2011
Wan Restoresen blong Evri Samting
Febwari 2011

Visiting Tijing Mesej, Febwari 2011

Wan Restoresen blong Evri Samting

Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Pikja
Relief Society seal

Fet • Famle • Givhan

Profet Josef Smit i bin oganaesem Rilif Soaeti olsem wan pat we i gat nid from insaed long Jos. Olsem wan presidensi, mifala i hop blong save helpem yufala i andastanem from wanem Rilif Sosaeti i wan samting we yufala i nidim long laef blong yufala.

Yumi save se ol woman long Niu Testeman oli bin soem fet long Jisas Kraes mo oli bin tekem pat long wok blong Hem. Luk 10:39 i talem abaot Meri, we “i sidaon long floa klosap long leg blong Masta blong yumi, i stap lesin long ol tok blong hem.” Long Jon 11:27 Mata i talem witnes blong hem abaot Kraes: Mata i talem long hem se, “Yes Masta. Mi mi bilif se yu yu Mesaea, yu yu Pikinini blong God. Yu yu man ya we olgeta bifo oli bin talem se bambae yu yu kam long wol.” Ol Wok 9:36, 39 i tokbaot “wan disaepol we nem blong hem Tabita, … i fulap wetem ol gudfala wok. … Nao ol wido oli kam stanap raon long hem … oli stap soem long hem, ol klos we [Dokas] i somap taem hem i stap laef yet.” Fibi, long Rom 16:1–2, i bin “givhan long wok blong jos” mo “givhan gud long plante man.”

Ol paten ia blong fet, testemoni, mo fasin blong givim seves oli gohed long Jos blong tedei mo oli kam ofisol wetem oganaesesen blong Rilif Sosaeti. Juli B. Bek, Rilif Sosaeti jeneral presiden, i bin tijim: “Semmak olsem Sevya i bin invaetem Meri mo Mata long taem blong NiuTesteman blong tekem pat long wok blong Hem, ol woman blong dispensesen ia oli gat wan raet blong tekem pat long wok blong Lod. … Oganaesesen blong Rilif Sosaeti long 1842 i karem i kam tugeta ol woman mo semtaem tekem i kam wanples paoa blong ol woman mo wanwan wok we oli gat blong bildim kingdom blong Lod.”1

Yumi mekem ol wok blong yumi i hapen taem yumi putum tinting blong yumi long ol stamba tingting blong Rilif Sosaeti: blong mekem fet mo fasin blong wanwan man mo woman i kam gud mo stret, mekem ol famle mo hom i kam strong, mo lukaotem mo helpem olgeta we oli stap long nid.

Mi testifae se God i oganaesem Rilif Sosaeti blong givim sapot long wok blong fasin blong sevem man. Wanwan sista long Rilif Sosaeti i gat wan rol we hem i nid blong plei blong mekem tabu wok ia i hapen.

Silvia H. Olred, fas kaonsela long Rilif Sosaeti jeneral presidensi.

I Kamaot long Ol Skripja

Joel 2:28–29; Luk 10:38–42; Efesas 1:10

I Kamaot long Histri blong Yumi

Sista Juli B. Bek i bin tijim se “yumi bin save, tru long Profet Josef Smit se Rilif Sosaeti i bin wan ofisol pat blong Restoresen.”2 Wok blong putumbak gospel i bin stat wetem Fas Visen long yia 1820 mo i bin gohed laen folem laen, tijing folem tijing (luk long D&C 98:12). Taem Rilif Sosaeti i bin oganaes long ofisol wei long 17 Maj 1842, Profet i bin tijim ol woman abaot ples blong olgeta we oli nid blong stap long hem insaed long Jos we i bin kambak. Hem i talem, “Jos i neva bin oganaes stret evriwan kasem taem we ol woman oli bin oganaes.”3

© 2011 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/10. Oli letem translesen: 6/10. Translesen blong Visiting Teaching Message, February 2011. Bislama 09762 852

Ol Not

  1. Julie B. Beck, “Fulfilling the Purpose of Relief Society,” Liahona, Nov. 2008, 108.

  2. Julie B. Beck, “Fulfilling the Purpose of Relief Society,” 108.

  3. Teachings of Presidents of the Church: Joseph Smith (2007), 451.

Wanem Nao Mi Save Mekem?

  1. Wanem help bae mi givim long ol sista blong mi long manis ia, we i soemaot fet blong ol woman disaepol blong Jisas Kraes?

  2. Wanem tijing blong gospel we i kambak, bae mi stadi long hem long manis ia blong mekem testemoni blong mi i kam strong?