Faafeiloaia o le Faamaumau Oa

O le faataoto i le atalii faamaumau oa ua faaalia matilatila ai tulaga eseese o uiga faaletagata. Muamua, o loo i ai le atalii faamaumau oa manatu faapitoa e le popole i soo se tasi po o soo se mea ae na o ia lava. Ae ui i lea, ina ua uma le olaga soona fai na iloa ai e ia lava ia “o le amioleaga e le o le fiafia lea” [Alema 41:10], ona “atamai ai lea o ia” (Luka 15:17). Na iu ina ia iloaina lona tama, ma ia naunau ai ina ia toe faatasia ma lona tama.

Na suia lona faamaualuga, manatu faapito i le lotomaualalo ma le loto nutimomoia ma le agaga salamo a o ia ta’uta’u atu i lona tama: “Ua ou agasala i Le o i le lagi, atoa ma ou luma, ua ou le toe aoga ona taua o lou atalii” (Luka 15:21). Ua mavae uiga faasausili faatamaitiiti, manatu faapito faatamaitiiti, ma le sailia pea o le faamalieloto, a ua suitulaga nei i se uiga ua fotua’i mai o le faia pea o le lelei. I le taimi nei, afai o loo tatou faamaoni a’ia’i ia i tatou lava, o le a tatou ta’uta’u atu o loo i ai sina vaega o le atalii faamaumau oa i totonu o i tatou taitoatasi.

Ona i ai lea o le tāma. Atonu e faitioina o ia e nisi i le soona tuusaoloto o le taliaina o le talosaga a le uii ina ia “aumai ia te au lo’u tofi o le oa” (Luka 15:12). E le faapea e le’i lagonaina e le tama i le faataoto le mataupu faavae paia o le faitalia e filifili le mea tonu ma le saolotoga o fililiga, o se mataupu faavae lea na tau ai le Taua i le Lagi i le muai olaga. E le’i i ai sona faamoemoe e faamalosia lona atalii ina ia usitai.

Ae le’i faavaivai lava lenei tama alofa i lona atalii le usiusitai, ma na faamaonia le le faaitiitia o lona mataalia i le faamatalaga faamomoi loto ina “ua iloa mamao atu foi, [le atalii] e lona tama … ona mutimutivale lea o lona alofa, ua momoe atu ia, ua fusi ia te ia, ma sogi atu ia te ia” (Luka 15:20). E le na o le faaalia lautele o le alofa faaletino i lona atalii, ae na faatonu e le tāma lana auauna e faaofu ia te ia i se ofu tatapuvae, faasee i ona vae, ma se mama i lona lima ma faatonuina i latou e fasi se tamai povi peti, ma faailoa atu ma le fiafia, “Na leiloa foi o ia, a ua maua” (Luka 15:24).

I le aluga o tausaga, na atiina ae ai e lenei tama ia ituaiga uiga agalelei, faamagalo, agaalofa ma ua le mafai ai ona ia faia se isi tulaga ae na o le alofa ma le faamagalo atu. E fiafia tele i tatou uma i lenei faataoto aua o loo agiagia ai le faamoemoe mo i tatou uma, o loo tulai i le ala se Tama o i le Lagi alofa, e pei ona sa i ai, ma o loo faatalitali mai ma le naunautai i le toe fo’i atu o Ana fanau faamaumau oa taitoatasi.

Ma i le atalii matua usiusitai, lea na faatautee i lona tama loto faamagalo: “Faauta, o tausaga ua tele, ua ou auauna ai ia te oe, ua leai lava sau poloaiga ua ou solia; e te lei au mai lava se tamai oti ma a’u, matou te olioli ai ma a’u uo:

“Peitai o lou atalii lena, sa na faaumatia au mea faatasi ma fafine talitane, ua sau o ia, ona e fasi lea o le tamai povi peti māna” (Luka 15:29–30).

Atonu e pei lava foi o loo i ai se vaega o le atalii faamaumau oa i totonu o i tatou taitoatasi, ma atonu foi o loo pisipisia uma lava i tatou i ni uiga o le atalii ulumatua. Na faamatalaina e le Aposetolo o Paulo ia fua o le Agaga e avea o le “alofa, olioli, filemu,onosai, mataalofa, agalelei, faamaoni, agamalu, [ma le] le gaoia” (Kalatia 5:22–23). Atonu e ui ina sa usiusitai le atalii ulumatua, ioe, na usiusitai i lona tama, ae i lalo ifo o lena usiusitai sa loloto ai le ita ma le fia amiotonu patino ma le uiga o le faamasino atu, manao, ma le leai o se alofa. E lei atagia i lona olaga ia fua o le Agaga, aua e na te lei maua se toafilemu, nai lo lena na matua mafatia lava i le tulaga na ia mafaufauina o le le tutusa o le faiga o i la’ua.