Cov Tub Txib Coob tug hauv Kuv lub Neej

Thawj hnub Sunday uas kuv nrog ob tug tub txib mus tom lub koom txoos, kuv pom ib co neeg uas kuv tau nrog loj hlob thiab paub zoo hauv kuv koog zej zog. Kuv pom kuv ib tug phooj ywg zoo uas kuv tau nrog mus kawm ntawv, ob tug neeg saib xyuas cov ntaub ntawv tom ob lub tsev kawm ntawv theem pib thiab theem nrab, ib tug ntxhais hluas uas kuv tsis tshua ua zoo rau yav nram ntej, thiab ib tug tub hluas uas muaj ib zaug kuv tau nyiam heev.

Cov neeg no txhua tus tau ua yam ntxwv zoo heev rau kuv. Kuv tus phooj ywg zoo tshaj yog ib tug ntxhais hluas uas coj ncaj ncees, thiab vim yog nws tus yam ntxwv, kuv txiav txim siab kawm ntxiv txog lub Koom Txoos. Ob tug neeg saib xyuas ntaub ntawv tom tsev kawm ntawv nco qab txog kuv thiab pab kuv paub hais tias nkawd saib kuv ua neeg tseem ceeb. Kuv kawm txog Vajtswv txoj kev hlub thiab txoj kev siab hlub los ntawm tus ntxhais hluas uas txais tos kuv txawm hais tias kuv tsis tshua ua zoo rau nws yav nram ntej. Tus tub hluas uas kuv tau nyiam heev tau coj yam ntxwv zoo heev rau kuv, npaum li tias kuv pom tau nws qhov kaj thiab xav nyob ze nws.

Tej yam uas muaj no rau kuv no pab kuv kawm, twb yog ua ntej kuv tau ntsib cov tub txib, hais tias Leej Txiv Saum Ntuj Ceeb Tsheej tau npaj kuv txais txoj moo zoo dhau los ntawm cov neeg uas Nws muab tso ib ncig ntawm kuv. Los ntawm lawv txhua tus kuv kawm hais tias tej yam me me uas peb ua kuj pab ua yam ntxwv tau rau lwm tus neeg. Qhov tseem ceeb tshaj, kuv tau kawm hais tias tej hauj lwm ua tub txib tshaj tawm txoj moo zoo pib rau ntawm kuv.