2011
Kev Txum Tim Rov Qab Los Txhua Tsav Txhia Yam
February 2011

Cov Mus Saib Xyuas tom Tsev tsab Xov, Ob Hlis Ntuj 2011

Kev Txum Tim Rov Qab Los Txhua Tsav Txhia Yam

Ua tib zoo kawm tej ntaub ntawv no thiab, raws li qhov tsim nyog, nrog cov viv ncaus uas koj mus xyuas siab tham txog tej no. Siv cov lus nug kom pab ntxiv dag zog rau koj cov viv ncaus thiab kom thiaj nruab tau lub Koom Haum Niam Tsev tej kev coj ua rau hauv koj lub neej.

Daim Duab
Relief Society seal

Kev Ntseeg • Tsev Neeg • Kev Pab

Tus Yaj Saub Yauxej Xamiv tau txhim tsa lub Koom Haum Niam Tsev ua ib feem tseem ceeb kawg ntawm lub Koom Txoos. Ua ib pawg thawj tswj hwm, peb cia siab hais tias peb yuav pab tau nej kom to taub yog vim li cas lub Koom Haum Niam Tsev thiaj tseem ceeb rau nej lub neej.

Peb paub hais tias cov poj niam hauv Phau Tshiab muaj siab ntseeg rau ntawm Yexus Khetos thiab koom pab Nws ua Nws tej hauj lwm. Lukas 10:39 hais txog Malis, uas “los zaum ntawm Yexus ko taw thiab mloog Yexus qhia.” Hauv Yauhas 11:27 Mathas ua tim khawv txog Khetos hais tias: “Mathas teb hais tias, Yog tiag, tus Tswv! Kuv ntseeg hais tias koj yog tus Mexiyas uas yog Vajtswv tus Tub uas los rau hauv ntiaj teb no.” Cov Tub Txib 9:36, 39 hais txog “ib tug poj niam hu ua Tanpithas, … niaj hnub ua zoo thiab pab cov neeg txom nyem. … Cov poj ntsuam los sawv vij Petus … kom Petus saib tej tsho loj tsho me uas thaum Daulakas tseem ua neej nyob, Daulakas xaws rau lawv hnav.” Fenpis, hauv Loo 16:1–2, yog “ib tug uas ua hauj lwm pab cov ntseeg” thiab “pab txhua leej txhia tus.”

Tej qauv ntawm kev ntseeg, lus tim khawv, thiab kev pab lwm tus neeg no tseem muaj hauv lub Koom Txoos hauv hnub nyoog kawg no thiab yog kho kom muaj chaw txawb chaw rau thaum txhim tsa lub Koom Haum Niam Tsev. Julie B. Beck, lub Koom Haum Niam Tsev tus tuam thawj tswj hwm, tau qhia hais tias: “Ib yam li tus Cawm Seej tau caw Malis thiab Mathas hauv Phau Tshiab kom nrog Nws koom ua Nws tej hauj lwm, cov poj niam hauv lub caij nyoog kawg no kuj muaj ib txoj kev lav ris kom koom ua tus Tswv tej hauj lwm thiab. … Qhov kev txhim tsa lub Koom Haum Niam Tsev thaum xyoo 1842 coj ib tsoom poj niam tej hwj chim los nyob ua ke kom thiaj muaj zog thiab tau muab hauj lwm rau cov poj niam kom pab txhim tsa tau tus Tswv lub nceeg vaj.”1

Peb ua tiav tau peb tej hauj lwm thaum peb tsom ntsoov lub Koom Haum Niam Tsev lub hom phiaj: kom pab tib neeg muaj kev ntseeg thiab kev ncaj ncees ntxiv, kom ntxiv dag zog rau tej vaj tse thiab tej tsev neeg, thiab kom nrhiav tau thiab pab tau cov neeg txom nyem.

Kuv ua tim khawv hais tias Vajtswv tau txhim tsa lub Koom Haum Niam Tsev kom thiaj pab khiav tej hauj lwm ntawm txoj kev cawm seej. Txhua tus viv ncaus hauv lub Koom Haum Niam Tsev muaj ib lub luag hauj lwm ua kom thiaj ua tiav tej hauj lwm dawb ceev no.

Silvia H. Allred, tus pab cuam thib ib hauv lub Koom Haum Niam Tsev pawg tuam thawj tswj hwm.

Los ntawm cov Vaj Lug Kub

Yau-ees 2:28–29; Lukas 10:38–42; Efexaus 1:10

Los ntawm Peb zaj Keeb Kwm

Tus viv ncaus Julie B. Beck tau qhia hais tias “peb paub dhau los ntawm tus Yaj Saub Yauxej Xamiv hais tias lub Koom Haum Niam Tsev yog ib feem tseem ceeb ntawm txoj Kev Txum Tim txoj Moo Zoo Rov Qab Los.”2 Tej hauj lawm txum tim txoj moo zoo rov qab los pib rau ntawm Thawj qhov Ua Yog Toog Pom thaum xyoo 1820 thiab mus txuas ntxiv “ib kab tag mam li ib kab, ib zaj tag mam li ib zaj” (D&C 98:12). Thaum lub Koom Haum Niam Tsev raug txhim tsa thaum lub Peb Hlis Ntuj hnub tim 17, 1842, tus Yaj Saub tau qhia cov poj niam txog lawv txoj hauj lwm tseem ceeb hauv lub Koom Txoos uas tau txum tim rov qab los. Nws hais tias, “Lub Koom Txoos tseem tsis tau txhim tsa tas zoo tag nrho mus txog thaum txhim tsa lub koom haum niam tsev.”3

© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/10. Pub txhais ua lus Hmoob: 6/10. Kev txhais Visiting Teaching Message, February 2011. Hmong. 09762 295

Lus Cim

  1. Julie B. Beck, “Fulfilling the Purpose of Relief Society,” Liahona, Kaum Ib Hlis Ntuj 2008, 108.

  2. Julie B. Beck, “Fulfilling the Purpose of Relief Society,” 108.

  3. Teachings of Presidents of the Church: Joseph Smith (2007), 451.

Kuv Yuav Pab Li Cas?

  1. Kuv yuav ua dab tsi pab kuv cov viv ncaus lub hli no kom thiaj ua yam ntxwv txog txoj kev ntseeg ntawm cov poj niam uas muaj siab ntseeg Yexus Khetos?

  2. Kuv yuav kawm cov lus qhuab qhia dab tsi ntawm txoj moo zoo uas txum tim rov qab los kom thiaj ntxiv dag zog rau kuv zaj lus tim khawv lub hli no?