Kitail Kak Kilang Krais?

Ehu nihpwongo pahpa kahlap men wie wadewadek soai pwoat ong nein nah kisin serepein kis me sounpar pahieu ni eh kilengda oh nda, “Pahpa kahlap, kilang usuh ko!” Ohl maho sirei kadek oh nda, “Kitail mihmi nan ihmw, samwa. Sohte usu wasaht.” Ahpw serio ngihtehtehkihte, “Mie usu nan ahmw pereh! Kilang!”

Pahpa kahlapo kilengda oh, pwuriamweiki, kilang densohu mie mwarmwarahk en kisin diper en mete lingaling. E sohte kin sansal pali laud en ansou, ahpw ni ansou me dengkio kin serehda mwahu, mehlel me e mwomwen mohs en usu kei. E sansalda pwehki mesen serihmen kilangada, ahpw re mihmi mwo. Oh sang ansouo kohla, ni ansou me pahpa kahlapo kin aluhlong nan ah pereo oh kilengda, e kak kilang dah me e sohte kak kilang mahs.

Kitail pahn pwurehngehr pidolong nan ansoun Kirismas kaselel me pahn direki keseng oh dengki, kamadipw kan oh kisakis kan. Ahpw nanpwungen aramas koaros, kitail towe kan en mwomwohdiso me kolokol mwahr en Sounkomouro anahne kilang daulih kapwat en liki en ansou wet oh kilang mehlel unsek oh lingan en ansou wet en pahr.

I kin medewe aramas depe nan Pedleem ese me wasao te, karanih irail, Sounkomouro ipwidihier? Iehros en Koht, Mesaia me mie kasikpe ansou werei oh mie inoupe—E ketier nanpwungarail!

Kumwail tamataman dahme tohnlengo ndahieng silepen sihpw kan? “Pwe pwongpwong wet Sounkomouro ipwidiongkumwailehr nan kahnimw en Depit-iei Kaun Mesaia!” Silepe ko ndapene nanpwungarail, “Nna, kitail kolahng mahs Pedleem pwe kitail en kadehde dahme wiawiher wasao, me Kaun-o ahpwtehn mahsanihong kitail” (Luk 2:11, 15).

Duwehte silepen sihpw ko mahs, kitail anahne nda nan mohngiongitail kan, “kitail en kadehde dahme wiawihero” de me pahn wiawi. Kitail anahne inangih nan mohngiongitail kan. Kitail en kilang Me Sarawien- Israel nan dewen kamwonge mahn, nan tehnpas sarawi, pohn nahnao, oh pohn lohpwuo. Duwehte silepen sihpw kan, kitail kihieng kilohri en kapinga Koht pwehki rohng pwoatet en peren laud.

Ekei pak soahng kan me keieu apwal en kilang iei soahng kan me kin wie mihmihte mwohtail. Duwehte pahpa kahlap me sohte kin tehk usu kan pohn densohu, kitail ekei pak sohte kin tehk dah me sansal mehlel.

Kitail me rongehr mahsen kaselel en ketidohn Iehros en Koht, me aledahr Mware oh inoukihier en weid nan Sapwellime ahlo duwehte Sapwellime tohnpadahk ko— kitail uhdahn anahne dehr pa sohte kapwaiada ritingada mohngiongitail kan oh atail madamadau oh kilang Ih ni mehlel.

Ansoun Kirismas kin kaselel ni wiepe tohto. E wia ansou ehu en kemwekid papah kan en kadek oh limpoak en pirien. E wia ansou ehu en ahpwete medemedewe pein atail mour kan oh kapai tohto kan me iei atail. E wia ansou ehu en kihla mahk oh alehdi mahk. E wia ansou ehu en pereniki koul oh keseng oh dengki kan, kamadipw kan oh kisakis kan. Ahpw lingan en ansou wet sohte konehng karotehla atail kak kilang oh kauhkitaildihsang kilang ni mehlel Nanmwarkien Popohl nan Sapwellime lingan.

Kitail koaros wiahda ansoun Kirismas en pahr wet ansou ehu en popohl oh pereperen, ansou ehu me kitail kin pohnese kapwuriamwei me atail Koht Wasalapalahpie poaronehdo Sapwellime Iehros, Sises Krais, en doarehla sampah!