Kirismas en Misineri

Ni keriaun Kirismas ni ahi wia misineri me kin kalohk rahn koaros, ngehi oh iengeio wie mwemweit rehn towe men me ahpwetehn pepdaisla oh ah peneinei. Mwurin mwengehn soutik en Kirismas, se ehukihieng irail iren mahsen en Kirismas.

Se peki rehn peneineio en mahleniada kilel kan en soahng kan me katamankihieng irail ansouo, me rasehng usu kan, kisakis kan, kisin sansal kan en imwen mahn oh towe kan ni ipwidi en Sises, oh tuhkehn Kirismas kan. Se eri wadek ekei iren pwuhk sarawi kan, iangahki 2 Nephi 19:6: “Kisin seri kis ipwidiongkitailehr, neitail pwutak emen kohiengkitailehr; oh e pahn wiahla atail kaun; me pahn mwarenki, Sounkaweid Kupurokong, Koht, Wasa Lapalahpie, Sahm Poatoapoat, Nanmwarkien Popohl.” Se koulki “Once in Royal David’s City” (Hymns, nempe 205), kilang kasdohn ipwidien Krais, oh kihda kadehde en Sises Krais.

E wia Kirismas ehu nan irair karakarahk, dohsang aht peneinei kan oh kamadipw kan en Kirismas me se ahn, ahpw se kihda aht kadehde en Sounkomouro, I kehn limpoak loal oh kaping pwehki Ih oh Sapwellime ipwidi laudsang me I ahniki mwowe. I tehkada me e pahn wia keimwseklahn ahi Kirismas nan ahi pwukoa en misineri me kin papah rahn koaros en papah Semei Nanleng, ahpw I wehwehki me Sapwellime Ngehn kak kadehdehieng ie me duwen Sapwellime Iehroso sohte lipilipil wasa me I mihie.