Bae Glad blong Yu I Bigwan Tumas

Sam glad long laef oli moa swit mo stap longtaem moa taem yu save se yu bin helpem ol narafala man blong oli karem gospel blong Jisas Kraes we i bin kambak, long hat blong olgeta. Hem i gudfala janis blong evri memba blong Jos blong gat kaen glad ia. Taem yumi bin baptaes, yumi bin mekem wan promes se bae yumi “stanap olsem ol witnes blong God evri taem mo long evri samting, mo long evri ples we [yumi] save stap long hem, go kasem ded, mekem se God i save pemaot [yumi], mo bae oli kaontem [yumi] wetem olgeta ia blong fasfala laef bakegen, mekem se [yumi] save kasem laef we i no save finis” (Mosaea 18:9).

Evri memba oli agri blong tekem pat blong komanmen ia we oli givim long Jos blong tekem gospel blong Jisas Kraes i go long wol, long eni ples mo long ful laef blong olgeta. Lod i bin talem i klia se hem i sendem ol memba oli go aot blong testifae mo givim woning long ol pipol, mo evri man we oli harem woning ia blong givim woning ia long neiba blong hem (luk long D&C 88:81). Ol fultaem misinari oli mas gat paoa blong tijim olgeta we oli no memba yet blong Jos. Ol memba blong Jos oli mas gat paoa blong faenem olgeta we Lod i mekem rere long olgeta, blong ol misinari oli tijim olgeta.

Yumi nidim blong yusum fet blong yumi se Lod i bin mekem rere ol pipol raon long yumi blong oli tijim olgeta. Hem i save huia olgeta ia mo taem we oli rere, mo hem i save lidim yumi long olgeta tru long paoa blong Tabu Spirit mo givim toktok long yumi blong invaetem olgeta blong tijim olgeta. Promes ia we Lod i bin givim long wan misinari long 1832 hem i promes tu we Hem i bin givim long yumi komanmen ia blong yumi faenem ol pipol rere blong ol misinari i tijim olgeta. Hem i talem se bae Hem i sendem Spirit blong Givhan long hem, we bae i tijim hem trutok mo rod we bae hem i mas go long hem; mo folem hamas hem i stap fetful, bae hem i givim moa bandel blong kakae long hem (luk long D&C 79:2–3).

Mo promes blong gat bigfala glad long fetful misinari hem i blong yumi tu, olsem ol fetful memba we yumi givim hat blong yumi long misinari wok:

Lod i bin talem se sapos yumi glad bigwan from wan man we yumi karem i kam long Hem long kingdom blong Papa blong Hem, nao, bae i olsem wanem sapos yumi karem plante man i kam long Hem!

Yumi gat gospel blong Hem wetem yumi, mo ston blong Hem, mo fasin blong Hem blong sevem man.

Sapos yumi askem Papa long nem blong Hem, wetem fet, mo stap bilivim se bae yumi kasem, bae yumi gat Tabu Spirit, we i soemaot evri samting we oli impoten long ol pikinini blong man (luk long D&C 18:16–18).

Antap long Tabu Spirit we i stap, blong helpem yumi luksave mo invaetem olgeta we oli rere blong kasem tijing, Lod i singaotem mo trenem ol lida tu blong lidim yumi. Long wan leta we deit blong hem i 28 Febwari 2002, Fas Presidensi i givim moa wok long ol bisop mo ol wod long saed blong misinari wok.¹ Wetem help blong wod mo branj kaonsel, prishud eksekutiv komiti i developem wan misinari plan blong yunit. Long plan ia i gat ol tingting long olsem wanem ol memba oli save faenem olgeta we oli rere blong ol misinari oli tijim olgeta. I gat wan man we oli singaotem hem olsem wod o branj misin lida. Misin lida ia i wok kolosap wetem ol fultaem misinari mo ol investigeta.

I gat plante wei we yu save mekem gud moa blong mitim wanem yu mas mekem blong faenem ol pipol blong ol misinari oli tijim olgeta. Wei we i moa simpol bae hem i gudfala wei.

Prea blong Tabu Spirit i lidim yu. Toktok wetem ol lokol lida mo ol misinari, askem ol tingting blong olgeta mo promesem olgeta blong helpem olgeta. Leftemap tingting blong olgeta we oli tekem pat wetem yu long wok ia. Mo stap olsem wan witnes long evri taem long wanem yu stap talem mo wanem yu stap mekem blong soemaot se Jisas Hem i Kraes mo God i ansarem ol prea.

Mi testifae se bae Tabu Spirit i lidim yu i go long ogeta we oli stap lukaotem trutok, taem yu prea mo wok blong Hem i lidim yu. Mo mi save, tru long eksperiens, se bae glad blong yu bae i stap longtaem wetem olgeta we oli jusum blong tekem gospel ia long hat blong olgeta mo afta, blong stap strong kasem en wetem fet.