Nej tej Kev Xyiv Fab Yuav Ntau Npaum Li Cas

Tsuas muaj ob peb yam kev xyiv fab xwb thiaj qab zib thiab kav ntev dua qhov uas yus paub hais tias yus tau pab lwm tus neeg coj Yexus Khetos txoj moo zoo uas txum tim rov qab los los rau hauv lawv tej siab tej ntsws. Qhov uas muaj txoj kev xyiv fab no yog ib lub cib fim ntawm txhua tus mej zeej uas koom lub Koom Txoos. Thaum peb tau ua kev cai raus dej, peb tau cog lus tseg hais tias peb yuav “sawv ua Vajtswv tej tim khawv rau txhua lub caij nyoog thiab rau tag nrho txhua txhia yam, thiab nyob tag nrho txhua qhov chaw uas [pe] yuav nyob, kom mus txog thaum tuag, xwv kom [peb] yuav raug txhiv dim los ntawm Vajtswv, thiab raug suav nrog cov uas nyob hauv thawj txoj kev sawv hauv qhov tuag rov qab los, xwv kom [peb] yuav tau txoj sia nyob mus ib txhis” (Mauxiyas 18:9).

Tag nrho cov mej zeej txais yuav ib feem ntawm txoj kev txib rau lub Koom Txoos kom coj tau Yexus Khetos txoj moo zoo mus rau lub ntiaj teb, txawm yog lawv nyob qhov twg los yog lawv nyob ntev npaum li cas. Tus Tswv tau hais meej meej hais tias: “Saib seb, kuv tau txib kom nej mus ua tim khawv thiab ceeb toom cov neeg, thiab tsim nyog txhua tus neeg uas twb tau txais lus ceeb toom lawm mus ceeb toom nws tus neeg zej zog thiab” (D&C 88:81). Cov tub txib qhia txoj moo zoo yuav muaj lub hwj chim qhia lawv cov uas tseem tsis tau yog mej zeej hauv lub Koom Txoos. Cov mej zeej ntawm lub Koom Txoos yuav muaj lub hwj chim kom nrhiav tau lawv cov uas tus Tswv tau npaj rau cov tub txib qhia txoj moo zoo rau.

Peb yuav tsum rau rau siab ntseeg hais tias tus Tswv tau npaj ib co neeg ib ncig ntawm peb kom txais tej kev qhia no. Vajtswv paub hais tias lawv yog leej twg thiab thaum twg lawv yuav npaj lawm, thiab Nws yuav coj tau peb mus nrhiav tau lawv dhau ntawm lub hwj chim ntawm tus Vaj Ntsuj Plig Dawb Huv thiab pab peb hais tau cov lus tsim nyog kom thiaj caw tau lawv los mloog cov lus qhia. Lo lus cog tseg uas tus Tswv hais rau tus tub txib thaum xyoo 1832 kuj yog lo lus cog tseg uas Nws hais rau peb thaum Nws txib kom peb nrhiav kom tau cov neeg uas npaj lawm cia cov tub txib qhia txoj moo zoo rau lawv, Nws hais tias: “Kuv mam li xa tus Nplij Siab los roos nws, uas yuav qhia qhov tseeb rau nws thiab saib nws yuav tsum mus qhov twg; thiab yog tias nws rau siab ntseeg, kuv mam li muab tej re nplej pub rau nws ua kaus mom vaj ntxwv” (D&C 79:2–3).

Thiab lo lus cog tseg uas hais tias tus tub txib uas muaj siab ntseeg yuav muaj kev xyiv fab heev kuj yog cog lus tseg rau peb cov mej zeej uas rau siab ntseeg thiab rau siab tshaj tawm txoj moo zoo.

“Thiab nim no, yog tias nej yuav muaj kev xyiv fab heev vim yog ib tug neeg nkaus xwb uas nej tau coj los cuag kuv hauv kuv Leej Txiv lub nceeg vaj, nej txoj kev xyiv fab yuav hov loj yog tias nej coj tau coob tug neeg los cuag kuv!

“Saib seb, nej muaj kuv txoj moo zoo rau ntawm nej hauv ntej, thiab kuv lub pob zeb, thiab kuv txoj kev cawm seej.

“Thov Leej Txiv tuav kuv lub npe, muaj siab ntseeg hais tias nej yuav txais tau, thiab nej yuav muaj tus Vaj Ntsuj Plig Dawb Huv nrog nej nyob, uas tshwm sim txhua tsav txhia yam uas tsim nyog rau noob neej” (D&C 18:16–18).

Ntxiv rau tus Vaj Ntsuj Plig Dawb Huv uas yuav pab peb pom tau thiab caw tau lawv cov uas twb npaj kawm txoj moo zoo lawm, tus Tswv tau hu thiab cob qhia ib co thawj coj los mus coj peb kev thiab. Hauv ib tsab ntawv uas muaj hnub nyoog lub Ob Hlis Ntuj hnub tim 28, 2002, Thawj Pawg Thawj Tswj Hwm tau muab lub luag hauj lwm lav txoj hauj lwm tshaj tawm txoj moo zoo rau cov npis sov thiab tej pawg ntseeg ris feem ntau.¹ Ua ke nrog tej kev pab los ntawm pawg ntseeg los yog ceg ntseeg pawg sab laj, pawg pov thawj hwj lub rooj tsav xwm coj kev npaj ib lub tswv yim tshaj tawm txoj moo zoo uas pawg ntseeg los yog ceg ntseeg yuav siv. Ua ke nrog lub tswv yim ntawd yog ob peb yam uas qhia saib cov mej zeej yuav ua li cas nrhiav tau cov neeg uas twb npaj lawm txais cov tub txib los qhia txoj moo zoo rau lawv. Muaj ib tug neeg uas lawv hu los mus ua pawg ntseeg los yog ceg ntseeg tus thawj coj saib xyuas kev tshaj tawm txoj moo zoo. Tus saib xyuas kev tshaj tawm txoj moo zoo ntawd nrog cov tub txib uas ua hauj lwm tshaj tawm txoj moo zoo puv sij hawm thiab lawv cov uas txaus siab kawm txoj moo zoo sib raug zoo.

Muaj ob peb yam koj ua tau uas yuav pab koj ua tiav koj lub luag hauj lwm thiab txoj kev lav ris kom nrhiav tau neeg rau cov tub txib qhia txoj moo zoo rau. Qhov yooj yim tshaj yog qhov zoo tshaj thiab.

Thov Vajtswv kom tus Vaj Ntsuj Plig Dawb Huv coj koj kev. Nrog cov thawj coj nyob ze thiab cov tub txib sib tham, nug lawv saib lawv muaj tswv yim li cas, thiab cog lus tias koj yuav pab lawv. Yaum thiab txhawb nqa lawv cov uas nrog koj ua tej hauj lwm no. Thiab ua ib tug tim khawv tag nrho txhua lub sij hawm rau ntawm tej yam uas koj hais thiab ua kom thiaj ua tim khawv qhia hais tias Yexus yog tus Khetos thiab Vajtswv teb cov lus thov txog Nws.

Kuv ua tim khawv hais tias tus Vaj Ntsuj Plig Dawb Huv yuav coj koj mus cuag cov uas nrhiav kom tau qhov tseeb thaum koj thov Vajtswv thiab ua hauj lwm kom tau kev coj kev ntawd. Thiab kuv paub dhau los ntawm tej yam uas tau muaj los rau kuv hais tias koj txoj kev xyiv fab yuav kav ntev ua ke nrog lawv cov uas txais txoj moo zoo los rau hauv lawv tej nruab siab thiab txawm muaj siab ntseeg nyiaj ntev mus.