O Se Sefuluai Faamaoni, o se Faamanuiaga Maoae

Ina ua toeitiiti lava atoa lo’u 17, sa papatisoina a’u i Le Ekalesia a Iesu Keriso o le Au Paia o Aso e Gata Ai ma lagona se naunautaiga e auauna i le Alii i se misiona. Ina ua taunuu mai lo’u valaauga o le misiona i ni nai tausaga mulimuli ane, sa valaauina au e tuua Peru ma tala’i le talalelei toefuataiina i le Aai o Sate Leki.

E oo lava a o o’u mafaufau i faamanuiaga maoae o le auauna atu i se misiona, na mamafatu i lo’u mafaufau le tele o mea ou te manaomia: pepa o faamatalaga, tusifolau, visa, lavalava, ma tupe. Sa ou faigaluega ae sa le lava. Sa ou lagona le popole! I le masina e tasi ma le afa lea e totoe ona ou alu lea, sa ou iloa ai ua na o se vaega itiiti o le tupe e manaomia sa ou maua. Pau lava le mea na mafai ona ou faia o le alu i le Alii i le tatalo.

Ona e le tele sa’u tupe e maua, o le sefuluai la sa ou totogiina i masina taitasi e matua laitiiti lava. Peitai na vave ona ou iloaina e le popole le Alii e uiga i le aofaiga laitiiti: E popole o Ia ia tatou totogiina le 10 pasene na Ia poloai mai ai. Sa ou lagona le faamautuina ma le faamautinoaga mai, pe a fai ou te faaauau pea ona totogiina le sefuluai, o le a saunia e le Alii mea na ou manaomia.

Na amata ona sologa lelei mea uma. Na maua nisi a’u galuega faaopoopo se lua ma maua a’u pepa o faamatalaga. O le toatele o tagata o la’u uarota, aemaise lava ia tuafafine o le Aualofa, na fesoasoani mai i isi mea na manaomia. Ma na ofoina mai foi le fesoasoani a tagata o la’u siteki. Na ou alu i la’u misiona ma mea na manaomia.

I le avea ai ma se faifeautalai, sa ou aoaoina atu le tulafono o le sefuluai ma ona folafolaga (tagai i le Malaki 3:10) faatasi ai ma le agaga faafetai ma le molimau.