Parau Poro‘i na te mau Tuahine Hahaere, Fepuare 2011
Te faaho‘i-faahou-raa mai o te mau mea atoa
A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.
Faaroo • Utuafare • Tamahanahana
Ua faanahonaho te peropheta Iosepha Semita i te Sotaiete Tauturu ei tuhaa faufaa roa no te Ekalesia. Ei peresideniraa, te ti‘aturi nei matou e ti‘a ia matou ia tauturu ia outou ia taa maitai no te aha e mea faufaa te Sotaiete Tauturu i roto i to outou oraraa.
Ua ite tatou e ua faaite te mau vahine no te Faufaa Apî i te faaroo ia Iesu Mesia e ua amui mai i roto i Ta’na ohipa. Luka 10:39 te parau no Maria, « o tei parahi ïa i te pae avae o Iesu i te faarooraa i ta’na parau ». I roto i te Ioane 11:27 ua faaite papû o Mareta no te Mesia : « Ua parau oia Ia’na, E te Fatu, e ua faaroo vau e o oe te Mesia, te Tamaiti a te Atua o te haere mai i te ao nei ». Te parau ra Te Ohipa 9:36, 39 « te hoê pĭpĭ o Tabita te i‘oa… e rahi ta taua vahine ra ohipa maitai … e ua ti‘a noa maira te mau vahine ivi… e te faaiteraa mai i te mau ahu fafao, e te ahu pu i hamanihia ». Phebe i roto Roma 16:1–2, ua riro « ei diakono no te ekalesia » e « ei tauturu i te taata e rave rahi ».
Teie mau hoho‘a no te faaroo, te iteraa papû e te taviniraa, te tamau noa nei ïa i roto i te Ekalesia i te mau mahana hopea nei e ua haamanahia na roto i te faanahoraa a te Sotaiete Tauturu. Ua haapii mai o Julie B. Beck, peresideni rahi no te Sotaiete Tauturu e : « Mai ta te Faaora i ani ia Maria e ia Mareta i te tau no te Faufaa Apî ia amui mai i roto i Ta’na ohipa, e faaueraa mana ta te mau vahine no teie tau tuuraa Evanelia ia amui mai i roto i Ta’na ohipa … Ua faatupu te faanahoraa o te Sotaiete Tauturu i te matahiti 1842 i te mana amui o te mau vahine e ta ratou mau titauraa taa ê no te patu i te basileia o te Fatu ».1
Te rave faaoti nei tatou i tatou mau ohipa mai ta tatou i faatumu i ni‘a i te mau opuaraa a te Sotaiete Tauturu : te faarahiraa te faaroo e te parau-ti‘a o te taata iho, te haapuairaa i te mau utuafare e te mau nohoraa, e te imiraa e te tautururaa i te feia i roto i te ati.
Te faaite papû nei au e ua faanahonaho hanahanahia te Sotaiete Tauturu no te tauturu i te ohipa no te faaoraraa. E ti‘araa faufaa roa to te tuahine tata‘itahi o te Sotaiete Tauturu i roto i te faaotiraa i teie ohipa mo‘a.
Silvia H. Allred, tauturu matamua i roto i te peresideniraa rahi o te Sotaiete Tauturu.
No roto mai i te mau papa‘iraa mo‘a
No roto mai i ta tatou aamu
Ua haapii mai o Julie B. Beck e « ua ite tatou na roto i te peropheta Iosepha Semita e e tuhaa faufaa roa te Sotaiete Tauturu no te Faaho‘i-faahou-raa mai ».2 Ua haamata te faaho‘i-faahou-raa mai na roto i te Orama Matamua i te matahiti 1820 e ua tamau noa « te a‘o na ni‘a i te a‘o, te faaue na ni‘a i te faaue » (PH&FH 98:12). I te haamana-raa-hia te Sotaiete Tauturu i te 17 no mati 1842, ua haapii te peropheta i te mau vahine no ni‘a i to ratou vairaa faufaa roa i roto i te faaho‘i-faahou-raa-hia mai te Ekalesia. Ua parau oia e, « Aita roa te Ekalesia i faanaho-maitai-hia tae roa i te taime ua faati‘ahia mai te mau vahine ».3
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no Visiting Teaching Message, February 2011. Tahitian. 09761 895
Eaha ta’u e nehenehe e rave ?
-
Eaha te tauturu ta’u e horo‘a na ta’u mau tuahine i teie avae ei faaiteraa i te faaroo i te mau pĭpĭ vahine a Iesu Mesia ?
-
Eaha te haapiiraa no te faaho‘i-faahou-raa mai o te evanelia, ta’u e tuatapapa no te haapuai i to’u iteraa papû i teie ava‘e ?