Autalavou Matutua ma Afiafi Faaleaiga

I le avea ai ma se tagata liliu mai ma na o le pau ai lea o le tagata o le Ekalesia i lo’u aiga, ou te auai i le afiafi faaleaiga i le nofoaga autu a le autalavou matutua i lo’u nuu. O le auai ai la i le afiafi faaleaiga ua taua lea ia te au aua ua ou aoaoina ai auala e aoao atu ai i se vaega toalaiti, ua sili atu ai lo’u malamalama i mataupu faavae o le talalelei lea na aoaoina ai a’u a o o’u sailiili i le Ekalesia, ma ua ou vaaia ai le tuputupu ae o isi a o latou aoao atu pe faasoa atu a latou molimau.

Ou te iloa o tomai taua nei mo lo’u lumanai. Pe a fai so’u lava aiga, o le a ou iloa le auala e faatulaga ai se afiafi faaleaiga mamana ma le fiafia ona o faataitaiga lelei ua ou vaaia.

Ae peitai o le afiafi faaleaiga o se vaega taua foi o le tulaga o lo’u olaga o i ai nei . O nisi o taimi e faigofie atu le nofo i le fale i se po o le Aso Gafua, aemaise lava pe a leaga le tau pe a fai foi e tele ni a’u suesuega e fai. Ae toeitiiti lava o taimi uma ou te oo ai i lenei faafitauli, ou te alu lava i le afiafi faaleaiga aua ou te iloa e taua le i ai faatasi ma isi talavou matutua nofofua e talatalanoa ai e uiga i le talalelei ma fiafia ai faatasi. E tusa lava pe na o sina vaega e auai, e avea lava pea o se aafiaga maoae.

O le mea e lelei ai le fai o le afiafi faaleaiga i le nofoaga autu o talavou matutua ona e mafai ai ona matou vave mai pe nonofo umi ina ia suesue, aoao le ta piano, taaalo i ni taaloga, pe na o le malolo foi—e i ai lava se mea e fai.

Ou te iloa pe a ou usitai ma mulimuli i apoapoaiga faaperofeta e auai atu i se afiafi faaleaiga, e faamanuiaina a’u. Ua ou vaaia se faamaoniga o lenei mea i a’u suesuega, i la’u galuega, i le faamanuiaina i le malosi mo le vaiaso o lumanai, ma le lagona masani o le faagaeetia.

Sa ou ola ae i se aiga lea sa matou faia ai i le tele o taimi ia afiafi faaleaiga. Ou te manatua a o o’u laitiiti, na avea ai ia afiafi faaleaiga o se tasi o mea e sili ona taua i lo’u olaga, ma e ou te ala fiafia i luga i taeao o Aso Gafua taitasi ma faamanatu atu i o’u matua o le afiafi faaleaiga e faia i lena po. I le avea ai ma se talavou matua i lenei vaitaimi, o loo ou nofo faatasi ai ma o’u matua ma faaauau pea le faaaogaina o lenei taimi faapitoa e faatasi ai ma lo’u aiga i vaiaso taitasi.

Ona e faia pea lava pea e lo matou aiga ia afiafi faaleaiga mai le taimi a o ou laitiiti lava, o lea ua ou malamalama ai lava i lona taua. I Korea, o le nofoaga e matua pisi ai lava le toatele o matua ma fanau ma tau le maua ai se taimi faaleaiga, o le afiafi faaleaiga la o se avanoa matagofie lea e faatasia ai ma fefaamalosiau ai le tasi i le isi.

O le isi faamanuiaga ua oo mai ona o taumafaiga a o’u matua o lo’u mauaina lea o se faavae mausali e fausia ai la’u molimau ia Iesu Keriso. E ui na ou aoaoina le talalelei i le lotu, ae o lesona i afiafi faaleaiga lea na matuai ou malamalama ai lava i ona mataupu faavae. O se taunuuga la, ua mafai ai ona ou alu i le lotu ma tuputupu ae i le talalelei i le faavae lea i lo’u lava faatuatua a e le o le faatuatua o o’u matua.

O au o se alii talavou e 24 tausaga le matua, o lē na mauaina se molimau malosi i le talalelei a Iesu Keriso e ala i le mulimuli i apoapoaiga faaperofeta ina ia faia afiafi faaleaiga. E ui e na o a’u le tagata o le Ekalesia i lo’u aiga, ae na ou iloaina ina ua uma ona ou papatiso, o afiafi faaleaiga e mafai ona faamalosia ai i tatou, ma na ou fuafua loa e faailoa i le aiga.

Ua iloaina nei e le aiga atoa o Aso Gafua o ni aso faapitoa lea matou te faapotopoto ai o se aiga e aoaoina ia upu moni o le talalelei. O nisi o taimi matou te foia ai faafitauli o le aiga pe talanoaina ni luitau, manaoga, po o ni mea e fiafia ai tagata taitoatasi o le aiga. Ua ou iloaina le auala e matua fesootai atu ai i lo’u Tama Faalelagi ma fefautuaai ma le alofa ma tagata o lo’u aiga. O se taunuuga la, ua sili atu ona matou lotogatasi, lea ua avea o se faamanuiaga maoae.

E le gata i lea, ua faataatia e le afiafi faaleaiga se faavae malosi mo lo’u aiga i le talalelei a Iesu Keriso, ma o loo avea nei i latou ma tagata sailiili o le Ekalesia. O le mea moni lava, matou te fai afiafi faaleaiga faatasi ma faifeautalai i nisi o taimi.

Ou te iloa pe a ou faaipoipo, o le a faamanuiaina lo’u aiga e ala i afiafi faaleaiga, ae ou te faafetai foi sa mafai lava ona ou avea ia afiafi faaleaiga o se vaega taua i lo’u olaga i le taimi nei. Ou te iloa e moni Le Ekalesia a Iesu Keriso o le Au Paia o Aso e Gata Ai ma o le afiafi faaleaiga o se polokalama musuia e le Atua.

Sa ou ola ae i se aiga na avea le afiafi faaleaiga ma se mea e faamuamua. Ina ia mafai ona taunuu i le taimi sa’o i le aiga i Aso Gafua, matou te o sa’o lava i le fale mai le aoga e aunoa ma le faia o ni fuafuaga e faatasi ai ma ni uo. O galuega patino, e pei o meaaoga, na faamaeaina pe a uma le afiafi faaleaiga. Sa leai lava se mea na suitulaga i lenei taimi faapitoa mo lo matou aiga ina ia faatasia.

Na i ai se aafiaga na faia e afiafi faaleaiga i lo matou tuputupu ae, e le na ona faapea sa matou tuuina i ai le faamuamua ae ona sa matou galulue faatasi foi ina ia faataunuuina. Sa matou feauauai po o ai o le a faia le lesona, o ai o le a saunia ni mea’ai mama, ma po o ai o le a faia le tatalo amata po o le tatalo faaiu. E le na o lo matou faalogo i lesona ae na matou maua foi ni avanoa e avea ai ma ni faiaoga. O se taunuuga la, ua faamanuiaina a’u i le mauaina o se malamalama ma se molimau i le talalelei ma ua faamalosia ai sootaga faaleaiga.

Ona sa avea le afiafi faaleaiga ma se mausa i lo’u olaga, ou te tulimatai atu ai i faamanuiaga o le a aumaia pe a fai so’u lava aiga.

Sa ou ola ae i se aiga lea na avea ai o’u matua ma se faataitaiga susulu i o’u tuagane, lo’u uso, ma a’u, ma ua maua ai e lo matou aiga le tele o faamanuiaga ona o a la taumafaiga. Mo se faataitaiga, sa matou tutupu faatasi ae e avea ma se aiga fealofani ma vavalalata, faamalosiau atu le tasi i le isi i taimi e manaomia ai po o tofotofoga. Ma e ui lava e le toaaga nisi o lo’u aiga i le lotu, ae latou te auai lava i le afiafi faaleaiga.

Sa i ai se taimi sa ou nofo ai i Sini, Ausetalia, ma e sa ou matua misia lava lo’u aiga i le nofo mamao ai mai Aialani. O le mea e laki ai, sa ou nofo latalata i se falelotu o le Ekalesia lea na ou auai ai i se afiafi faaleaiga ma isi talavou matutua. Sa avea lea ma se faamanuiaga maoae ia te au, sa ou le toe lagonaina le misia o lo’u aiga. Sa manaia le feoeoeai faatasi ma tagata o le ekalesia i se nofoaga toafilemu lea na i ai le Agaga.

Na ou liliu mai i le Ekalesia ia Me 2009. Talu mai lena taimi na vave lava ona ou faatauaina ia faamanuiaga lea e oo mai i le auai soo i afiafi faaleaiga. O se tasi o aafiaga e manatua pea lea na tupu ina o taaalo “nofoa soka” le matou uarota a le autalavou nofofua matutua i totonu o le fale faafiafia o se falelotu i le lotoifale, o se suiga mai le soka e fai i totonu o le fale. O le faamoemoe o le puipuia lea o lou nofoa a o osofaia nofoa o isi tagata i se polo pa’u. Sa ou faia se feagaiga ma isi tagata taaalo se toalua; ma na oo i le faaiuga sa na o i matou lava e toatolu o totoe i le taaloga, ma na vave ona liliu atu le tasi i le isi. Nai lo le le fiafia, na le mafai ona taofia lo matou talie! Sa avea o se mea na sili ona ou fiafia i ai talu mai le tele o tausaga, ma na ou iloa o le a matua sili ona faigata ona maua sea aafiaga faapea i soo se nofoaga i fafo atu o le Ekalesia. Sa fiafia tagata uma, e tusa lava pe le’i manumalo, ae e le o le tulaga lena na mafua ai ona taua lea aafiaga ia te a’u. O le mea na sili ona le galo ai lena aafiaga o le agaga o le fefaauoai sa ou lagonaina i le gaoioiga.

O taimi faapenei e fesoasoani lea ia te a’u i le faamāmāina o le mamafatu o le popole i aoga e faauu ai. E tusa lava pe na a le aluga o le vaiaso, ou te iloa lava o le a lelei o’u lagona pe a ou alu i le afiafi faaleaiga. Atonu o le a le faagaeetia pea au i gaoioiga i taimi uma ma e atonu foi ou te le fia faaaluina ai le taimi, ae ou te le faanoanoa lava i lo’u alu i afiafi faaleaiga.

E tele auala e mafai ona ou faaaluina ai po o Aso Gafua, mai le auai atu i faatasiga faamasani a le iunivesite i isi gaoioiga o taaloga ma faafiafiaga. Peitai o i latou o e matou te nonofo faatasi i le fale o tamaiti aoga—o tagata uma o le Au Paia o Aso e Gata Ai—ma ua faamautinoa le taua ona faia o afiafi faaleaiga, ma ua avea ma a matou faamuamua. Ua matou filifilia lenei faamuamua e fefaamalosiau ai le tasi i le isi i le taimi o le olaga o le a vaaia ai le faigata o le ola ai i le talalelei. O le fefaasoaai o molimau ma aafiaga o le tasi i le isi ua matou vavalalata ai o ni talavou matutua ma ni uo.

O le afiafi faaleaiga o se taimi lea o le vaiaso ou te faamoemoe ai mo le mauaina o se meaai faaleagaga. I le tele lava o taimi ou te sau ai i le afiafi faaleaiga ma ni fesili i lo’u mafaufau ae mauaina ia tali i lesona po o mafaufauga faaleagaga lea e faasoaina mai. O se taimi foi lea e faatulaga ma toe mafaufau ai i sini ia e fesoasoani e atiina ae ai a’u lava ia.

Ou te le manatu o se ositaulaga, le faia o se faaiuga e fai i taimi uma ia afiafi faaleaiga. Ou te iloa o se nofoaga lea e tatau ona ou i ai; ma e o se nofoaga foi o’u te fia i ai.