Laveaiina o Tamai Mamoe ua Leiloloa

I tausaga ua mavae i le amataga o le tautotogo, sa ma maua ai ma lo’u toalua se avanoa e tietie atu ai e ui atu i le Star Valley matagofie, Wyoming, ISA. O se taeao manaia lava o le tautotogo, ma o ona laufanua ma vaaiga sa matuai faagaeetia loto lava.

Ina ua ma oo atu ma Jackie i Star Valley, sa ma fiafia ina ua ma vaaia se lafu mamoe e seāseā vaaia sa taape solo mai ni mamoe pepe. E itiiti lava ni mea e sili atu ona mataina nai lo o se mamoe pepe. A o ma tietie atu i le auala pisi, sa ma vaaia ai se tamai mamoe i fafo o le pa na latalata i le auala. Sa fetamo’ea’i solo ma le le mautonu agai i le pa, e taumafai e toe foi atu i le lafu. Ou te matea ona o le laitiiti o lenei tamai mamoe na mafai ai ona faavāvā mai i se avanoa o le pa, ae o lea ua le mafai ona toe foi atu.

Sa ou talitonu ana faapea ma te le tutu e laveai lena tamai mamoe, semanu e iu lava ina savalivali atu i le auala na lata ane ma lavea ai pe mate ai foi. Sa ou taofia le taavale ma faapea atu ia Jackie ma le matou au malaga sa i le nofoa pito i tua, “Faatali atu iinei; o le a na o sina minute lava.”

Sa ou faapea e aunoa ma so’u iloa tulituli mamoe, ‘ai o le a fiafia le tamai mamoe atuatuvale i le vaai mai ia te a’u; ae maise, sa matuai lelei lava o’u faanaunauga. Sa ou alu e laveai lona ola!

Ae o le mea na ou faanoanoa ai, sa fefe le tamai mamoe ma sa matuai le fiafia i a’u taumafaiga e laveai o ia. Ina ua ou lata atu i ai, sa alu i le atoa si mea i le pa. O le vaai mai o Jackie i lo’u faafitauli, sa sau ai e fesoasoani mai ia te a’u. Ae e oo foi ia i ma’ua e toalua sa le mafai ona ma tulia le tamai mamoe saoasaoa.

O le taimi lea, o le ulugalii sa i le nofoa pito i tua, o e sa fiafia foi e matamata mai i le tuligasi’a sa faia, sa o mai ma auai i le taumafaiga e laveai le tamai mamoe. O a matou taumafaiga fai faatasi na iu ai ina matou sisioina le tamai mamoe ua fefe agai i le pa. A o ou aapa ifo e sii mai o ia i o’u lavalava mamā, sa vave ona ou matauina sa matuai manogi o ia mai le mea sa suasua ai. O le taimi lena sa amata ai ona ou mafaufau, pe sa aoga moni ea lenei taumafaiga?

A o matou sii ae le tamai mamoe ma tuu atu i totonu o le pa ma le saogalemu, sa tauivi ma feaa ona vae ma lona malosi atoa. Ae sa lei umi ae ona maua lona tina ma pipii atu ma le saogalemu i ona tafatafa. E ui ina sa maanuminumi o matou lavalava, ae sa matou lagona le matuai faamalieina ma toafilemu i lo matou faia o le filifiliga sa’o, ona matou toe malaga ai lea.

Sa ou tomanatu i lena aafiaga mo ni taimi talu mai ona tupu. Sa ou mafaufau pe o le a tatou tuuina atu lena ituaiga o taumafaiga e laveai ai se tuaoi e le talisapaiaina, pe le toaaga i le ekalesia. Ou te faamoemoe lava o le a faapena! “E le sili lava ea le tagata i le mamoe?” na fesili ai le Faaola (Mataio 12:12). I paranesi, uarota, ma siteki uma lava, o loo i ai ni tamai mamoe ua leiloloa ma e foliga mai o le a le toe maua mai.

O le suia o le upu galue i le laveai i le viiga “Ua Ou Faia Ea se Lelei?” Ou te valaaulia ai outou ia mafaufau i lona faaaogaina e laveai ai tamai mamoe ua leiloloa:

E ono foliga mai e le talisapaia, matatau, pe le mananao foi o tatou tuaoi i le laveaiina o i latou. Ma o a tatou taumafaiga e laveai i latou e ono umi se taimi, taumafaiga, malosi, lagolago ma le fesoasoani a isi e manaomia ai. Ae o lenei taumafaiga o le a tauia i faamanuiaga e faavavau. E pei ona folafola mai e le Alii, afai tatou te aumaia “tau lava o se agaga e toatasi ia te [Ia], faauta i le tele o lo [tatou] olioli faatasi ma ia i le malo o lo [tatou] Tama” (MFF 18:15).