Ia î to outou oaoa

E mea iti roa te mau oaoa hau i roto i te oraraa e te roa ho‘i, a ite ai outou e ua tauturu outou ia vetahi ê ia rave mai i te evanelia tei faaho‘ihia mai a Iesu Mesia i roto i to ratou aau. Te fariiraa i teie oaoa ua horo‘ahia ïa i te mau melo tata‘itahi o te Ekalesia. I to tatou bapetizo-raa-hia, ua fafau tatou e « e ti‘a [tatou] ei ite o te Atua i te mau mahana atoa, e i te mau mea atoa, e i roto i te mau vahi atoa ta [tatou] e parahi ra, e ia tae noa’tu i te poheraa, ia faaorahia [tatou] e te Atua, e ia amuihia i roto i to te ti‘a-faahou-raa matamua, ia noaa te ora mure ore ia [tatou] » (Mosia 18:9).

Ua farii te mau melo atoa i te tuhaa o te faaueraa i horo‘ahia i te Ekalesia ia afa‘i i te evanelia a Iesu Mesia na te ao atoa nei, i te mau vahi atoa e i te roaraa o to ratou oraraa. Ua parau maitai mai te Fatu i te reira e : « Inaha, ua tono atu ra vau ia outou na ia parau i te parau faaite e ia faaara ho‘i i te mau taata, e e mea ti‘a roa i te taata atoa o tei faaarahia ra ia faaara’tu i to’na ra taata tupu » (PH&PF 88:81). Ei mana to te mau misionare rave tamau no te haapii i te feia aita i melohia’tu ra no te Ekalesia. Ei mana to te mau melo o te Ekalesia no te imi i te feia o ta te Fatu i faaineine ia haapiihia ratou e te mau misionare.

E mea ti‘a ia tatou ia faaohipa i to tatou faaroo e ua faaineine te Fatu i te mau taata e haaati ra ia tatou ia haapiihia. Ua ite Oia o vai ratou e te taime ua ineine ratou, e e arata‘i Oia ia tatou ia ratou ra na roto i te mana o te Varua Maitai e e horo‘a ia tatou te mau parau no te ani manihini ia ratou ia haapiihia. Te fafau ta te Fatu i horo‘a i te hoê misionare i te matahiti 1832 o te fafau atoa ïa Ta’na e horo‘a mai nei ia tatou i roto i ta tatou faaueraa ia imi i te taata ineine ia haapiihia e te mau misionare : « E e tono atu vai i te Faaa‘o e ni‘a ia’na ra, o te haapii atu i te parau mau ia’na ra e te e‘a ho‘i ta’na e haere ra, e mai te mea e haapa‘o maitai oia, e faakorono faahou atu vau ia’na i te mau ruru ra » (PH&PF 79:2–3).

E te fafauraa no te oaoa rahi no te misionare haapa‘o no tatou atoa te reira, tatou te mau melo haapa‘o o te horo‘a nei i to tatou aau no te ohipa misionare.

« E i teie nei, mai te mea ua rahi to orua oaoa i te varua taata hoê a‘e o tei arata‘ihia mai e orua ia’u nei i roto i te basileia o to’u Metua, eaha’tura â ïa te huru o to orua oaoa rahi ia rahi noa’tu â ta orua varua taata e arata‘i mai ia’u nei !

« Inaha, tei mua ia orua ta’u nei evanelia, e ta’u păpă, e ta’u faaora.

« A ani atu i te Metua i roto i to’u nei i‘oa, ma te faaroo e te ti‘aturi e e horo‘ahia mai, e e farii ïa orua i te Varua Maitai, o te faaite mai i te mau mea’toa o te au ia faaitehia i te tamarii a te taata nei » (PH&PF 18:16–18).

Taa ê atu te tauturu a te Varua Maitai ia tatou ia ite e ia ani manihini i te feia i ineine ia haapiihia, ua pii e ua haapiipii te Fatu i te feia faatere ia arata‘i ia tatou. I roto i te hoê rata no te 28 no fepuare 2002, ua tuu te Peresideniraa Matamua i te hopoi‘a teitei no te ohipa misionare i ni‘a i te mau episekopo e te mau paroita.¹ Na roto i te tauturu a te apooraa paroita e aore râ amaa, e hamani te tomite faatere a te autahu‘araa i te hoê faanahoraa misionare no te ti‘ahapa. Te vai ra i roto i taua faanahoraa ra te mau mana‘o nahea te mau melo e ite ai te feia i ineine ia haapiihia e te mau misionare. Te vai ra te hoê taata tei piihia ei taata faatere no te ohipa misionare no te paroita e aore râ amaa. E farerei pinepine taua taata faatere no te ohipa misionare i te mau misionare rave tamau e ta ratou mau taata imi.

E rave rahi mau rave‘a no te pahono-maitai-raa i ta outou iho hopoi‘a no te tauturu i te iteraa i te mau taata imi na te mau misionare ia haapiihia. Te mea ohie roa o te reira te mea maitai a‘e.

A pure ia arata‘ihia outou e te Varua Maitai. A aparau e te feia faatere o te fenua iho e te mau misionare, no te aniraa i to ratou mau mana‘o e a haapapû atu ia ratou ta outou tauturu. A faaitoito i te feia e haa ra e o outou i roto i teie ohipa. E ia riro ei ite i te mau taime atoa i roto i mea ta outou e parau e e rave e o Iesu te Mesia e e pahono te Atua i te mau pure.

Te faaite papû nei au e arata‘i te Varua Maitai ia outou i te feia e imi ra i te parau mau a pure ai e a ohipa ai outou ia arata‘ihia. E ua ite au na roto i te iteraa rau e e oaoa e ti‘a i te vairaa to outou e te feia o tei ma‘iti e rave i te evanelia i roto i to ratou aau e i muri iho e tape‘a ma te faaroo e tae roa i te hopea ra.