i lav we oli faenem stret mining blong hem long ol famle rilesensip? No, from God i lavem yumi, bae ol famle rilesensip bae oli gohed afta long ded. Hat blong man i wantem se bae ol famle rilesensip bae i gohed, mo God blong heven i bin soemaot wan wei we yumi save kasem. Ol tabu odinens blong haos blong Lod nao bae oli provaedem wei ia.

Be evriwan long ol samting ia bae yumi luk se i no stret sapos ol blesing blong ol odinens ia oli blong olgeta we oli ol memba blong Jos blong Jisas Kraes blong ol Lata-dei Sent nomo. Trutok hem i we janis blong kam insaed long tempol mo tekempat long ol blesing blong hem, i open long evriwan we bae oli akseptem gospel mo baptaes i kam long Jos. From risen ia, Jos i putumaot wan bigfala misinari program long plante ples long wol mo bae i gohed blong mekem program ia i kam bigwan; from program ia i gat responsabiliti, anda long revelesen we i kam long God, blong tijim gospel i go long evri kantri, famle, lanwis, mo pipol.

Be i gat ol nara milian man we oli bin laef long wol ia mo we oli neva gat janis blong harem gospel. Bae olgeta oli no save gat ol blesing ia we ol tempol blong Lod oli stap givimaot?

Ol semfala odinens ia oli stap tu blong olgeta we oli bin ded finis; tru long ol proksi (ol naraman) we oli laef we oli stanap long bihaf blong olgeta we oli ded. Long spirit wol, olgeta sem man ia oli fri blong akseptem o blong no akseptem ol odinens blong wol ia we wan i bin mekem blong olgeta, we i baptaes, mared, mo siling blong ol famle rilesensip. Oli no fosem man blong mekem wok blong Lod, be i mas gat janis.

Bigfala wok ia i olsem wan bigfala wok blong lav we i kam long olgeta we oli stap laef long bihaf blong olgeta dedman. Hem i mekem se i mas gat wan bigfala wok blong lukaotem famle histri blong faenem mo luksave olgeta we oli bin laef bifo long yumi. Blong help long wok blong lukaotem ol dedman ia, Jos i daerektem wan famle histri program mo i lukaotem ol bilding mo tul blong lukaotem famle we i no gat long eni nara ples long ful wol ia. Ol rekod blong hem i open long pablik mo plante we oli no memba blong Jos oli stap yusum blong lukaotem ol bubu blong olgeta. Program ia, ol man blong stadi long famle laen (jeneaolojis) raon long wol oli stap presem mo sam kantri oli bin yusum blong protektem ol rekod blong olgeta. Be stamba tingting blong hem i blong givim ol risos we ol memba blong Jos oli nidim blong faenem ol bubu blong olgeta; hemia bae i save givim long olgeta ol blesing we olgetawan i save harem gud long hem. Bae oli save talem long olgetawan, “Sapos mi lavem waef mo pikinini blong mi tumas mekem se mi wantem olgeta blong taem we i no save finis, bae bubuman mo papa blong bubuman blong mi mo ol nara bubu blong mi we oli ded finis bae oli no gat sem janis ia blong kasem ol blesing we i no save finis ia?”

Mo tu, ol tabu bilding ia oli ol pikja blong ol gudfala aktiviti we oli stap mekem insaed, we oli kwaet mo i soem respek. Oli mekem yumi tingbaot long maen blong yumi abaot wan pat blong visen blong Jon, man blong luk ol revelesen, we oli rekodem kwestin ia mo ansa ia: “E!? Ol man ya we oli werem waet klos, yu save olgeta? Yu save weples olgeta oli kamaot long hem? …

“Hemia ol man ya we oli kasem bigfala trabol, we ol man oli spolem olgeta tumas, be naoia oli winim ol trabol ya finis. Oli wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet.

“Mo naoia, oli stap stanap long fes blong God we hem i stap sidaon long bigfala jea blong hem, mo long dei mo long naet, oli stap mekem wosip long hem insaed long [tempol] blong hem” (Revelesen 7:13–15).

Olgeta we oli kam long ol tabu haos ia oli werem ol waet klos taem oli tekempat insaed. Oli kam, i no from rekomendesen blong ol lokol jos atoriti blong olgeta, we i talem se i tru we oli klin inaf. Be, oli wantem luk se oli mas kam wetem klin tingting, klin bodi, mo klin klos blong kam insaed long tempol blong God. Taem oli kam insaed, bae oli mas livim wol biaen long olgeta, mo tingting hevi long ol samting we i kam long God.

Aktiviti ia, sapos yumi save singaotem olsem, i karem wetem hem ol gudfala samting blong hemwan; from huia nao we long ol taem we tumas samting i trabolem maen blong hem bae i no wantem welkamem wan janis blong sarem doa long wol mo kam insaed long haos blong Lod, mo long ples ia, bae hem i stap kwaet mo tingting hevi long ol samting we i no save finis blong God? Ol tabu tempol ia i givim janis, we i no gat long eni narafala ples, blong lanem mo luklukbak ol samting blong laef we oli gat tru mining—rilesensip blong yumi wetem Hae God mo rod blong yumi we i no save finis stat long laef bifo i kam kasem laef ia long wol ia, i go kasem fiuja laef we bae yumi save ol narafalawan mo joen wetem olgeta, wetem tu, olgeta we yumi lavem tumas mo ol bubu blong yumi we oli bin stap bifo long yumi, we tru long olgeta ia nao, yumi kasem raet blong yumi ia blong kasem ol samting long saed blong bodi, maen, mo spirit.

I tru ol tempol ia oli wan kaen nomo long medel blong evri bilding. Oli ol haos blong instraksen. Oli ol ples blong kavenan mo ol promes. Long ol olta blong hem, yumi nildaon long fored blong God, Krieta blong yumi, mo oli givim ol promes blong ol blesing blong Hem we i no gat en long yumi. Long ol tabu ples blong ol tempol, yumi toktok wetem Hem mo tingting long Pikinini blong Hem, Sevya blong yumi mo Ridima, Lod Jisas Kraes, we i bin stap olsem wan proksi long wanwan long yumi long bigfala sakrifaes long bihaf blong yumi. Long ples ia, yumi lego wanwan fasin blong selfis blong yumi mo givim seves long olgeta we oli no save mekem samting blong olgetawan. Long ples ia, anda long tru prishud paoa blong God, bae yumi save stap tugeta long wan rilesensip we i moa tabu long evri rilesensip blong man long wol ia—olsem ol hasban mo waef, olsem ol pikinini mo papa mo mama, olsem ol famle anda long wan siling ia we taem i no save brekemdaon mo ded i no save stopem.

Ol tabu bilding ia oli bin bildim tu long ol yia blong hadtaem, taem ol rabis man oli stap ronemaot ol Lata-dei Sent mo oli stap spolem nogud olgeta oltaem. Oli bin bildim mo lukaotem gud ol tempol ia long ol taem we ol memba oli pua mo long ol taem we ol memba oli gat plante samting. Oli kam from bigfala fet blong wan namba blong ol memba we i stap gro i kam antap oltaem, we oli talemaot witnes blong olgeta abaot wan God we i stap laef, abaot Lod we i bin laef bakegen long ded, abaot ol profet mo revelesen we i kam long God, mo abaot pis mo promes blong ol blesing we i no save finis we oli save faenem nomo insaed long haos blong Lod.