Lukaotem hemia we i Gud

Taem oli stap lukaotem wan niu hom, wan yang Lata-dei Sent kapol i bin stap toktok wetem ol neiba abaot eria ia mo ol skul long eria ia.

Wan woman we oli bin toktok long hem, i bin tokbaot skul we ol pikinini blong hem oli stap go long hem se: “Ples ia i wan gudfala ples! Prinsipol blong skul ia hem i wan gudfala man; ol tija oli kwalifae gud blong tij, oli kaen, mo oli naes. Mi glad tumas we ol pikinini blong mifala i save go long gudfala skul ia. Bae yufala i laekem ples ia!”

Wan defren woman i bin tokbaot skul ia we ol pikinini blong hem tu oli stap go long hem se: “Hem i wan rabis ples. Prinsipol i tingbaot hem nomo; ol tija oli no kwalifae nating blong tij, oli stap swea, mo oli no kaen. Sapos mi gat inaf mane blong muv aot long eria ia, bae mi save mekem long wan minit nomo!”

Samting we i fani, hem i we tufala woman ia i stap tokbaot sem prinsipol, ol sem tija, mo sem skul.

Yu stap luksave se oltaem ol pipol oli save faenem wanem oli stap lukaotem? Lukluk gud, mo bae yu save faenem tugeta gud mo nogud long kolosap evriwan mo eni samting we i stap. Ol pipol oli bin mekem sem samting wetem Jos blong Jisas Kraes blong ol Lata-dei Sent stat long stat blong hem finis. Olgeta we oli stap lukaotem hemia we i gud bae oli faenem wan kaen mo gudfala pipol—wan pipol we oli lavem Lod mo wantem blong givim seves long Hem mo blesem ol laef blong ol narafala man raon long olgeta. Be hem i tru tu se olgeta we oli stap lukaotem hemia we i nogud bae oli save faenem tu ol samting we oli no stret.

Sori blong talem, be samtaem hemia i stap hapen tu insaed long Jos. I no gat en long fasin blong krietem tingting, skil, mo paoa blong olgeta we oli stap lukaotem ol risen blong tokbaot nogud samting. Oli no save lego ol smosmol kros blong olgeta. Oli tokbaot man mo faenem rong wetem ol narafala wan. Oli kipim gud ol rabis filing mo tekem evri janis we oli gat blong daonem ol narafala wan. Hemia i nogud tumas long Lod, “taem ol man oli jalus, mo oli wantem kam hae moa long narafala man, evri samting i go olbaot, nao olgeta fasin nogud oli stap kamtru” (Jemes 3:16).

Presiden Joj K. Kanon (1827–1901) i save gud Presiden Brigham Yang (1801–77), hem i wok kolosap wetem hem blong plante yia, tugeta olsem wan memba blong Kworom blong olgeta Twelef Aposol mo olsem kaonsela blong hem long Fas Presidensi. Afta long ded blong Presiden Yang, Presiden Kanon i bin raetem long jenol blong hem: “Mi neva tokbaot nogud o faenem rong wetem eni samting we [Brigham Yang] i bin mekem, kaonsel blong hem o ol tijing blong hem long eni taem long hat blong mi, o iven long ol toktok o aksen blong mi. Hem i bin wan gudfala samting long mi naoia. Tingting we i stap wetem mi oltaem hem i bin: sapos mi tokbaot nogud o faenem rong wetem, o jajem Brata Brigham, hamas nao mi gat blong wok wetem; sapos mi stat naoia, bae mi stop wea? Mi no wantem blong putum miwan long wan rod olsem. Mi save se apostasi i stap kamaot from yumi stap draon long spirit blong tokbaot nogud man mo stap faenem rong. Ol narafala wan, we oli gat bigfala paoa, waes mo eksperiens bitim miwan, i save mekem plante samting mo ronwe long ol rabis risal we mi no save mekem.”¹

Kaonsel we Presiden Kanon i bin givim wetem paoa i wan samting yumi ol memba blong Jos i mas tingting long hem wetem bigfala kea. Toktok blong God i wonem olgeta we oli stap folem Kraes blong oli stap “klin gud, … kam man blong pis, i kwaet man, i man blong joen gud long narafala man, mo i man we i gat sore long man, mo i gat plante gudfala frut long laef blong hem, hem i no save jajem man long fasin we i no stret, mo hem i no save giaman.” Taem ol man blong mekem pis oli wok long kwaet fasin, “i olsem we oli planem sid we frut blong hem, laef we i stret gud” (Jemes 3:17, 18).

Yumi gat wan joes. Yumi save lukaotem ol nogud samting long ol narafala man. O yumi save mekem pis mo wok blong soem long ol narawan wan save, fasin blong stap fea, mo fasin blong fogivnes we yumi stap wantem tumas blong yumiwan. Hem i joes blong yumi; long wanem yumi stap lukaot, bae yumi save faenem.