Gudfala Saed blong Storian blong Wan we Dog i Kakae Hem

Long sama blong 2009, dog blong fren blong mi i bin kakae mi long fes blong mi. Sori, be hemia i bin mekem se skin blong maot blong mi i bin open mo oli mas somap.

Folem kil ia, mi no glad nating. Mi letem hadtaem i kavremap ol tingting blong mi, mo mi filim se ful laef blong mi i jes kam nogud ia nao. Mi tingting tumas abaot skin blong maot blong mi ia mo mi no wantem blong go aot long pablik nating. Long maen blong mi, ol plan blong mi blong piano, volibol, jos, swim, mo skul i kam nogud from kil blong mi ia.

Be evritaem mi stap prea, kasem ol prishud blesing, toktok wetem papa mo mama blong mi, o ol famle mo ol fren blong mi oli kam visitim mi, spirit blong mi i kam antap mo mi filim hapi long wan taem blong harem nogud. Mi luksave afta se sapos ol pipol ia oli stap tingting long kil blong mi ia, oli stap filim sore ia.

Eksperiens ia i bin helpem mi blong bildimap fasin blong mi, mo mi bin lanem blong no stap wari long wanem ol narafala pipol oli stap tingting abaot mi. Mi kasem blesing tu from kil blong mi i bin helpem mi blong luksave se mi no mas tingting tumas abaot miwan mo stat blong kea moa long ol narafala man. Spirit blong mi i bin kam strong moa long taem ia.

Mi bin lanem se hadtaem hem i pat blong plan blong Papa long Heven blong yumi. Sapos yumi lukaotem hemia we i gud mo i no hemia we i nogud, bae yumi save winim hadtaem, kam wan man we i moa gud, mo letem eksperiens ia i mekem testemoni blong yumi i kam moa strong.